އީރާނުން އާ ޖީލުގެ މިސައިލްތަކުން އިޒްރޭލަށާއި އެމެރިކާ އާ ގުޅުން ހުރި ތަންތަނަށް ވަރުގަދަ ހަމަލާތަކެއް ދީފި

އޮޕަރޭޝަން ޓްރޫ ޕްރޮމިސް 4 ގެ އެންމެ ފަހުގެ ހަމަލާތަކުގައި އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން އާ ޖީލުގެ މިސައިލްތައް ބޭނުންކޮށްގެން ވަރުގަދަ ހަމަލާތަކެއް ދޭން ފަށައިފިއެވެ. އައި.އާރް.ޖީ.ސީ އިން ހާމަކޮށްފައިވާ ގޮތުގައި، މި އޮޕަރޭޝަނުގެ 23 ވަނަ ފިޔަވަހީގެ ދަށުން އިޒްރޭލުން ހިފާފައިވާ ސަރަހައްދުތަކަށާއި ސަރަހައްދީ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް އާ ޖީލުގެ މިސައިލް ސިސްޓަމްތަކުން ވަނީ ވަރުގަދަ ހަމަލާތަކެއް ދީފައެވެ.

ހުކުރު ދުވަހު އައި.އާރް.ޖީ.ސީ ގެ ޕަބްލިކް ރިލޭޝަންސް އޮފީހުން ނެރުނު ބަޔާނެއްގައި ބުނެފައިވަނީ، ހުކުރު ދުވަހުގެ ކުރީކޮޅު ކުރިއަށް ގެންދިޔަ މި އޮޕަރޭޝަނަކީ ޑްރޯން އާއި މިސައިލް އެކުލެވޭ ގޮތަށް ދިން ވަރުގަދަ ހަމަލާތަކެއް ކަމަށެވެ.

އެ ބަޔާނުގައި ވާގޮތުން، މި ފަހަރުގެ ހަމަލާތަކުގައި ބޭނުންކޮށްފައިވަނީ އެއްފަހަރާ ގިނަ އަމާޒުތަކަކަށް ހަމަލާދިނުމުގެ ގާބިލުކަން ލިބިފައިވާ އެންމެ ޒަމާނީ މިސައިލް ސިސްޓަމްތަކެވެ.

"މި ފިޔަވަހީގައި، އާ ޖީލުގެ ސޮލިޑް-ފިއުލް އަދި ލިކުއިޑް-ފިއުލް މިސައިލްތައް ބޭނުންކޮށްގެން، އިޒްރޭލުން ހިފާފައިވާ ސަރަހައްދުތަކަށާއި މި ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް ވަނީ އަމާޒުކޮށްފައި،" އައި.އާރް.ޖީ.ސީ އިން ބުނެފައިވެއެވެ.

އައި.އާރް.ޖީ.ސީ ގެ ބަޔާނުގައި އިތުރަށް ބުނެފައިވަނީ، މި ސަރަހައްދުގެ އެކި ގައުމުތަކުގައި ގާއިމުކޮށްފައިވާ އެމެރިކާގެ އަސްކަރީ މަރުކަޒުތަކަށް މިސައިލް ހަމަލާތައް އަރާފައިވާ ކަމަށެވެ.

ބަހްރޭން، ކުވެއިތު އަދި އުރުދުންގައި ހުރި އެމެރިކާގެ މަރުކަޒުތަކަށް އިޝާރާތްކޮށް އެ ބަޔާނުގައި ބުނެފައިވަނީ، "ޝެއިޚް އީސާ، ޖުފެއިރު، އަލީ އަލް-ސާލިމް އަދި އަލް-އަޒްރަގް ބޭސްގައި ތިބި އެމެރިކާގެ ޓެރަރިސްޓް ފައުޖުތަކުގެ ހެޑްކުއާޓަރުތަކަކީ މި ފަހަރުގެ ހަމަލާތަކުގައި ސީދާ އަމާޒުވި ތަންތަން" ކަމަށެވެ.

މީގެ އިތުރުން، އިޒްރޭލުން ހިފާފައިވާ ސަރަހައްދުތަކުގެ އެތެރޭގެ މުހިންމު ތަންތަނަށްވެސް ހަމަލާދީފައިވާ ކަމަށް އައި.އާރް.ޖީ.ސީ އިން ވަނީ ކަށަވަރުކޮށްދީފައެވެ.

