ޕެނަލްޓީގައި ސަސް ބަލިކޮށް، ފައިނަލްގެ ދެވަނަ ޖާގަ ވެލެންސިޔާއަށް

ޕެނަލްޓީގައި ސުޕަރ ޔުނައިޓެޑް ސްޕޯރޓްސް (ސަސް) ބަލިކޮށް, އެފްއޭކަޕް ފުޓްބޯޅަ މުބާރާތުގެ ފައިނަލްގެ ދެވަނަ ޖާގަ ކްލަބް ވެލެންސިޔާއިން ހޯދައިފިއެވެ.

ވެލެންސިޔާ ފައިނަލަށް ދަތުރުކުރީ މެޗުގެ ފުރިހަމަ ވަގުތު ހަމަވިއިރު 1-1 ން ދެޓީމް އެއްވަރުވެ, ނަތީޖާ ނެރުމަށް ކުޅުނު އިތުރު ވަގުތުގެ ދެހާފްގައިވެސް ނަތީޖާއަށް ބަދަލެއް ނައުމުން ޖެހި ޕެނަލްޓީގައި ކުރި ހޯދައިގެންނެވެ. ޕެނަލްޓީގައި ވެލެންސިޔާ ކުރިހޯދީ 5-4 ނެވެ. މެޗުގައި ފުރަތަމަ ލަނޑު ޖަހާ ކުރިހޯދީ ވެލެންސިޔާއިންނެވެ. ވެލެންސިޔާގެ ލަނޑު ޖެހީ އަބުދުالله ހަނީފް (ބެންޖޯ) އެވެ. ސަސްއިން ނަތީޖާ ހަމަހަމަކުރީ 90 މިނިޓް ހަމަވެ, ދެއްކި އިތުރު ވަގުތުގައި އަހުމަދު ހުސާމްއެވެ.

ޕެނަލްޓީގައި ފުރަތަމަ ޖެހި ފަސް ޕެނަލްޓީގެ ތެރެއިން ކޮންމެ ޓީމަކަށްވެސް އެއް ޕެނަލްޓީ ނާކާމިޔާބުވިއެވެ. ސަސްގެ ފުރަތަމަ ޕެނަލްޓީ ހުސާމް އަތުން ނާކާމިޔާބުވިއެވެ. ވެލެންސިޔާއަށް ނާކާމިޔާބުވީ އަބުދުالله ހަނީފް ޖެހި ވެލެންސިޔާގެ ދެ ޕެނަލްޓީއެވެ. މިދެކުޅުންތެރިންނަކީ މެޗުގެ ތެރެއިން ދެޓީމަށް ލަނޑު ޖަހައިދިން ދެ ކުޅުންތެރިންނެވެ. ފުރަތަމަ ފަސް ޕެނަލްޓީން ނަތީޖާ އެއްވަރުވުމުން ޕެނަލްޓީއަކުން އިތުރު ތިން ޕެނަލްޓީ ޖެހިއެވެ. ސަސްގެ ތިން ޕެނަލްޓީވެސް ނާކާމިޔާބުވީއެވެ. ވެލެންސިޔާގެ ފުރަތަމަ ދެޕެނަލްޓީއަށްފަހު މެޗުން މޮޅުވީ އަބުދުالله މިދުހަތު ފަހުމީ ޖެހި ވެލެންސިޔާގެ އަށްވަނަ ޕެނަލްޓީއެވެ. ޝޫޓްއައުޓްގައި ވެލެންސިޔާގެ ކީޕަރު އާދަމް އިމްއާން ދެ ޕެނަލްޓީ މަތަކުރިއެވެ.

ފައިނަލްގައި ވެލެންސިޔާ ވާދަކުރަން ޖެހޭނީ މާޒިޔާއާއެވެ. ޕްރެޒިޑެންޓްކަޕް ފައިނަލްގައިވެސް ވާދަކުރީ މިދެޓީމެވެ. އެފައިނަލް ކާމިޔާބުކޮށް ތަށިހޯދީ ވެލެންސިޔާއިންނެވެ.