އެފްއޭކަޕް ނުކުޅެ ފުޓްބޯޅަ ސީޒަން ނިންމާލައިފި

މާލީ ދަތިތަކާއި އިދާރީ މައްސަލަތައް ކުރިމަތިވެފައިވާ އެފްއޭއެމުން މި އަހަރުގެ އެފްއޭކަޕް ފުޓްބޯޅަ މުބާރާތް ނުކުޅުވައި، ފުޓްބޯޅަ ސީޒަން ނިންމާލައިފި އެވެ.

މިހެންވެ ސީޒަނުގެ ފަހު މެޗަކަށްވީ އިއްޔެ ހަވީރު ދިވެހި ޕްރެމިއާ ލީގުގެ ފަހު މެޗުގައި މާޒިޔާ އާއި ކްލަބް އީގަލްސް ކުޅުނު މެޗެވެ.

އެފްއޭކަޕް ނުބޭއްވުމުން މި އަހަރުގެ ސީޒަނުގައި ކުޅުވާފައިމި ވަނީ އެންމެ ދެ މުބާރާތެވެ. އެއީ ދިވެހި ޕްރެމިއާ ލީގާއި ސީޒަނުގެ ފުރަތަމަ މުބާރާތް ކަމަށްވާ ޕްރެޒިޑެންޓްސް ކަޕެވެ.

އެފްއޭކަޕް ނުބޭއްވި ސަބަބެއް އެފްއޭއެމުން ނުބުނެ އެވެ. ނަމަވެސް މިއީ އެފްއޭއެމަށް ދިމާވެފައިވާ މާލީ ދަތިތަކާއި އެތަނުގެ މަސައްކަތް ކޮށްދޭން މުވައްޒަފުން ނުކުންނަން ބޭނުންނުވާތީވެ، މަޖުބޫރުވެގެން ނިންމި ނިންމުމެއް ކަމަށް ފުރަތަމަ ޑިވިޝަނުގެ ކުލަބެއްގެ އިސް އޮފިޝަލަކު ބުންޏެވެ.

މާލީ ދަތިތަކާހުރެ އެފްއޭއެމަށް ވަނީ މި އަހަރުގެ ދެ ވަނަ ޑިވިޝަނާއި ތިން ވަނަ ޑިވިޝަން ވެސް ބޭއްވޭނެ ގޮތެއް ނުވެފަ އެވެ. އަދި މިއަންނަ އަހަރު މުޅި ރާއްޖެ އަށް ހުޅުވާލައިގެން ފަށަން ނިންމި ދިވެހި ޕްރެމިއާ ލީގުގެ ކޮލިފިކޭޝަން ވެސް ވަނީ ހުއްޓާލައިފަ އެވެ.