ނަތީޖާ ނެރުމަށް ކުޅުނު އިތުރު ވަގުތުގައި ގްރީން ސްޓްރީޓްސްގެ މައްޗަށް ކުރިހޯދައިގެން، އެފްއޭކަޕް ފުޓްބޯޅަ މުބާރާތުގެ ފައިނަލުން މާޒިޔާ ޖާގަހޯދައިފިއެވެ.

މާޒިޔާ ފައިނަލުން ޖާގަހޯދީ 90 މިނިޓް ނިމުނުއިރު 1-1ން ދެ ޓީމް އެއްވަރުވެފައި އޮތުމުން، ނަތީޖާ ނެރުމަށް ކުޅުނު 15 މިނިޓްގެ ދެހާފްގައި އިތުރު ދެ ގޯލް ޖަހައި، 3-1ން ކުރި ހޯދައިގެންނެވެ. އެކަމަކު 15 މިނިޓްގެ ދެހާފްވެސް ގްރީންއިން ކުޅުނީ 10 ކުޅުންތެރިންނާއެކުއެވެ. މެޗުގެ 87 ވަނަ މިނިޓްގައި ކެޕްޓަން ރިލްވާން ވަހީދަށް ދެވަނަ ރީނދޫކާޑާއެކު ރަތްކާޑު ދެއްކުމުންނެވެ.

ފުރަތަމަ ހާފްގެ އިތުރު ވަގުތުގައި ލަނޑު ޖަހައިގެން ފުރަތަމަ ލީޑް ނެގީ މާޒިޔާއިންނެވެ. މާޒިޔާއަށް ކުރިހޯދައިދިނީ އަކްރަމް އަބްދުލްޣަނީއެވެ. ގްރީންއަށް ނަތީޖާ ހަމަހަމަކޮށްދިނީ މެޗުގައި ރަތްކާޑު ދެއްކި ރިލްވާން ވަހީދެވެ. ރިލޭ ނަތީޖާ ހަމަހަމަކުރީ ހިލޭޖެހުމަކުންނެވެ. ނަތީޖާ ނެރުމަށް ކުޅުނު އިތުރު ވަގުތުގައި މާޒިޔާއަށް ފުރަތަމަ ކުރިހޯދައިދިނީ ހަމްޒާ މުހައްމަދު (ހަމްޕު)އެވެ. ތިންވަނަ ގޯލް ޖެހީ ބަދަލު ކުޅުންތެރިއެއްގެ ގޮތުގައި ނުކުތް މޫސާ ޔާމީންއެވެ.

ފައިނަލްގައި މާޒިޔާ ވާދަކުރަންޖެހޭނީ ދެވަނަ ސެމީފައިނަލްގައި މިރޭ ވެލެންސިޔާއާއި ސަސް ވާދަކޮށް މޮޅުވާ ޓީމަކާއެވެ.