"ކަލޭމެން ޗިސްޗިސް ކޮށްލާނަން" - އެމެރިކާ އާއި އިޒްރޭލާ ގުޅިގެން މަސައްކަތް ނުކުރުމަށް އިރާގުގެ ކުރުދިސްތާނަށް އީރާނުގެ އަސްކަރިއްޔާ އިން ވަރުގަދަ އިންޒާރެއް ދީފި

އިރާގުގެ އުތުރުގައި އޮންނަ ކުރުދިސްތާނުގެ ސަރަހައްދީ ސަރުކާރުގެ އިސްވެރިން، އެމެރިކާއާއި އިޒްރޭލާ ގުޅިގެން އިސްލާމީ ޖުމްހޫރިއްޔާއާ ދެކޮޅަށް މަސައްކަތް ކުރަމުންދާނަމަ، އެކަމުގެ ނަތީޖާ ވަރަށް ހިތިވާނެ ކަމަށް ބުނެ އީރާނުގެ އަސްކަރިއްޔާގެ ޖެނެރަލް ސްޓާފްގެ ތަރުޖަމާނު ވަރުގަދަ އިންޒާރެއް ދެއްވައިފިއެވެ.

ހުކުރު ދުވަހު ޓީވީ މެދުވެރިކޮށް ދެއްވި ބަސްދީގަތުމެއްގައި ބްރިގޭޑިއާ ޖެނެރަލް އަބުލްފަޒްލް ޝެކަރްޗީ ވިދާޅުވީ، ވޮޝިންޓަނާއި ތެލް އަވީވާއެކު ކުރުދިސްތާނުގެ އިސްވެރިން ބާއްވާ ކޮންމެ ގުޅުމަކީ އޭގެ ސަބަބުން ބޮޑެތި ގެއްލުންތަކަކާ ކުރިމަތިލާންޖެހޭނެ ކަމެއް ކަމަށެވެ.

"ކަލޭމެން އެމެރިކާއާއި ޒަޔަނިސްޓް ދައުލަތާ ގުޅިގެން މަސައްކަތް ކުރާނަމަ، އަހަރެމެން ކަލޭމެން ޗިސް ކޮށްލާނަން. އަހަރެމެންގެ ފައިދަށުލައި ފިސްކޮށްލާނަން، އަދި ދުވަހަކުވެސް އަމާންކަމެއް ކަލޭމެންނަށް ނުލިބޭނެ،" ޝެކަރްޗީ ވިދާޅުވިއެވެ.

މީގެ އިތުރުން، ޓެރަރިސްޓް ޖަމާއަތްތަކުން އެ ސަރަހައްދުގެ ބިން ބޭނުންކޮށްގެން ހަރަކާތްތެރިވުމަށް ފުރުސަތު ނުދިނުމަށްވެސް ތަރުޖަމާނު އިންޒާރު ދެއްވިއެވެ.

"އިރާގުގެ އުތުރު ސަރަހައްދުގެ ވެރިން މިފަދަ ޓެރަރިސްޓް ގްރޫޕްތަކަށް މަގުފަހިކޮށްދޭނަމަ، އެ ސަރަހައްދުގެ ހުރިހާ އިންފްރާސްޓްރަކްޗާއަކާއި ވަސީލަތްތަކަށް އަހަރެމެން ހަމަލާދޭނަން. އަހަރެމެންގެ ދުޝްމަނުންނަށް އެއްވެސް ރަހުމެއް ނުކުރާނަން،" އޭނާ ވިދާޅުވިއެވެ.

'އެމެރިކާގެ އަސްކަރީ ހަތިޔާރުތައް ހުސްވަނީ'

އީރާނާ ދެކޮޅަށް ހުޅަނގު އޭޝިއާ ސަރަހައްދަށް އެމެރިކާގެ މުޅި އަސްކަރީ ބާރު ޖަމާކޮށްފައިވީ ނަމަވެސް، އެމެރިކާގެ ހަތިޔާރުގެ ރަސްމީ ރިޒާވް ވަރަށް ބޮޑަށް ހުސްވަމުންދާކަން ޝެކަރްޗީ ފާހަގަކުރެއްވިއެވެ.

"އެމީހުންގެ އަތުގައި ހުރި ހުރިހާ ހަތިޔާރެއް މިހާރު ވަނީ ޓެސްޓުކޮށްފައި. ތިންވަނަ ބޮޑު ހަނގުރާމައަކަށް ރައްކާކޮށްފައި ހުރި ހަތިޔާރުތައްވެސް މިހާރު ވަނީ ނެރެފައި. އެހެންނަމަވެސް އަދިވެސް އެމީހުންނަށް ދަނީ ހަތިޔާރުގެ ދަތިކަން ކުރިމަތިވަމުން،" އޭނާ ވިދާޅުވިއެވެ.

