އަމިއްލަ ދަނޑުގައި ރެއާލް އިން ގެޓާފޭގެ އަތް ދަށުވެ، ބާސެލޯނާ އަށް ހަތަރު ޕޮއިންޓުގެ ލީޑެއް

ސްޕެނިޝް ލީގުގައި ގެޓާފޭއާ ދެކޮޅަށް ކުޅުނު މެޗުން ރެއާލް މެޑްރިޑް ބަލިވެ، އެއްވަނައި ގައި އޮތް ބާސެލޯނާ އަށް ހަތަރު ޕޮއިންޓުގެ ލީޑެއް ލިބިއްޖެ އެވެ.

ރެއާލްގެ އަމިއްލަ ދަނޑުގައި ހޯމަ ދުވަހުގެ ރޭ ކުޅުނު މެޗުގައި ގެޓާފޭ އިން ވަނީ 1-0 އިން ރެއާލް މެޑްރިޑް ބަލިކޮށްފަ އެވެ. މެޗުގައި ގެޓާފޭ އިން އެ ޓީމުގެ ލަނޑު ޖެހީ ވެސް މެޗުގެ ފުރަތަމަ ހާފުގަ އެވެ. 

މެޗު ފަށައިގެން ރެއާލް އިން ވަނީ ރަނގަޅަށް ކުޅެ ލަނޑު ޖަހަން ފުރުސަތު ތަކެއް ހޯދައިފަ އެވެ. އެގޮތުން ރެއާލްގެ ވިނީޝިއުސް ޖޫނިއާ އާއި އާޑާ ގުލާ އަށް ލަނޑު ޖަހަން ފުރުސަތު ލިބުނު ނަމަވެސް، ފުރުސަތުގެ ބޭނުން ކުރެވޭ ގޮތެއް ނުވި އެވެ. މެޗުގެ ފުރަތަމަ ހާފުގެ 39 ވަނަ މިނެޓުގައި ގެޓާފޭ އިން ވަނީ ލަނޑު ޖަހައި ލީޑު ނަގައިފަ އެވެ. ރެއާލްގެ އޭރިޔާ ބޭރުން ލިބުނު ބޯޅައެއްގައި އެއް ފަހަރުން ޖަހައި ގޯލުގެ މަތީ ކަނަށް އަމާޒުކޮށްގެން އެ ލަނޑު ޖަހައިދިނީ މާޓިން ސެޓްރިއާނޯ އެވެ.

މެޗުން މޮޅުވެ، އެއް ވަނައިގައި އޮތް އެންމެ ފަހުގެ ޗެމްޕިއަން ބާސެލޯނާއާ ދެމެދު އޮތް ފަރަގު ކުޑަ ކުރުމުގެ ފުރުސަތު ރެއާލް އޮތް ނަމަވެސް، ބަލިވެ އެ ފުރުސަތު ވަނީ ގެއްލިފަ އެވެ. ލީގު ތާވަލްގެ ދެ ވަނަ މަގާމުގައި ރެއާލް އޮތީ 26 މެޗުން 60 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން އެއް ވަނައިގައި ބާސެލޯނާ އަށް ލިބެނީ 64 ޕޮއިންޓެވެ.