ދަ ގްރާންޑޭ ބަލިކޮށް، ވެލެންސިޔާ ސެމީފައިނަލަށް
ސެމީގައި ވެލެންސިޔާ ވާދަކުރަން ޖެހޭނީ އީގަލްސް ނުވަތަ ސަސްއާ
ލީގު މެޗެއްގައި ވެލެންސިޔާއާއި ދަ ގްރާންޑޭ ވާދަކުރަނީ
ކުއާޓަރ ފައިނަލްގައި ދަ ގްރާންޑޭ އަތުން މޮޅުވެ, އެފްއޭކަޕް ސެމީފައިނަލުން ކްލަބް ވެލެންސިޔާ ޖާގަ ހޯދައިފިއެވެ.
ދިވެހި ޕްރިމިއަރ ލީގު ތާވަލްގެ ފުލަށްދިޔަ ދަ ގްރާންޑޭ އަތުން ވެލެންސިޔާ މޮޅުވީ އުނދަގުލުންނެވެ. މި ފުޓުބޯޅަ މެޗު ވެލެންސިޔާ ކާމިޔާބުކުރީ 2-1 ނެވެ. މެޗުގައި ފުރަތަމަ ދެ ލަނޑު ޖަހާ ކުރި ހޯދީ ވެލެންސިޔާއިންނެވެ. ފުރަތަމަ ލަނޑު ފުރަތަމަ ހާފްގެ 14 ވަނަ މިނެޓުގައި ޖެހީ އަސްއަދު އަލީއެވެ. އޭގެ ތިން މިނެޓުފަހުން ދެވަނަ ގޯލް ޖެހީ ހަސަން ސުފިއާންއެވެ. ދަ ގްރާންޑޭގެ ހަމައެކަނި ގޯލް 55 ވަނަ މިނެޓުގައި ޖެހީ ހޫގޯ ނިކޮލަސްއެވެ.
ސެމީފައިނަލްގައި ވެލެންސިޔާ ވާދަކުރަން ޖެހޭނީ އީގަލްސްއާއި ސުޕަރ ޔުނައިޓެޑް ސްޕޯރޓްސް (ސަސް) ވާދަކޮށް މޮޅުވާ ޓީމަކާއެވެ. އެދެޓީމް ވާދަކުރާނީ އަންނަ ހޯމަ ދުވަހު ހަވީރުއެވެ. ދަ ގްރާންޑޭއަށް ސީޒަންގައި ދެން އޮންނާނީ ފުރަތަމަ ޑިވިޝަންގައި ދެމިއޮތުމަށް ކުޅެންޖެހޭ ކޮލިފިކޭޝަންއެވެ.
