އެފްއޭއެމް ވެޓަރަންސް ކަޕް: ޔޫވީ އާއި ބުރުގެ ކުރިމަތިލުން އެއްވަރު

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ކުރިއަށް ގެންދާ، އެފްއޭއެމް ވެޓަރަންސް ކަޕްގެ ގުރޫޕް ބީގައި ޔުނައިޓެޑު ވިކްޓަރީ (ޔޫވީ) އާއި، ބުރު ސްޕޯޓްސް ކުލަބު ބައްދަލު ކުރި މެޗު އެއްވަރު ވެގެން ނިމިއްޖެ އެވެ.

އާދިއްތަ ދުވަހުގެ ހަވީރު މާފަންނު ޓާފްގައި ކުޅުނު މެޗު ނިމުނީ ދެ ޓީމު 2-2 އިން އެއްވަރު ވެގެންނެވެ. މެޗުގައި ޔޫވީ އިން ދެ ލަނޑު ޖަހައިގެން ކުރި ހޯދާފައި ވަނިކޮށް، ބުރުން ވަނީ ފަހަތުން އަރައި ނަތީޖާ ހަމަހަމަ ކޮށްފަ އެވެ. 

މެޗު ފަށައިގެން ނުވަ ވަނަ މިނެޓުގައި ޔޫވީ އަށް ލީޑު ނަގައިދިނީ އަލީ މޫސާ އެވެ. އޭގެ ފަހުން 24 ވަނަ މިނެޓުގައި އިބްރާހީމް މުއާޒް ވަނީ ޔޫވީގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. ފުރަތަމަ ހާފު ނިމުމުގެ ކުރިން ބުރުގެ ފުރަތަމަ ލަނޑު ޖެހީ ޙުސެއިން ޝަޒީމް އެވެ. އޭގެ ފަހުން މެޗުގެ ދެ ވަނަ ހާފުގެ 60 ވަނަ މިނެޓުގައި ބުރަށް ނަތީޖާ ހަމަހަމަ ކޮށްދިނީ ވެސް ޝަޒީމް އެވެ.

ޔޫވީ އާއި ބުރުގެ އިތުރުން، ދެން މި ގުރޫޕުގައި އޮތީ ހުއްރިއްޔާ ސްޕޯޓްސް ކުލަބު (ހުރާ) އާއި، ހުޅުމާލެ ވެޓަރަންސް ކުލަބު އަދި ޕޮލިސް ކުލަބެވެ. އެފްއޭއެމް އިން މިއަހަރުގެ ވެޓަރަންސް ކަޕް ބާއްވާއިރު، މުބާރާތުގައި ޖުމުލަ 10 ޓީމެއް ވާދަ ކުރެ އެވެ. ދެ ގުރޫޕަށް ބަހާލައިގެން މުބާރާތް ކުރިއަށް ގެންދާއިރު، ކޮންމެ ގުރޫޕެއްގައި އޮތީ ފަސް ޓީމެވެ.