ކުޅުދުއްފުށީގެ މަގުތަކުގައި ޓްރެފިކް ނިޝާންތައް ކުރެހުމުގެ މަސައްކަތް އާރް.ޑީ.ސީ އާ ހަވާލުކުރެވިފައިވާކަން، މެންބަރު ދާއޫދަށް އެނގިވަޑައިނުގަންނަވާ
ކުޅުދުއްފުށީގެ މަގުތައް ބެލެހެއްޓުމާއި، ޕާކިންގ ޒޯނުތައް ހެދުމުގެ މަސައްކަތް ސަރުކާރުން އާރުޑީސީއާ ހަވާލުކޮށްފައި ވަނިކޮށް، އެއީ ކައުންސިލުން ކުރަންޖެހޭ ކަމެއް ކަމަށް ވިދާޅުވެ މެންބަރު މުޙައްމަދު ދާއޫދު ދެއްކެވި ވާހަކަތަކަށް ގިނަ ބައެއްގެ ފާޑުކިޔުން ވަނީ އަމާޒުވެއްޖެ.
ކުޅުދުއްފުށީ މަގުތައް ޒަމާނީ ފެންވަރަށް ތަރައްޤީކުރުމުގެ 3 ވަނަ ފިޔަވަހީގެ މަސައްކަތް, 2 ވަނަ ފިޔަވަހީގެ މަސައްކަތް ނުނިމެނީސް ފެށުން | އާރްޑީސީ
ކުޅުދުއްފުށީގެ ޕާކިންގް ޒޯނުތަކާއި ޓްރެފިކް ނިޝާންތައް ހެދުމުގެ މަސައްކަތް ސަރުކާރުން ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ) އާ ހަވާލުކޮށްފައި ވަނިކޮށް، އެއީ ކައުންސިލުން ކުރަންޖެހޭ އަދި ނުކޮށް އޮތް ކަމެއްގެ ގޮތުގައި ކުޅުދުއްފުށި ސިޓީ އުތުރު ދާއިރާގެ މަޖިލިސް މެންބަރު މުޙައްމަދު ދާއޫދު ވިދާޅުވެއްޖެއެވެ.
މިދިޔަ ހުކުރު ދުވަހުގެ ރޭ ކުޅުދުއްފުށި ސިޓީގެ ޕީއެންސީ ޖަގަހަ މާލެ އޭރިއާ ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން މެންބަރު ދާއޫދު ވަނީ، ލާމަރުކަޒީ ޤާނޫނުން ކައުންސިލްތަކަށް މަތިކޮށްފައިވާ މުނިސިޕަލް ޚިދުމަތްތައް ކުޅުދުއްފުށީ ކައުންސިލުން ނުދޭކަމަށް ބުނެ އިތުރުފުޅުހައްދަވާފައެވެ. އެގޮތުން ރަށުގެ ޕާކިންގް ޒޯނުތައް ނުހެދޭ ކަމަށް ވިދާޅުވެ، މެންބަރު ވަނީ ކައުންސިލަށް ތުހުމަތު ކުރައްވާފައެވެ.
ނަމަވެސް، ކުޅުދުއްފުށީގެ މަގުތައް ތަރައްޤީކުރުމުގެ 2 ވަނަ ފިޔަވަހީގެ މަސައްކަތް ސަރުކާރުން ވަނީ އާރްޑީސީއާ ހަވާލުކޮށްފައެވެ. މި މަޝްރޫޢުގެ ދަށުން ކުރަންޖެހޭ މައިގަނޑު މަސައްކަތްތަކުގެ ތެރޭގައި މަގުތަކުގައި ދެކަފި ހުރަސް ކުރެހުމާއި، ސްޕީޑް ބްރޭކަރު ހަރުކުރުމާއި، މަގު ބައްތި ޖެހުމުގެ އިތުރުން ޕޭމަންޓް ހެދުމާއި ސައިން ބޯޑު ހަރުކުރުން ހިމެނެއެވެ. އަދި މަގުތަކުގައި ޕާކިންގ ޒޯނުތައް ކަނޑައަޅައި މަގުތައް ތަރުތީބުކުރުމަކީވެސް މި މަޝްރޫޢުގެ ތެރޭގައި ހިމެނޭ ކަންކަމެވެ.
މީގެ އިތުރުން، ކުޅުދުއްފުށީގެ މަގު ހެދުމުގެ ދެވަނަ ފިޔަވަހީގެ މަސައްކަތް އަދިވެސް އެއްކޮށް ނިމިފައި ނުވާކަން ފާހަގަކުރެވިފައިވާއިރު, ކަން މިހެން އޮތްއިރުވެސް, މިދިޔަ އަހަރުގެ ތެރޭގައި ސަރުކާރުން ވަނީ މި މަޝްރޫޢުގެ ތިންވަނަ ފިޔަވަހީގެ މަސައްކަތްވެސް އާރްޑީސީއާ ހަވާލުކޮށްފައެވެ.
އެހެންކަމުން، ސަރުކާރުގެ ކުންފުންޏަކާ ހަވާލުކޮށްގެން ކުރިއަށްގެންދާ މިފަދަ ބޮޑެތި މަޝްރޫޢުތަކުގެ ޒިންމާ ސިޓީ ކައުންސިލްގެ ބޮލުގައި އެޅުވުމުން، މެންބަރު ދާއޫދަށް މިކަމުގެ މަޢުލޫމާތު އޮޅިފައިވާ މިންވަރު ހާމަވެއެވެ.
މެންބަރު ދާއޫދުގެ މި ވާހަކަތަކާ ގުޅިގެން އާންމު ފަރާތްތަކުން ދަނީ ސަރުކާރުން ކުރަން ހަވާލުކޮށްފައިވާ ކަންކަން ކައުންސިލުން ނުކުރާ ކަމަށް ބުނެ, ރައްޔިތުންނަށް އޮޅުވާލަން މަސައްކަތް ކުރާތީ އެކަމާ ކަންބޮޑުވުން ފާޅުކުރަމުންނެވެ.
