ގަވާއިދާ ޚިލާފަށް އުޅޭ ބިދޭސީން މިހާރު ރާއްޖެއަކު ނެތް: މެންބަރު ފަލާހު
ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ މައްސަލަ މި ސަރުކާރުން އެއްކޮށް ހައްލުކޮށްފައިވާ ކަމަށް ޕީއެންސީގެ ޕީޖީ ލީޑަރު އިބްރާހިމް ފަލާހު ވިދާޅުވެއްޖެ. ފަލާހު މިހެން ވިދާޅުވި ނަމަވެސް، އިމިގްރޭޝަނުން ދަނީ ގަވާއިދާ ޚިލާފަށް އުޅޭ ބިދޭސީން ހޯދުމަށް ކޮންމެ ދުވަހަކު ވެސް ޚާއްސަ އޮޕަރޭޝަންތައް ހިންގަމުން. މީގެ އިތުރުން، ބިދޭސީންގެ މައްސަލަ ހައްލުކުރުމަށްޓަކައި "އޮޕަރޭޝަން ކުރަނގީ" ގެ ދަށުން ބޮޑު ލީގަލައިޒޭޝަން ޕްރޮގްރާމެއް ކުރިއަށް ގެންދިއުމަށް ހޯމް މިނިސްޓްރީ އިން ވަނީ ނިންމާފަ.
ޕީއެންސީގެ ޕީޖީ ލީޑަރު އަދި ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އިބްރާހިމް ފަލާހު | ރައްޔިތުންގެ މަޖިލިސް
ދިވެހިރާއްޖޭގައި މިހާރު ގަވާއިދާ ޚިލާފަށް އުޅޭ ބިދޭސީން ނެތް ކަމަށް ޕީއެންސީގެ ޕީޖީ ލީޑަރު އަދި ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވެއްޖެ އެވެ.
އާދިއްތަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުން މެންބަރު ވިދާޅުވީ ރައީސް ޑރ. މުހައްމަދު މުއިއްޒު ސަރުކާރާ ހަވާލުވި އިރު މި ގައުމުގައި ބިދޭސީންގެ މައްސަލަ ވަރަށް ބޮޑު ކަމަށެވެ.
އެގޮތުން ބިދޭސީންގެ ސަބަބުން މަގެއްގެ މަތިން ހިނގަން ވެސް ދަތި ކަމަށް ވިދާޅުވެ ފަލާހު ވިދާޅުވީ މި ސަރުކާރުން އެ މައްސަލަ އެއްކޮށް ހައްލު ކޮށްފައިވާ ކަމަށެވެ. އަދި މިހާރު ރާއްޖޭގައި ގަވާއިދާ ޚިލާފަށް އުޅޭ ބިދޭސީން ނޫޅޭނެ ކަމަށް ވެސް ފަލާހު ވިދާޅުވި އެވެ.
މިހާރު ނޫޅޭނެ ގަވާއިދާ ޚިލާފަށް އުޅޭ ބިދޭސީންނެއް.......ބިދޭސީންގެ ކަންކަން މިހާރު މިގައުމުގަ ހަމައަކަށް އެޅިފަ.ޕީއެންސީގެ ޕީޖީ ލީޑަރު އަދި ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އިބްރާހިމް ފަލާހު
ފަލާހު އެހެން ވިދާޅުވި އިރު ގަވާއިދާ ޚިލާފަށް އުޅޭ ބިދޭސީންގެ ގިނަ މައްސަލަތަކެއް މިހާރު ވެސް އިމިގްރޭޝަނުން ދަނީ ބަލަމުންނެވެ. އެގޮތުން އާދިއްތަ ދުވަހު ވެސް ފިލައިގެން އުޅޭ ބިދޭސީންތަކެއް ހޯދަން އިމިގްރޭޝަނުން އިއުލާނު ކޮށްފައި ވެ އެވެ.
އޭގެ އިތުރުން ގަވާއިދާ ޚިލާފަށް އުޅޭ ބިދޭސީން ކޮންމެ ދުވަހަކު ކަހަލަ ގޮތަކަށް ހައްޔަރު ކުރާ ކަމަށް ވެސް އިމިގްރޭޝަނުން ދަނީ ހާމަ ކުރަމުންނެވެ. ރާއްޖޭގައި ވަޒީފާ އަދާކުރާ ބިދޭސީންގެ ތެރެއިން ހުއްދައެއް ނެތި، ނުވަތަ ހުއްދައިގެ މުއްދަތު ހަމަވެފައިވާ ނުވަތަ ކާކުކަން އަންގައިދޭ ސައްހަ ލިޔުމެއް ނެތި އުޅޭ ބިދޭސީން ގެ އަދަދު ގިނަ ކަން ފާހަކޮށް ހޯމް މިނިސްޓްރީ އިން ވަނީ މި ފަހުން ވެސް ބިދޭސީން ގަވާއިދަށް ފެއްތުމުގެ ބޮޑު ޕްރޮގްރާމެއް ފަށާފަ އެވެ.
އެގޮތުން ހޯމް މިނިސްޓްރީ އިން ބުނީ "އޮޕަރޭޝަން ކުރަނގީ"ގެ ދަށުން ހިންގުމަށް ހަމަޖެހިފައިވާ "މާސް ލީގަލައިޒޭޝަން ޕްރޮގްރާމް"، 2026 ޖަނަވަރީ 01 ވަނަ ދުވަހުން ފެށިގެން 2026 އޭޕްރީލް 02 ވަނަ ދުވަހާ ހަމައަށް ކުރިއަށް ގެންދާނެ ކަމަށެވެ.