އިޒްރޭލުގެ ޓެކްނޮލޮޖީގެ މަރުކަޒެއްގެ ގޮތުގައި ބެލެވޭ ބީރުޝީބާ ސަރަހައްދަށް ދިން ހަމަލާތަކާ ގުޅޭގޮތުން އެ އިދާރާއިން ބުނީ، "ހިފާފައިވާ ސަރަހައްދުތަކުގެ މުހިންމު އަދި ނާޒުކު ސަރަހައްދެއް ކަމަށްވާ ބީރުޝީބާގައި ހުރި އެންމެ ފަހުގެ ޓެކްނޮލޮޖީ ސެންޓަރުތަކާއި، ސައިބަރ ސެކިއުރިޓީ ވަސީލަތްތަކުގެ އިތުރުން އަސްކަރީ އެހީތެރިކަން ފޯރުކޮށްދޭ މަރުކަޒުތަކަށް" ކާމިޔާބު ހަމަލާތަކެއް ދީފައިވާ ކަމަށެވެ.

އިރާނުގެ ހަމަލާތައް ބަލިކަށިވަމުންދާ ކަމަށް ބުނެ ހަދަނީ ދޮގު

ހުކުރު ދުވަހުގެ ކުރީކޮޅު އައި.އާރް.ޖީ.ސީ އިން ވަނީ އޮޕަރޭޝަން ޓްރޫ ޕްރޮމިސް 4 ގެ އިތުރު ފިޔަވައްސެއް ފަށާފައިވާކަން އިއުލާނުކޮށް، އީރާނުގެ ވަރުގަދަ މިސައިލް މަރުކަޒުތަކުން އެއްވެސް ހުރަހެއް ނެތް ގޮތުގައި މިސައިލްތައް ފޮނުވާލާފައިވާ ކަމަށް ބުނެފައެވެ.

މި އޮޕަރޭޝަނުގެ ކުރީގެ ފިޔަވަހިތަކާ ގުޅޭގޮތުން އައި.އާރް.ޖީ.ސީ އިން ބުނީ، އީރާނުގެ ދިފާއީ ގާބިލުކަން ދަށްވަމުންދާ ކަމަށް ނުވަތަ މިސައިލާއި ޑްރޯން އޮޕަރޭޝަންތައް ބަލިކަށިވަމުންދާ ކަމަށް ބުނެ ދުނިޔޭގެ ބާރުތަކުން ފަތުރަމުންދިޔަ ދޮގު ޕްރޮޕެގެންޑާތައް މި ހަމަލާތަކާއެކު މުގުރާލާފައިވާ ކަމަށެވެ.

އައި.އާރް.ޖީ.ސީ އިން ހާމަކުރި ގޮތުގައި، މި އޮޕަރޭޝަނުގައި ޚުއްރަމްޝަހަރު-4، ޚައިބަރު އަދި ފައްތާހު ފަދަ އެންމެ ޒަމާނީ މިސައިލް ސިސްޓަމްތައް ވަނީ ބޭނުންކޮށްފައެވެ. މި ބަޔާނުގައިވާ ގޮތުން، މިސައިލްތަކުގެ މި ހަމަލާތައް އަމާޒުވެފައިވަނީ އިޒްރޭލުން ހިފާފައިވާ ސަރަހައްދުތަކަށާއި، އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށެވެ.

މި ހަމަލާތައް ދީފައިވަނީ އެމެރިކާ އާއި އިޒްރޭލުން ގުޅިގެން އީރާނުގެ ބިމަށް އަމާޒުކޮށް، އެއްވެސް އުދުވާނަކާ ނުލައި ދޭން ފެށި ހަމަލާތަކަށް ހަފުތާއެއްވެސް ނުވަނީހެވެ.

އެމެރިކާ އާއި އިޒްރޭލުގެ އުދުވާނާއެކު ވަގުތުން ފެށި އައި.އާރް.ޖީ.ސީ ގެ މި އޮޕަރޭޝަނުގައި، އެމެރިކާ އާއި އިޒްރޭލުގެ ސްޓްރެޓެޖިކް އަދި ނާޒުކު ގިނަ ތަންތަނަކަށް ވަނީ ހަމަލާދީފައެވެ.

މި ހަމަލާތައް ތެލް އަވީވްގެ އެތެރެއަށާއި މުގައްދަސް ގުދުސްގެ ސަރަހައްދުތަކަށް އަމާޒުވެފައިވާއިރު، އީރާނުގެ އައްސޭރިފަށާ އެތައް ސަތޭކަ ކިލޯމީޓަރެއް ދުރުގައި އިންޑިއާ ކަނޑުގައި ދަތުރުކުރަމުންދިޔަ އެމެރިކާގެ މަތިންދާބޯޓު އުފުލާ މަނަވަރު "އަބްރަހަމް ލިންކަން" އަދި އެމެރިކާގެ ޑިސްޓްރޯޔަރަކަށް ވެސް ވަނީ ހަމަލާދީފައެވެ.