ޝަރުތަކާ ނުލައި އީރާން އިން އަމާން ނުދެނީސް، އެއްވެސް ވާހަކައެއް ނުދައްކާނަން: ޓްރަމްޕް

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގައި، އެއްވެސް ޝަރުތެއް ނެތި އީރާން އިން އަމާން ނުދޭ ހިނދެއްގައި، އެއްވެސް ވާހަކައެއް އެ ޤައުމާ އެކު ނުދައްކާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ހުކުރު ދުވަހު ޓްރަމްޕް މިހެން ވިދާޅުވެފައި ވަނީ، އޭނާގެ ޓުރުތު ސޯޝަލް މީޑިއާގައި ކުރެއްވި ޕޯސްޓެއްގަ އެވެ. އެގޮތުން ޓްރަމްޕް ވިދާޅުވީ އީރާން އިން އަމާންދީ، އެ ޤައުމަށް އެންމެ އެކަށީގެންވާ ރަނގަޅު ލީޑަރަކު ނުވަތަ، ލީޑަރުން ތަކެއް އައްޔަން ކުރުމާ އެކު، އީރާން ހަލާކުގެ ތެރެއިން ސަލާމަތް ކުރުމަށް އެމެރިކާ އާއި، އެމެރިކާގެ ބައިވެރިން ގުޅިގެން ބުރަ މަސައްކަތް ތަކެއް ކުރާނެ ކަމަށެވެ. 

މީގެ އިތުރުން އީރާންގެ އިޤްތިޞާދު ކުރިއެރުވުމަށް ޓަކައި އެމެރިކާ އިން އެހީތެރިކަން ފޯރުކޮށްދޭނެ ކަމަށް ވެސް ޓްރަމްޕް ވިދާޅުވެފައިވެ އެވެ. ޓްރަމްޕް މިހެން ވިދާޅުވެފައިވާއިރު، މީގެ ކުރިން އޭނާ ވިދާޅުވެފައި ވަނީ އީރާންގެ އައު ލީޑަރު ކަނޑަ އެޅުމުގެ މަރުހަލާގައި ވެސް އޭނާގެ ބައިވެރިވުން އޮންނަން ޖެހޭނެ ކަމަށެވެ. 

ބުރާސްފަތި ދުވަހު ރޮއިޓާސް ނޫހަށް ފޯނުން ދެއްވި އިންޓަވިޔުއެއްގައި ޓްރަމްޕް ވަނީ، އެކަން ހާމަ ކުރައްވައިފަ އެވެ. އެކަމުގައި އެމެރިކާގެ ބައިވެރިވުން އޮންނަން ޖެހޭނެ ކަމަށް ޓްރަމްޕް ވިދާޅުވީއިރު، އީރާންގެ އެންމެ މަތީ ވެރިޔާގެ މަގާމަށް ދެން ވަޑައިގަންނަވާނީ އެ ޤައުމުގެ ކުރީގެ ރޫހާނީ ލީޑަރު އާޔަތުﷲ އަލީ ޚާމަނާއީގެ ދަރިކަލުން، މުޖުތަބާ ޚާމަނާއީ ކަމަށް ބެލެވިފައިވެ އެވެ. 

އެމެރިކާ އާއި އިޒްރޭލް އިން އީރާން އަށް ދޭން ފެށި ހަމަލާ ތަކުގައި ޚާމަނާއީ އަވަހާރަ ކޮށްލާފައިވާއިރު، މެދު އިރުމަތީގެ މަސްރަހު ވަނީ ވަރަށް ބޮޑު ނުތަނަވަސް ކަމެއްގެ ތެރޭގަ އެވެ. އެއާ އެކު، އީރާންގެ ސަރުކާރު ބަދަލުކޮށް، އެމެރިކާ އިން ބޭނުންވާ ސަރުކާރެއް އެ ޤައުމުގައި ޤާއިމު ކުރުމަށް މަސައްކަތް ކުރަމުންދާކަން ޓްރަމްޕްގެ ވާހަކަ ތަކުން ދޭހަވެ އެވެ.