އުމުރުން 13 އަހަރުގެ އަންހެން ކުއްޖަކަށް ޓްރަމްޕް ޖިންސީ ގޯނާ ކުރި ކަމަށް ބުނާ ތުހުމަތާ އެކު، އައު ފައިލް ތަކެއް އާންމު ކޮށްފި

އެމެރިކާގެ ރައީސް ޑޮނަލްޑް ޓްރަމްޕްއާ ދެކޮޅަށް ކުރެވޭ ޖިންސީ ގޯނާގެ ތުހުމަތު ތަކެއް ހިމެނޭ އެފްބީއައިގެ ލިޔެ ކިޔުން ތަކެއް، އެމެރިކާގެ ޖަސްޓިސް ޑިޕާޓްމަންޓް އިން ބުރާސްފަތި ދުވަހު އާންމު ކޮށްފި އެވެ. 

އެ ލިޔެ ކިޔުން ތަކަކީ ކުޑަ ކުދިންނަށް ޖިންސީ ގޯނާ ކުރުމުގެ ކުށް ސާބިތުވެ، ޖަލުގައި ހުއްޓާ މަރުވި ޖެފްރީ އެޕްސްޓީންއާ ގުޅުން ހުރި ލިޔެ ކިޔުން ތަކެކެވެ. 

ޖަސްޓިސް ޑިޕާޓްމަންޓް އިން ބުނެފައި ވަނީ، އެ ލިޔެ ކިޔުން ތަކަކީ މީގެ ކުރިން އެމެރިކާގެ ކޮންގްރެސްގެ އަމުރަށް އާންމު ކުރި ފައިލް ތަކުގެ ތެރޭގައި ހިމެނެން ޖެހޭ ތަކެތި ކަމަށެވެ. ނަމަވެސް، އޭރު އެ ލިޔެ ކިޔުންތައް އާންމު ނުކުރެވި އޮތީ. އެއީ ކުރިން ވެސް ހިމެނިފައިވާ ލިޔެ ކިޔުން ތަކެއް ކަަމަށް އޮޅުމަކުން ފާހަގަ ކުރެވިފައި އޮތުމުން ކަމަށް އެ އިދާރާ އިން ބުނެފައި ވެއެވެ. މިފަހަރު އާންމު ކުރި ލިޔެ ކިޔުން ތަކުގައި ހިމެނެނީ، 2019 ވަނަ އަހަރު އެފްބީއައި އިން އަންހެނަކާ ކުރި އިންޓަވިޔުގެ ތަފްސީލް އެވެ. 

އެ އަންހެން މީހާ ތުހުމަތު ކޮށްފައިވާ ގޮތުގައި، އޭނާގެ އުމުރުން 13 އަހަރާއި 15 އަހަރާ ދެމެދުގައި އެޕްސްޓީން އަދި ޓްރަމްޕް ވެސް ވަނީ އޭނާ އަށް ޖިންސީ ގޯނާ ކޮށްފަ އެވެ. އެފްބީއައި އަށް ދީފައިވާ ބަޔާނުގައި އެ އަންހެން މީހާ ބުނެފައި ވަނީ، އެޕްސްޓީން ވަނީ އޭނާ ނިއު ޔޯކް ނުވަތަ ނިއު ޖާާޒީ އަށް ގެންގޮސް ޓްރަމްޕްއާ ބައްދަލު ކުރުވާފަ އެވެ. އަދި މި ވާހަކަތައް ސިއްރު ކުރުމަށް ބާރު އަޅައި، ފާއިތުވި އަހަރު ތަކުގައި އޭނާ އަށާއި، އޭނާގެ ގާތް މީހުންނަށް ބިރު ދެއްކުމުގެ ފޯނު ކޯލު ތަކެއް ލިބިފައިވާ ކަމަށް އެ އަންހެން މީހާ ބުންޏެވެ.

އެކަން ފާހަގަކޮށް އެ އަންހެން މީހާ ބުނެފައި ވަނީ، އެއީ އެޕްސްޓީންއާ ގުޅުން ހުރި ފޯނު ކޯލު ތަކެއް ކަމަށް ޤަބޫލު ކުރެވޭ ކަމަށެވެ. އަންހެން މީހާގެ މި ތުހުމަތު ތަކަށް ޓްރަމްޕް ވިދާޅުވެފައި ވަނީ، އެއްވެސް ގޯސް ކަމެއް ކުރައްވާފައި ނުވާނެ ކަމަށާއި، އަންހެން މީހާ އެ ހަދަނީ ދޮގު ކަމަށެވެ. ޖަސްޓިސް ޑިޕާޓްމަންޓް އިން މީގެ ކުރިން ބުނެފައި ވަނީ، އާންމު ކުރެވުނު ބައެއް ލިޔެ ކިޔުން ތަކުގައި ޓްރަމްޕްއާ ދެކޮޅަށް ހަގީގަތާ ޚިލާފު އަދި މީހުން ހައިރާން ކުރުމުގެ ނިޔަތުގައި ބައެއް ވާހަކަތައް ހިމަނާފައިވާ ކަމަށެވެ. 

އެމެރިކާގެ އިދިކޮޅު ޑިކޮމްރަޓިކް ޕާޓީ އިން ތުހުމަތު ކުރާ ގޮތުގައި، ޓްރަމްޕްގެ ސަރުކާރުން ވަނީ އެޕްސްޓީންގެ ތަހުގީގުގައި އޭނާ އަށް ނޭދެވޭ އަސަރު ކޮށްފާނެ ފަދަ މައުލޫމާތުތައް ފޮރުވުމަށް މަސައްކަތް ކޮށްފަ އެވެ. މި މައްސަލައިގައި ޖަސްޓިސް ޑިޕާޓްމަންޓް އިން އަަމަލު ކޮށްފައިވާ ގޮތާ ބެހޭ ގޮތުން ސުވާލު ކުރުމަށްޓަކައި، އެޓާނީ ޖެނަރަލް ޕޭމް ބޮންޑީ ހާޒިރު ކުރުމަށް ހައުސް ކޮމެޓީ އިން ބުދަ ދުވަހު ވަނީ ނިންމައިފަ އެވެ.