ސީދާ ނަން ވިދާޅު ނުވެ، އޮބާމާގެ ފާޑު ކިޔުން ޓްރަމްޕް އަށް

އެމެރިކާގެ ރައީސް ޑޮނަލްޑް ޓްރަމްޕްގެ ސީދާ ނަން ވިދާޅު ނުވެ، އެ ޤައުމުގެ ކުރީގެ ރައީސް ބަރަކް އޮބާމާ ޓްރަމްޕް އަށް ވަރަށް ބޮޑަށް ފާޑު ވިދާޅުވެއްޖެ އެވެ. 

އެމެރިކާގެ ޝިކާގޯގައި އޮތް މަދަނީ ހައްގު ތަކަށް މަސައްްކަތް ކުރުމުގައި މަޝްހޫރުވި ލީޑަރު ރެވަރެންޑް ޖެސީ ޖެކްސަންގެ ޖަނާޒާގައި ދެއްވި ތަޤުރީރުގައި އޮބާމާ ވިދާޅުވީ، ކޮންމެ ދުވަހަކު ވެސް ހޭލަން ޖެހެނީ އެމެރިކާގެ ޑިމޮކްރަޓިކް މުއައްސަސާ ތަަކަށް އަމާޒުވާ އައު ހަމަލާ ތަކަކަށް ކަމަށެވެ. 

މި ޖަނާޒާގައި ގިނަ އަދަދެއްގެ ޢިއްޒަތްތެރިން ވަނީ ބައިވެރިވެ ވަޑައިގެންފަ އެވެ. އޭގެ ތެރޭގައި އޮބާމާގެ އިތުރުން، ކުރީގެ ރައީސް ޖޯ ބައިޑަން އާއި، ކުރީގެ ރައީސް ބިލް ކްލިންޓަން ވެސް ހިމެނި ވަޑައިގެންނެވި އެވެ. އުމުރުން 84 އަހަރުގައި ޖެކްސަން ނިޔާވެފައި ވަނީ މިދިޔަ މަހުގެ ތެރޭގަ އެވެ. އޭނާ އަކީ އެމެރިކާގައި ކަޅު ނަސްލުގެ މީހުންނަށް، ޚާއްސަކޮށް އޮބާމާ ފަދަ ބޭފުޅުންނަށް މަގު ކޮށައި ދެއްވުމުގައި މުހިންމު ދައުރެއް އަދާ ކުރެއްވި ބޭފުޅެކެވެ. 

އޮބާމާގެ ތަޤުރީރުގައި ވިދާޅުވީ، މިހާރު މިއީ އުންމީދު ކުރުން ނެތް ވަގުތެއް ކަމަށެވެ. އަދި ކޮންމެ ދުވަހަކު ވެސް ޤާނޫނީ އިސްތިޤުލާލަށް ހުރަސް އެޅޭ ކަންކަމާއި، އާންމު އަދަބު އަޚުލާޤާ ޚިލާފު ކަންކަން ފެންނަމުންދާ ކަމަށް ވިދާޅުވި އެވެ. ހަމަ އެހެންމެ، ދައުލަތުގެ މަތީ މަޤާމު ތަކުގައި ތިއްބަވާ ބޭފުޅުން، އެކަކު އެނެކަކަށް ބިރު ދެއްކުމާއި، ދެކޮޅުވެރި ކަމުގެ އަމަލުތައް ފެންނަމުންދާ ކަމަށް ވެސް އޮބާމާ ވިދާޅުވި އެވެ. 

މީގެ އިތުރުން އެމެރިކާގެ ބައެއް ރައްޔިތުންނަކީ މުހިންމު ބައެއް ކަމަށާއި، އަނެއް ބައި ރައްޔިތުންނަކީ އެއްވެސް އަގެއް ނެތް ބައެއްގެ ގޮތުގައި ސިފަ ކުރަމުންދާ ކަމަށް ވިދާޅުވެ، އޮބާމާ ވަނީ ޓްރަމްޕް އަށް ވަރަށް ބޮޑަށް ފާޑު ވިދާޅުވެފަ އެވެ. މީގެ ކުރިން ވެސް އޮބާމާ ވަނީ، ޓްރަމްޕް އާއި، އޭނާގެ ސަރުކާރުގެ ސިޔާސަތު ތަކަށް ވަރަށް ބޮޑަށް ފާޑު ވިދާޅުވެފަ އެވެ. 

އޮބާމާ ޓްރަމްޕް އަށް ފާޑު ވިދާޅުވެފައިވާއިރު، ދާދި ފަހުން ޓްރަމްޕް ވަނީ އޮބާމާ އާއި، އޭނާގެ އަނބިކަނބަލުން މިޝެލް އޮބާމާ އަށް ފުރައްސާރަ ކޮށްފަ އެވެ. އެގޮތުން އޮބާމާގެ ދެމަފިރިންގެ މޫނުގައި ރާމާ މަނުކު ކުރެހުމަށް ފަހު، ޓްރަމްޕް ވަނީ އޭނާގެ ރަސްމީ ސޯޝަލް މީޑިއާގައި ޕޯސްޓު ކުރައްވައިފަ އެވެ. އެކަމަށް އެތައް ބައެއްގެ ފާޑު ކިޔުން އަމާޒު ވުމުން، ޓްރަމްޕް ވަނީ އެ ޕޯސްޓު ޑިލީޓު ކުރައްވައިފަ އެވެ. 

އެ ޖަނާޒާގައި ވާހަކަ ދައްކަވަމުން ކުރީގެ ރައީސް ބައިޑަން ވެސް ވަނީ ޓްރަމްޕް އަށް ފާޑު ވިދާޅުވެފަ އެވެ. ބައިޑަން ވިދާޅުވީ، މިހާރު އެމެރިކާގައި އޮތް ސަރުކާރަކީ އެ ޤައުމުގެ އަގުތަކާއި އުސޫލުތައް ޤަބޫލު ކުރާ ސަރުކާރެއް ނޫން ކަމަށެވެ. އޮބާމާ އާއި ބައިޑަން ޓްރަމްޕް އަށް ފާޑު ވިދާޅުވި ނަމަވެސް، އެ ޖަނާޒާގައި ބައިވެރިވެ ވަޑައިގެންނެވި ކުރީގެ ރައީސް ބިިލް ކްލިންޓަން ޓްރަމްޕްއާ ގުޅޭ އެއްވެސް ވާހަކައެއް ދައްކަވާފައި ނުވެ އެވެ.

ޖެކްސަންގެ ޖަނާޒާގައި ޓްރަމްޕް ބައިވެރިވެ ވަޑަައިގެންފައި ނުވެ އެވެ. ނަމަވެސް، ޖެކްސަން އަވާހާރަ ވުމާ ގުޅިގެން ޓްރަމްޕް ވަނީ ސޯޝަލްމީޑިއާގައި ޕޯސްޓެއް ކުރައްވައިފަ އެވެ. އެ ޕޯސްޓުގައި ޓްރަމްޕް ވަނީ ޖެކްސަން އަށް ތައުރީފު ކުރައްވައި، އޮބާމާ އަށް ފާޑު ވިދާޅުވެފަ އެވެ. އެގޮތުން އޮބާމާ އަށް އެމެރިކާގެ ވެރި ކަަމަށް އާދެެވުނީ ޖެކްސަންގެ ވަރަށް ބޮޑު ދައުރެއް އޮވެގެން ކަަމަށާއި، ނަމަވެސް އޮބާމާ އެކަން ބަލައިގެންފައި ނުވާ ކަމަށް ޓްރަމްޕް ވިދާޅުވެފައިވެ އެވެ.