އިޒްރޭލުން ތެހެރާނުގެ މެހެރްއާބާދު އެއާޕޯޓަށް ވަރުގަދަ ހަމަލާތަކެއް ދީފި
7 މާރިޗު 2026 | ހޮނިހިރު 02:42އީރާނުގެ އެތެރޭގެ އުދުހުންތަކުގެ މަރުކަޒު ކަމަށްވާ މެހެރްއާބާދު އެއާޕޯޓަށް އިޒްރޭލުން ދިން ވަރުގަދަ ހަމަލާތަކަކާއެކު އެތަނުގެ ބައެއް ބޯޓުތަކުގައި ރޯވެ ބޮޑެތި ގެއްލުންތަކެއް ވަނީ ވެފައެވެ. އީރާނުގެ ދައުލަތުގެ މީޑިއާއިން މި ހަމަލާތައް ކަށަވަރުކޮށްދީފައިވާއިރު، މިއީ މީގެ ކުރިން ދީފައިވާ ހަމަލާތަކަށްވުރެ މާ ވަރުގަދަ ހަމަލާތަކެއް ކަމަށް މަންޒަރު ދުށް ފަރާތްތަކުން ބުނެއެވެ. އިޒްރޭލުން މި ހަމަލާތައް ދީފައިވަނީ އީރާނުގެ އެކި ސަރަހައްދުތަކަށް އަމާޒުކޮށް ފުޅާ ދާއިރާއެއްގައި ފަށާފައިވާ އަސްކަރީ އޮޕަރޭޝަނެއްގެ ތެރެއިންނެވެ.
ތެހެރާންގެ މެހެރްއާބާދު އެއާޕޯޓުގައި ބޮޑު އަލިފާންގަނޑެއް ރޯވެފައިވާ މަންޒަރު ފެންނަ ފޮޓޯ އެއް. | ޕްރެސްޓީވީ
އީރާނުގެ ވެރިރަށް ތެހެރާންގައި އޮންނަ ވިޔަފާރީގެ މައި އެއާޕޯޓްތަކުގެ ތެރެއިން އެއް އެއާޕޯޓަށް ވަރުގަދަ ހަމަލާތަކެއް ދީފިއެވެ.
އީރާނުގެ އެންމެ ބާރުބޮޑު އަދި އެތެރޭގެ އުދުހުންތަކުގެ މައި މަރުކަޒު ކަމަށްވާ މެހެރްއާބާދު އެއާޕޯޓުގައި ހުރި ބައެއް ބޯޓުތަކުގައި އަލިފާން ރޯވެ، ބޯ ދުންތައް އަރަމުންދާ މަންޒަރު ފެންނަ ވީޑިއޯތައް މަންޒަރު ދުށް ފަރާތްތަކުން ވަނީ ސޯޝަލް މީޑިއާގައި ހިއްސާކޮށްފައެވެ. ހުކުރު ދުވަހު ނަގާފައިވާ ސެޓެލައިޓް ފޮޓޯތަކުން ދައްކާ ގޮތުގައި، އެ ވަގުތު އެއާޕޯޓުގައި ގިނަ އަދަދެއްގެ ބޯޓުތައް އޮތެވެ.
އީރާނުގެ ދައުލަތުގެ މީޑިއާއިން ވެސް ވަނީ އެއާޕޯޓުގެ ބައެއް ސަރަހައްދުތަކަށް އަމާޒުކޮށް ހަމަލާތަކެއް ދީފައިވާކަން ކަށަވަރުކޮށްދީފައެވެ.
މި ހަމަލާތައް ދީފައިވަނީ އީރާނުގެ އެކި ސަރަހައްދުތަކަށް "ފުޅާ ދާއިރާއެއްގައި އާ ހަމަލާތަކެއް" ދޭން ފަށާފައިވާ ކަމަށް އިޒްރޭލު ސިފައިން ބުނެފައިވާ ދަނޑިވަޅެއްގައެވެ. މީގެ ކުރިން މާރިޗު މަހުގެ 4 ވަނަ ދުވަހު ވެސް އިޒްރޭލުން ވަނީ މި އެއާޕޯޓަށް ހަމަލާދީފައެވެ. އެ ފަހަރު އިޒްރޭލުން ބުނެފައިވަނީ އެ ހަމަލާތަކުގައި، އިޒްރޭލުގެ ވައިގެ ސިފައިންނަށް ނުރައްކާވާ ފަދަ ދިފާއީ އަދި ދެނެގަތުމުގެ ނިޒާމުތައް ނައްތާލާފައިވާ ކަމަށެވެ. މީގެ ތެރޭގައި އެއާޕޯޓުގައި ހުންނަ ހެލިކޮޕްޓަރު އުފައްދާ ބައި ވެސް ހިމެނެއެވެ.
ހުކުރު ދުވަހުގެ ރޭ ދިން އާ ހަމަލާތަކުގައި ބޮން އަޅާފައިވަނީ އެއާޕޯޓުގެ ސީދާ ކޮން ސަރަހައްދުތަކަކަށް އަދި ސާފުނުވި ނަމަވެސް، މަންޒަރު ދުށް މީހުން ބުނާ ގޮތުގައި ފަހުން މި ދިން ހަމަލާތައް ކުރީގެ ހަމަލާތަކަށް ވުރެ މާ ވަރުގަދައެވެ.
މަސްދަރު: ބީބީސީ