އެމެރިކާގެ އަސްކަރިއްޔާ މިހާރު އޮތް ބަލިކަށި ހާލަތަށް ބަލާއިރު، އެހެން ގައުމަކާއެކު އިތުރު ހަނގުރާމައަކަށް ވަދެއްޖެނަމަ ވޮޝިންޓަނަށް ބޮޑެތި ގޮންޖެހުންތަކެއް ކުރިމަތިވާނެ ކަމަށްވެސް އޭނާ ވިދާޅުވިއެވެ.

"މާދަމާވެސް އެމެރިކާ އެހެން ގައުމަކާއެކު ހަނގުރާމައަކަށް ގޮސްފިނަމަ، ސީރިއަސް ދަތިތަކަކާ ކުރިމަތިލާންޖެހޭނެ. އެއީ ލަދުވެތިކަމުން ސަލާމަތްވުމަށްޓަކައި އެމީހުންގެ ހުރިހާ ގާބިލުކަމެއް މިހާރު ވަނީ ހަނގުރާމައިގެ މައިދާނަށް ނެރެފައި. އެހެންނަމަވެސް، ނަސީބަކުން އެމީހުން މިހާރުވެސް ވަނީ ބަދުނާމުވެފައި، އަދި ކުރިއަށް އޮތް ތަނުގައި މިއަށްވުރެ ބޮޑަށް ލަދުގަންނަން ޖެހޭނެ،" ޝެކަރްޗީ ވިދާޅުވިއެވެ.

'އެމެރިކާގެ 14 އަސްކަރީ މަރުކަޒަކަށް ހަމަލާދީފި'

ޝެކަރްޗީ ވިދާޅުވި ގޮތުގައި، އީރާނުން ދިން ރައްދު ހަމަލާތަކުގައި މި ސަރަހައްދުގައި ހުރި އެމެރިކާގެ 14 އަށްވުރެ ގިނަ އަސްކަރީ މަރުކަޒަކަށް ވަނީ އަމާޒުކޮށްފައެވެ.

"މިހާތަނަށް އެމެރިކާގެ 14 އަސްކަރީ މަރުކަޒަކަށް އީރާނުން ވަނީ ހަމަލާދީފައި. އެމެރިކާއިން ބިލިއަނުން ޑޮލަރު ހޭދަކޮށްގެން ހުޅަނގު އޭޝިއާ ސަރަހައްދުގައި ބާރުގަދަކުރުމަށްޓަކައި އެންމެ ޒަމާނީ ޓެކްނޮލޮޖީއާއެކު ގާއިމުކުރި މަރުކަޒުތަކަށް މިވަނީ ހަމަލާދީފައި،" އޭނާ ވިދާޅުވިއެވެ.

މީގެ މިސާލެއްގެ ގޮތުން، ހުކުރު ދުވަހުގެ ކުރީކޮޅު ބަހުރޭންގައި ހުންނަ އެމެރިކާގެ މަރުކަޒަށް ދިން ހަމަލާ ޝެކަރްޗީ ފާހަގަކުރެއްވިއެވެ. އަދި އެ ހަމަލާގެ ތަފްސީލުތައް ވަރަށް އަވަހަށް މީޑިއާތަކުން ފެންނާނެ ކަމަށްވެސް ވިދާޅުވިއެވެ.

'ހަމަލާދިން ތަންތަން ވަނީ ސުންނާފަތިވެފައި؛ އާބާދުކުރަން އަހަރުތަކެއް ނަގާނެ'

އީރާނުގެ ރައްދު ހަމަލާތަކުގެ ވަރުގަދަކަމުން، ހަމަލާދިން މަރުކަޒުތަކުން މަރުވި މީހުންނާއި ޒަޚަމްވި އެމެރިކާ ސިފައިން ބޭރުކުރުމުގެ މަސައްކަތް އެމެރިކާއިން މެދުނުކެނޑި ކުރަންޖެހިފައިވާ ކަމަށް ތަރުޖަމާނު ވިދާޅުވިއެވެ. އަދި ބަހުރޭންގައި ހުރި އެމެރިކާގެ މަރުކަޒުތަކުން ގިނަ އަދަދެއްގެ ބަޔަކު މަރުވެފައިވާކަން އޭނާ ފާހަގަކުރެއްވިއެވެ.

