އީރާން އަށް އަމާޒުކޮށް، އިޒްރޭލް އިން އައު ހަމަލާ ތަކެއް ދީފި

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމައިގައި، އިޒްރޭލް އިން ހުކުރު ދުވަހު ވެސް އައު ހަމަލާ ތަކެއް ދީފައިވާ ކަމަށް ރިޕޯޓު ކޮށްފި އެވެ. 

މީޑިއާ ތަކުގައި ބުނެފައިވާ ގޮތުން، ހުކުރު ދުވަހު އިޒްރޭލް އިން ހަމަލާ ދީފައި ވަނީ އީރާންގެ ވެރި ރަށް ތެހެރާން އަށް އަމާޒުކޮށެވެ. އެ ސަަރަހައްދުގައި ބާރު ގަދަ ގޮވުން ތަކެއްގެ އަޑު އިވިފައިވާ ކަމަށް ވެސް ވަނީ ރިޕޯޓު ކޮށްފަ އެވެ. 

މިދިޔަ ހޮނިހިރު ދުވަހު އެމެރިކާ އާއި އިޒްރޭލް އިން ދޭން ފެށި ހަމަލާތަކަށް ހަފުތާއެއް ވާން ކައިރިވެފައިވާއިރު، ހަމަލާ ތަކުގެ ސަބަބުން ބޮޑު ނުތަނަވަސްކަމެއް އުފެދި، އީރާންގެ ރައްޔިތުންނަށް ވަނީ ގިނަ އަސަރު ތަކެއް ކޮށްފަ އެވެ. ހުކުރު ދުވަހުގެ ހަމަލާތައް އިޒްރޭލް އިން އަމާޒުކޮށްފައި ވަނީ ތެހެރާންގައި ހުރި މުހިންމު އިންފްރާސްޓްރަކްޗާ އަށް ކަމަށް ބުނެފައިވެ އެވެ.

އެމެރިކާ އާއި އިޒްރޭލްއާ ދެކޮޅަށް އީރާން އިން ވެސް ގެންދަނީ ވަރުގަދަ ހަމަލާ ތަކެއް ދެމުންނެވެ. އެގޮތުން އީރާން އިން ގެންދަނީ މެދު އިރުމަތީގެ ސަރަހައްދުގައި ހުރި އެމެރިކާގެ އަސްކަރީ ބޭސް ތަކުގެ އިތުރުން، އެމްބަސީ ތަކަށް ވެސް ހަމަލާ ދެމުންނެވެ. އެންމެ ފަހުން ޤަތަރުން ބުނެފައި ވަނީ، އެ ޤައުމުގައި ހުރި އެމެރިކާގެ ބޭސް އަށް އަމާޒުކޮށް ދިން ހަމަލާ ހުއްޓުވާފައިވާ ކަމަށެވެ.