ބާސެލޯނާ އާއެކު ފްލިކް 100 ވަނަ މެޗަށް، މޮޅުވާން މަސައްކަތް ކުރުން ނޫން އެހެން ގޮތެއް ނެތް

ސްޕެނިޝް ލީގުގައި ވިޔަރެއާލްއާ ދެކޮޅަށް ނިކުންނައިރު، މޮޅުވާން މަސައްކަތް ކުރުން ނޫން އެހެން ގޮތެއް ނެތް ކަމަށް ބާސެލޯނާގެ ކޯޗު ހަންސީ ފްލިކް ބުނެފި އެވެ. 

އޭނާ މިހެން ބުނީ ހޮނިހިރު ދުވަހުގެ ރޭ ބާސެލޯނާގެ އަމިއްލަ ދަނޑުގައި ވިޔަރެއާލްއާ ދެކޮޅަށް ނިކުންނަ މެޗުގެ ކުރިން އޮތް ނޫސްވެރިންގެ ބައްދަލުވުމުގަ އެވެ. މި މެޗަކީ، ބާސެލޯނާގެ ކޯޗުކަމާ ފްލިކް ހަވާލުވީ ފަހުން، އޭނާގެ އިރުޝާދުގެ ދަށުން ބާސެލޯނާ އިން ކުޅޭ 100 ވަނަ މެޗެވެ.

ވިޔަރެއާލްއާ ދެކޮޅަށް ނިކުންނައިރު، ފްލިކް ބުނީ އެ މެޗަކީ ފަސޭހަ މެޗެއްގެ ގޮތުގައި ދެކިގެން ތިބެވެން ނެތް ކަމަށެވެ. ވިޔަރެއާލް އަކީ ނުރައްކާތެރި ޓީމެއް ކަމަށާއި، އެ ޓީމަކީ ކޮންމެ ވަގުތެއްގައި ވެސް ލަނޑު ޖަހާ ކަހަލަ ޓީމެއް ކަމަށް ފްލިކް ބުންޏެވެ. އޭނާ ބުނީ ބާސެލޯނާ އަށް ބޭކާރު ގޯސް ތަކެއް ހެދެން ނެތް ކަމަށާއި، އެ ޓީމުގެ ވައްޓަފާޅީގައި ކުޅެން ޖެހޭ ކަމަށެވެ.

ލީގު ރޭހާ ގުޅޭ ގޮތުން ވާހަކަ ދައްކަމުން ފްލިކް ބުނީ، ކުރިމަތީގައި އޮތީ ދިގު ދަތުރެއް ކަމަށެވެ. އޭނާ ބުނީ ކޮންމެ މެޗަކީ ވެސް މުހިންމު މެޗެއް ކަމަށާއި، ކޮންމެ މޮޅަކީ ވެސް މުހިންމު މޮޅެއް ކަމަށެވެ. ބާސެލޯނާ އިން ހޯދާ ކޮންމެ މޮޅަކީ، އިދިކޮޅު ޓީމަށް ބާސެލޯނާ އަތުލަން އޮތް ފުރުސަތު ހަނިވާ ކަމެއް ކަމަށް ފްލިކް ބުންޏެވެ.

ބާސެލޯނާ އާއެކު 100 ވަނަ މެޗަށް ނިކުންނައިރު، ފްލިކް އަށް މިއީ ޚާއްޞަ ޝަރަފެއް ކަމަށް އޭނާ ބުންޏެވެ. އެގޮތުން ފްލިކް ބުނީ، ބާސެލޯނާ އަށް އިރުޝާދު ދިނުމަކީ އޭނާގެ ވަރަށް ބޮޑު އުންމީދެއް، އަދި ހުވަފަނެއްކަމަށް ފާހަގަކޮށް ބުނީ، ބާސެލޯނާ އާއެކު ހޭދަ ކުރެވޭ ކޮންމެ ވަގުތެއް ވެސް އޭނާ އަށް ޚާއްޞަ ކަމަށެވެ.

ފްލިކްގެ އިރުޝާދުގެ ދަށުން ބާސެލޯނާ އިން މިހާތަނަށް 99 މެޗު ކުޅެފައިވާއިރު، އޭގެ ތެރެއިން 74 މެޗުން ބާސެލޯނާ ވަނީ މޮޅުވެފަ އެވެ. ނުވަ މެޗު އެއްވަރުވެފައިވާއިރު، 16 މެޗުން ވަނީ ބަލިވެފަ އެވެ. ފްލިކްގެ އިރުޝާދުގެ ދަށުން ބާސެލޯނާ އިން މިހާތަނަށް ހަތަރު ތަށްޓެއް ވެސް ކާމިޔާބު ކޮށްފައިވެ އެވެ.

ވިޔަރެއާލްއާ ދެކޮޅަށް ނިކުންނައިރު، ލީގު ތާވަލްގެ އެއް ވަނަ މަގާމުގައި ބާސެލޯނާ އޮތީ 25 މެޗުން 61 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އޮތް ވާދަވެރި ރެއާލް މެޑްރިޑަށް ލިބެނީ 60 ޕޮއިންޓެވެ.