އެމެރިކާގެ މަރުކަޒުތަކަށް ލިބުނު ގެއްލުންތައް މަރާމާތުކުރުމަށް އަހަރުތަކެއް ނަގާނެ ކަމަށް އޭނާ ވިދާޅުވިއެވެ.

"މި މަރުކަޒުތަކުގެ މިހާރުގެ ހާލަތަށް ބަލާއިރު، ކުރިއަށް އޮތް ފަސް އަހަރު ދުވަހުގެ ތެރޭގައިވެސް މީގެ ތެރެއިން ގިނަ ތަންތަނެއް އަލުން ބިނާއެއް ނުކުރެވޭނެ. ގިނަ ތަންތަން މިހާރު ވަނީ ކުނިގޮނޑުތަކަކަށް ވެފައި. ވޭތުވެދިޔަ 50 އަހަރަށްވުރެ ގިނަ ދުވަހު އެމެރިކާއިން ކުރި ހުރިހާ އިންވެސްޓްމަންޓެއް ވަނީ ހަލާކުވެފައި،" ޝެކަރްޗީ ވިދާޅުވިއެވެ.

'އެމެރިކާއަށް އޮތީ ދެ ގޮތެއް: ބަލިވުން ނުވަތަ އަމާންދިނުން'

އޭނާ ވިދާޅުވި ގޮތުގައި މި ހަނގުރާމައިގައި ވޮޝިންޓަނަށް މިހާރު އޮތީ ވަރަށް މަދު އިޚްތިޔާރެކެވެ.

"މި ސަބަބަށްޓަކައި، އެމެރިކާއިން ފެށި މި ހަނގުރާމައިގައި ބަލިވުން ނުވަތަ އަމާންދިނުން ނޫން އެހެން އެއްވެސް ގޮތެއް އެމެރިކާއަކަށް ނެތް. ވޭތުވެދިޔަ މަދު ދުވަސްކޮޅެއްގެ ތެރޭގައި އެމެރިކާއަށް ކުރިމަތިވި ކަންތައްތަކަކީ އެމެރިކާގެ މުޅި ތާރީޚުގައިވެސް ކުރިމަތިނުވާ ފަދަ ކަންތައްތަކެއް،" ޝެކަރްޗީ ވިދާޅުވިއެވެ.

އަދި އެމެރިކާގެ އަސްކަރިއްޔާއަކީ މިހާރު އަޒުމް ކުޑަވެފައިވާ، ވަރުބަލިވެފައިވާ ފައުޖެއްގެ ގޮތުގައި އޭނާ ސިފަކުރެއްވިއެވެ.

ސަރަހައްދީ ގައުމުތަކަށް އިންޒާރެއް

މިހާރު އޮތް ހާލަތަށް ރިއާޔަތްކޮށް، ސަރަހައްދީ ގައުމުތަކުން އެމެރިކާގެ އަސްކަރީ މަރުކަޒުތައް ބެހެއްޓުމާ މެދު އަލުން ވިސްނަންޖެހޭ ކަމަށް ޝެކަރްޗީ ވިދާޅުވިއެވެ.

"ސަރަހައްދީ ގައުމުތަކުން ދަންނަންޖެހޭ ހަގީގަތަކީ، އެމެރިކާގެ މަރުކަޒުތަކުގެ ސަބަބުން އެ ގައުމުތަކަށް ސަލާމަތާއި ރައްކާތެރިކަމުގެ ބަދަލުގައި ލިބެނީ ނާމާންކަން ކަން،" އޭނާ ވިދާޅުވިއެވެ.

އެމެރިކާއާއި އިޒްރޭލަށް އީރާނަކީ "ސީރިއަސް ނުރައްކަލެއް" ކަމުގައި ވީނަމަވެސް، ސަރަހައްދީ އެހެން ގައުމުތަކަށް އީރާނުގެ ފަރާތުން އެއްވެސް ނުރައްކަލެއް ނެތް ކަމަށް އޭނާ ވިދާޅުވިއެވެ.

"މިހާތަނަށް އަހަރެމެން ސަރަހައްދީ އެއްވެސް ގައުމަކަށް ގެއްލުމެއް ދީފައެއް ނުވާނެ، އަދި އެއްވެސް ގައުމެއްގެ މިނިވަންކަމަށް އަރައިގެންފައެއްވެސް ނުވާނެ،" ޝެކަރްޗީ ވިދާޅުވިއެވެ.

'ރައްދު ހަމަލާތައް ކޮންމެ ދުވަހަކު ވަރުގަދަވާނެ'

އެމެރިކާއާއި އިޒްރޭލުގެ އަމާޒުތަކަށް އީރާނުން ދެމުންދާ ރައްދު ހަމަލާތައް ކުރިއަށް އޮތް ތަނުގައި އިތުރަށް ވަރުގަދަކުރާނެ ކަމުގެ އިންޒާރުވެސް އޭނާ ދެއްވިއެވެ.

