އެފްއޭކަޕް ތިންވަނަ ހޮވާ މެޗު ސަސް ނުކުޅޭނެ، ފިޔަވަޅު އަޅާނެ!
ލީގުގެ ތިންވަނަ ގްރީންއަށް ދީފި
ދިރާގު ދިވެހި ޕްރިމިއަރ ލީގުގެ މެޗެއްގައި ސަސްއިން ލަނޑުޖެހުމަށްފަހު
އެފްއޭކަޕް ތިންވަނަ ހޮވާ މެޗު ނުކުޅެން ސުޕަރ ޔުނައިޓެޑް ސްޕޯރޓްސް (ސަސް)އިން ނިންމުމުން އެކްލަބަށް ފިޔަވަޅު އަޅާނެކަމަށް އެފްއޭއެމްއިން ބުނެފިއެވެ.
އެފްއޭއެމްއިން މީޑިޔާތަކަށް ފޮނުވި ލިޔުމުގައި ބުނެފައިވަނީ ތިންވަނަ ހޮވާ މެޗު ނުކުޅެން ސަސްގެ މެނޭޖްމަންޓުން ނިންމާ އެކަން އެފްއޭއެމްއަށް އަންގާފައިވާކަމަށެވެ. އެހެންކަމުން އާދިއްތަ ދުވަހު ހަވީރު ކުޅެން އޮތް އެމެޗު ކެންސަލްކޮށްފައިވާކަމަށް އެއިދާރާއިން ބުންޏެވެ. އެފްއޭއެމްއިން ބުނީ މުބާރާތުގައި ބައިވެރިވުމަށްފަހު މުބާރާތުން ވަކިވުމުގެ ނުވަތަ މެޗު ނުކުޅެ ދޫކޮށްލުމުގެ ފުރުޞަތި އެއްވެސް ޓީމަކަށް ލިބިގެން ނުވާކަމަށެވެ.
އެމެޗު ނުކުޅެން ސަސްއިން ނިންމުމުން މެޗުން އެޓީމް ބަލިވިކަމަށް ނިންމައި, މުބާރާތުގެ ތިންވަނަ ކްލަބް ގްރީން ސްޓްރީޓްސްއަށްދޭންވެސް ވަނީ ނިންމާފައެވެ. އެއީ އެމެޗުން ގްރީން މޮޅުވީކަމަށް ބެލުމަށްފަހުއެވެ. ގްރީންއަށް، ތިންވަނަ ޓީމަށް ދޭ މެޑަލް ދޭނީ އާދިއްތަ ދުވަހުގެރޭ ކުޅޭ މުބާރާތުގެ ފައިނަލް މެޗަށްފަހުއެވެ. ފައިނަލްގައި ވާދަކުރާނީ މާޒިޔާއާއި ވެލެންސިޔާއެވެ.
މިއަހަރުގެ ދެވަނަ ޑިވިޝަންގައި މެޗަށް ހާޒިރުނުވުމުންވެސް އެފްއޭއެމްއިން ވަނީ ކްލަބެއް ޖޫރިމަނކޮށްފައެވެ. އަދި ވިކްޓްރީ ސަސްޕެންޑްކުރުމުގެ ކުރިން، އެޓީމްވެސް މެޗަށް ހާޒިނުވާތީ ޖޫރިމަނާކޮށްފައިވެއެވެ.
