ދެ ވަނަ ލެގުން މޮޅުވި ނަމަވެސް، ބާސެލޯނާ ކަޓައިފި

ސްޕެނިޝް ކޮޕަ ޑެލް ރޭގެ ސެމީ ފައިނަލްގެ ދެ ވަނަ ލެގުގައި އެތުލެޓިކޯ މެޑްރިޑްއާ ދެކޮޅަށް ކުޅުނު މެޗުން މޮޅުވި ނަމަވެސް، މުބާރާތުގެ ފައިނަލްގެ ޖާގަ ނުލިބި ބާސެލޯނާ ކަޓައިފި އެވެ. 

މުބާރާތުގެ ސެމީ ފައިނަލްގެ ފުރަތަމަ ލެގުގައި އެތުލެޓިކޯގެ އަމިއްލަ ދަނޑުގައި މި ދެ ޓީމު ބައްދަލު ކުރި މެޗު އެތުލެޓިކޯ އިން ކާމިޔާބު ކުރީ 4-0 އިންނެވެ. އެހެންވެ، ބާސެލޯނާ އަށް ފައިނަލްގެ ފުރުސަތު އޮތީ ދެ ވަނަ ލެގުގައި އެތުލެޓިކޯގެ މައްޗަށް ފަސް ލަނޑުން ކުރި ހޯދައިގެންނެވެ. 

އަންގާރަ ދުވަހުގެ ރޭ ބާސެލޯނާގެ އަމިއްލަ ދަނޑުގައި ކުޅުނު ދެ ވަނަ ލެގު އެ މެޗް ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ބާސެލޯނާ އިން ދެ ލަނޑު ޖެހިއިރު، އަނެއް ލަނޑު ޖެހީ ފަހު ހާފުގަ އެވެ.

މެޗުގެ ފުރަތަމަ ހާފުގެ 29 ވަނަ މިނެޓުގައި ބާސެލޯނާ އަށް ލީޑު ނަގައިދިނީ މާކް ބެނާލް އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ސްޕެއިންގެ ޒުވާން ކުޅުންތެރިޔާ ލަމީން ޔަމާލް އެވެ. އޭގެ ފަހުން މެޗުގެ ފުރަތަމަ ހާފުގެ އިތުރު ވަގުތުގައި ބާސެލޯނާ އަށް ލިބުނު ޕެނަލްޓީ ކާމިޔާބުކޮށް، ދެ ވަނަ ލަނޑު ޖެހީ ރަފީނިއާ އެވެ.

މެޗުގެ ދެ ވަނަ ހާފުގައި ވެސް ބާސެލޯނާ އިން ވަނީ އިތުރު ލަނޑު ޖަހަން މަސައްކަތް ކޮށްފަ އެވެ. އެގޮތުން މެޗުގެ 72 ވަނަ މިނެޓުގައި ބެނާލް ވަނީ ބާސެލޯނާގެ ތިން ވަނަ ލަނޑެއް ޖަހައި އުންމީދު ހިފަހައްޓައިފަ އެވެ. އެއީ ޔާއޯ ކަންސޭލޯ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އިތުރު އެއް ލަނޑު ޖަހައިގެން ބާސެލޯނާ އަށް އެއްވަރު ކުރެވެން އޮތް ނަމަވެސް، އެ ޓީމަށް އިތުރު ލަނޑެއް ނުޖެހުނެވެ.

އެއާ އެކު އެތުލެޓިކޯ އިން ވަނީ އެގްރިގޭޓް ނަތީޖާ 4-3 އިން މުބާރާތުގެ ފައިނަލްގެ ޖާގަ ހޯދައިފަ އެވެ.