"އެމެރިކާއާއި ޒަޔަނިސްޓް ދައުލަތާ ދެކޮޅަށް އަހަރެމެން ދޭ ހަމަލާތައް ކޮންމެ ދުވަހަކު ދާނީ ވަރުގަދަވަމުން. އަދި އެމެރިކާއާއި ޒަޔަނިސްޓުން ހައިރާންކޮށްލާނެ ފަދަ އިތުރު ކަންތައްތަކެއް އަހަރެމެން ދައްކާލާނަން،" ތަރުޖަމާނު ވިދާޅުވިއެވެ.

'ޒަޔަނިސްޓް ދައުލަތަށް ހަމަލާދިނުމުގައި އީރާނަށް އެއްވެސް ހުރަހެއް ނެތް'

"ޒަޔަނިސްޓް ދައުލަތަށް ހަމަލާދިނުމުގައި އަހަރެމެން އެއްވެސް ހުރަހެއް ނެތް،" ޝެކަރްޗީ ވިދާޅުވިއެވެ.

"އަހަރެމެންގެ އެންމެ ޒަމާނީ ހަތިޔާރުތައް ބޭނުންކޮށް، އަހަރެމެންގެ ރައްޔިތުންނަށް އުފާވެރި ޚަބަރުތަކެއް ގެނެސްދޭނަން،" ޝެކަރްޗީ ވިދާޅުވިއެވެ. އަދި ދުޝްމަނުންނަށް ލިބެމުންދާ އިންސާނީ އަދި މާއްދީ ގެއްލުންތައް ފޮރުވުމަށް ކިތަންމެ ވަރަކަށް މަސައްކަތް ކުރި ނަމަވެސް، އެކަން ފޮރުވައި ނުބޭއްވޭނެ ކަމަށް އޭނާ ފާހަގަކުރެއްވިއެވެ.

ހޯރްމޫޒް ކަނޑުއޮޅިއާ މެދު ގެންގުޅޭ ސިޔާސަތު

މީގެ އިތުރުން، ވޮޝިންޓަނާއި ތެލް އަވީވާއާ ގުޅުންހުރި އުޅަނދުތައް ފިޔަވައި، ހޯރްމޫޒް ކަނޑުއޮޅިން ދަތުރުކުރާ އެހެން އެއްވެސް އުޅަނދަކަށް އީރާނުން ހުރަސް އަޅާފައި ނުވާނެ ކަމަށް ތަރުޖަމާނު ވިދާޅުވިއެވެ.

ނަމަވެސް، އެމެރިކާއާއި އިޒްރޭލާ ގުޅުންހުރި އުޅަނދުތަކަށް "ޔަގީނުންވެސް ހަމަލާދޭނެ" ކަމަށް އޭނާ ބާރުއަޅުއްވައި ވިދާޅުވިއެވެ.

ޝެކަރްޗީ މިހެން ވިދާޅުވެފައިވަނީ، އެމެރިކާއާއި އިޒްރޭލުން އީރާނުގެ ބިމަށް ދޭންފެށި އާ ހަމަލާތަކަށް ހަފުތާއެއްވެސް ނުވަނީހެވެ.

އެ ހަމަލާތަކާ ގުޅިގެން، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ދަނީ އެމެރިކާއާއި އިޒްރޭލުގެ މުހިންމު އަމާޒުތަކަށް ވަރުގަދަ ރައްދު ހަމަލާތަކެއް ދެމުންނެވެ.

"އޮޕަރޭޝަން ޓްރޫ ޕްރޮމިސް 4" ގެ ނަމުގައި ދެމުންދާ މި ހަމަލާތަކުގައި، ތެލް އަވީވާއި އިޒްރޭލުން ހިފާފައިވާ ގުދުސްގެ އެތެރޭގެ ސަރަހައްދުތަކަށް ވަނީ ހަމަލާދީފައެވެ. މީގެ އިތުރުން، އީރާނުގެ އައްސޭރިފަށާ އެތައް ސަތޭކަ ކިލޯމީޓަރެއް ދުރުގައި އިންޑިއާ ކަނޑުގައި ދަތުރުކުރަމުންދިޔަ އެމެރިކާގެ މަތިންދާބޯޓު އުފުލާ މަނަވަރު "އަބްރަހަމް ލިންކަން" އަދި އެމެރިކާގެ ޑިސްޓްރޯޔަރަކަށްވެސް ވަނީ ހަމަލާދީފައެވެ.