ޕެނަލްޓީގައި އީގަލްސް ބަލިކޮށް، އެފްއޭކަޕް ސެމީއަށް ސަސް!

ޕެނަލްޓީގައި ކްލަބް އީގަލްސް ބަލިކޮށް, އެފްއޭކަޕް ފުޓްބޯޅަ މުބާރާތުގެ ސެމީފައިނަލްގެ ފަހު ޖާގަ ސުޕަރ ޔުނައިޓެޑް ސްޕޯރޓްސް (ސަސް) ހޯދައިފިއެވެ.

ލީގުގެ ހަތްވަނަ އަށް ދިއުމުން ކޮލިފިކޭޝަން ކުޅެން ޖެހިފައިވާ ސަސްއިން, ލީގުގެ ދެވަނަ އީގަލްސްގެ މައްޗަށް ޕެނަލްޓީގައި ކުރި ހޯދީ 7-6 ނެވެ. މެޗުގެ ފުރިހަމަ ވަގުތާއި, ނަތީޖާ ނެރުމަށް ކުޅުނު 15 މިނިޓްގެ ދެހާފް ނިމުނުއިރުވެސް ނަތީޖާއަކީ 2-2 އެވެ. މެޗުގެ 18 ވަނަ މިނިޓްގައި ފުރަތަމަ ލަނޑު ޖަހާ ކުރި ހޯދީ ސަސްއިންނެވެ. ސަސްއަށް ފުރަތަމަ ކުރި ހޯދައިދިނީ އިބްރާހީމް އަތީގު ހަސަންއެވެ. 31 ވަނަ މިނިޓްގައި އީގަލްސްއަށް ބުރޫނޯ ވިނީޝިއުސް ނަތީޖާ ހަމަހަމަކޮށްދީފައި ވަނިކޮށް, ސަސްއިން ދެވަނަ ފަހަރަށް ކުރިހޯދީ ދެވަނަ ހާފްގައި މުޙައްމަދު ސާމިރު ޖެހި ލަނޑުންނެވެ. އެކަމަކު އީގަލްސްގެ އަބުދުالله ޒިޔާން 82 ވަނަ މިނިޓްގައި ލަނޑުޖަހާ ދެވަނަ ފަހަރަށް ނަތީޖާ ހަމަހަމަކޮށްދިނެވެ.

ޕެނަލްޓީގައި ފުރަތަމަ ފަސް ޕެނަލްޓީން ކޮންމެ ޓީމަކަށްވެސް ކާމިޔާބުކުރެވުނީ ދެ ޕެނަލްޓީއެވެ. އީގަލްސްގެ ފުރަތަމަ ދެ ޕެނަލްޓީ ހަސަން ރާއިފް އަހުމަދު (ހަންނަ)އާއި, މުޙައްމަދު ނާއިމް އަތުން ބޭކާރުވިއެވެ. އަދި ހަތަރުވަނަ ޕެނަލްޓީ ހިސާމް ސަލީމް އަތުންވެސް ވީބޭކާރެވެ. ސަސްގެ ފުރަތަމަ ޕެނަލްޓީ އައިހަމް އަހުމަދަށްވެސް ކާމިޔާބެއް ނުކުރެވުނެވެ. ހަތަރުވަނަ ޕެނަލްޓީއާއި ފަސްވަނަ ޕެނަލްޓީ މުޙައްމަދު ޝަހާއުއާއި, މުޙައްމަދު ސާމިރު އަތުން ނާކާމިޔާބުވެ, އިތުރު ޕެނަލްޓީ ޖަހަން ޖެހުނީއެވެ.

ޕެނަލްޓީއަކުން ޕެނަލްޓީއަކުން ޖަހަމުންގޮސް ނަތީޖާ ނެރެވުނީ ފަސް ޕެނަލްޓީ ޖަހައިގެންނެވެ. ސަސްއިން ފަސް ޕެނަލްޓީވެސް ކާމިޔާބުކުރިއެވެ. އީގަލްސްގެ ފަސްވަނަ ޕެނަލްޓީ ސޮލާހު އަލީ އަތުން ބޭކާރުވެ ސަސް މުބާރާތުގެ ސެމީފައިނަލަށް ދަތުރުކުރީއެވެ.

ސެމީފައިނަލްގައި ސަސް ވާދަކުރަން ޖެހޭނީ ކްލަބް ވެލެންސިޔާ އާއިއެވެ. ސެމީފައިނަލް ދެ މެޗު ކުޅޭނީ މިމަހުގެ 18 ވަނަ ދުވަހުއެވެ.