އެފްއޭ ކަޕްގައި ވާދަ ކުރާ ބްލޫގެ ކޯޗަކަށް ފެސްކޯ ހަމަޖައްސައިފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)  އިން ބާއްވަން ތައްޔާރު ވަމުން އަންނަ އެފްއޭ ކަޕްގައި ވާާދަ ކުރާ ބްލޫ ސްޕޯޓްސް ކުލަބުގެ ކޯޗަކަށް، ތަޖުރިބާކާރު ކޯޗު އަޙުމަދު މުޖުތަބާ (ފެސްކޯ) ހަމަޖައްސައިފި އެވެ.

ބްލޫ އިން ވަނީ އެ ކުލަބުގެ ކޯޗަކަށް ފެސްކޯ ހަމަޖައްސާފައިވާކަން އެ ކުލަބުގެ ސޯޝަލް މީޑިއާގައި އިއުލާން ކޮށްފަ އެވެ. ފެސްކޯ ވަނީ ރާއްޖޭގެ ފުރަތަމަ ޑިވިޝަންގެ ކުލަބު ތަކުގެ އިތުރުން، ޤައުމީ ޓީމުގެ އެސިސްޓެންޓް ކޯޗުގެ ގޮތުގައި ވެސް މަސައްކަތް ކޮށްފަ އެވެ. އެންމެ ފަހުން ފެސްކޯ މަސައްކަތް ކޮށްފައި ވަނީ ކުލަބު ވެލެންސިއާގަ އެވެ. 

ބްލޫ އިން މިފަހަރުގެ އެފްއޭ ކަޕްގައި ވާދަ ކުރާއިރު، އެ ކުލަބަކީ ފުރަތަމަ ޑިވިޝަން އިން ބޭރުން އެފްއޭ ކަޕްގައި ވާދަ ކުރާ ހަމައެކަނި ޓީމެވެ. އެފްއޭއެމް އިން ނިންމާފައި ވަނީ އޭޕްރީލް މަހުގެ 10 ވަނަ ދުވަހުން ފެށިގެން، 18 ވަނަ ދުވަހުގެ ނިޔަލަށް އެފްއޭ ކަޕް ކުރިއަށް ގެންދިޔުމަށެވެ. 

މިއަހަރުގެ އެފްއޭ ކަޕްގައި ޖުމުލަ އަށް ޓީމެއް ވާދަ ކުރެ އެވެ. އެއީ ބްލޫގެ އިތުރުން، މާޒިޔާ ސްޕޯޓްސް އެންޑް ރެކްރިއޭޝަން އާއި، ނިއު ރޭޑިއަންޓް ސްޕޯޓްސް ކުލަބާއި، ޓީސީ ސްޕޯޓްސް ކުލަބާއި، ވިކްޓްރީ ސްޕޯޓްސް ކުލަބާއި، ބުރު ސްޕޯޓްސް ކުލަބާއި ކުލަބު އީގަލްސް އަދި އޮޑި ސްޕޯޓްސް ކުލަބެވެ. 

އެފްއޭ ކަޕްގެ ކުއާޓާ ފައިނަލްގައި ބްލޫ ނިކުންނާނީ އީގަލްސްއާ ދެކޮޅަށެވެ.