އިރާނުން މިހާތަނަށް ބޭނުންކުރީ ޒަމާންވީ މިސައިލް، ފަހުގެ މިސައިލްތައް ބަހައްޓާފައި ހުރީ ދިގު ދެމިގެންދާ ހަނގުރާމަ އަކަށް ތައްޔާރުވާން، ހަތިޔާރު ފަރުމާކޮށް އުފެއްދުމުގެ މަސައްކަތް މިހާރުވެސް ކުރިއަށްދޭ: އައިއާރުޖީސީ

އިރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން "އޮޕަރޭޝަން ޓްރޫ ޕްރޮމިސް 4" ގެ 22 ވަނަ ހަމަލާގެ ސިލްސިލާ ފަށައި، އިޒްރޭލުން ހިފާފައިވާ ފަލަސްތީނުގެ ބިންތަކުގެ މެދުތެރެއަށް އަމާޒުކޮށް "ޚައްރަމްޝަހަރު 4"، "ޚައިބަރު" އަދި "ފައްތާހު" މަރުކާގެ މިސައިލްތަކުން ވަރުގަދަ ހަމަލާތަކެއް ދީފިއެވެ. އިރާނުގެ އިސް އޮފިޝަލަކު ހާމަކުރެއްވި ގޮތުގައި، މިހާތަނަށް އެ ގައުމުން ބޭނުންކޮށްފައިވަނީ މީގެ ދިހަވަރަކަށް އަހަރު ކުރީގެ މިސައިލްތަކެވެ. އަދި ދިގުދެމިގެންދާ ހަނގުރާމައަކަށް ތައްޔާރުވުމުގެ ގޮތުން އެންމެ ޒަމާނީ ހަތިޔާރުތައް ބޭނުންކުރުމަށް އިރާނުން ދަނީ ތައްޔާރުވަމުންނެވެ.

ތަސްނީމް ނިއުސް އެޖެންސީން ރިޕޯޓްކޮށްފައިވާ ގޮތުގައި، އައިއާރުޖީސީގެ ޕަބްލިކް ރިލޭޝަންސް ޑިޕާޓްމަންޓުން ބުނީ މި އޮޕަރޭޝަން ފަށާފައިވަނީ ހުކުރު ދުވަހުގެ މެންދުރުފަހު "ޔާ ހުސައިން އިބްން އަލީ (އޭއެސް)" ގެ ކޯޑް ނަމުގެ ދަށުންނެވެ.

މި ހަމަލާތަކުގައި ޕާޝިއަން ގަލްފުން ފެށިގެން ތަލް އަވީވްއާ ހަމައަށް ހުރި އެމެރިކާ އާއި ޒަޔަނިސްޓް އިޒްރޭލުގެ މަގާމުތަކަށް "ޚައިބަރު"، "ޚައްރަމްޝަހަރު 4" އަދި "ފައްތާހު" މަރުކާގެ މިސައިލްތަކުން ހަމަލާދީފައިވެއެވެ. މިއީ އިރާނުގެ މިނާބް ސްކޫލުގައި ކުޑަކުދިން މަރާލި ގާތިލުންގެ ކިބައިން ބަދަލުހިފުމުގެ ގޮތުން ދިން ހަމަލާތަކެއް ކަމަށް އައިއާރުޖީސީގެ ބަޔާނުގައިވެއެވެ.

އެ ބަޔާނުގައި އިތުރަށް ބުނެފައިވަނީ، ފޮނުވާލި މިސައިލްތަކުގެ ތެރޭގައި ދެ ޓަނުގެ ގޮވާތަކެތި އުފުލުމުގެ ގާބިލުކަން ހުރި، އަދި އަޑަށްވުރެ 14 ގުނަ ބާރަށް ދަތުރުކުރާ "ޚައްރަމްޝަހަރު 4" މަރުކާގެ ވަރުގަދަ މިސައިލްތައް ހިމެނޭ ކަމަށެވެ. މި މިސައިލްތައް އަމާޒުކޮށްފައިވަނީ އިރާނުގެ ރައްޔިތުންގެ ދުޝްމަނުންގެ މަގާމުތަކަށެވެ.

ޕާޝިއަން ގަލްފުގެ ގައުމުތަކުގައި ހުރި އެމެރިކާ އާއި އިޒްރޭލުގެ އަސްކަރީ މަރުކަޒުތަކަށާއި، ތެލް އަވީވް، ބެން ގުރިއަން އެއާޕޯޓް އަދި ހައިފާގައި ހުރި އަސްކަރީ މަރުކަޒުތަކަށް އައު ޖީލުގެ މިސައިލްތަކުން ހަމަލާދީފައިވާ ކަމަށްވެސް އެ ބަޔާނުގައި ބުނެފައިވެއެވެ.

ހަނގުރާމައިގެ ހަތްވަނަ ދުވަހު އައިއާރުޖީސީގެ މިސައިލް މަރުކަޒުތަކުން މެދުނުކެނޑި މިސައިލްތައް ފޮނުވައި، މި އޮޕަރޭޝަން ކާމިޔާބުކަމާއެކު ކުރިއަށް ގެންދިއުމަކީ، އިރާނުގެ ދިފާއީ ގާބިލުކަން ދަށްވެ، މިސައިލާއި ޑްރޯން ހަމަލާތައް މަދުވެފައިވާ ކަމަށް ބުނެ ހުޅަނގުގެ މީޑިއާތަކުން ފަތުރަމުންދާ ދޮގު ވާހަކަތަކަށް ދެވުނު ރައްދެއް ކަމަށްވެސް ބަޔާނުގައިވެއެވެ.

ފާސް ނިއުސް އެޖެންސީއަށް މައުލޫމާތު ދެއްވަމުން އައިއާރުޖީސީގެ އިސް އޮފިޝަލަކު ވިދާޅުވީ، ވޭތުވެދިޔަ ހަތް ދުވަހު ބޭނުންކުރި ގިނަ މިސައިލްތަކަކީ 2012 އާއި 2014 އާ ދެމެދު އުފައްދާފައިވާ ހަތިޔާރު ކަމަށެވެ.

"ހަނގުރާމަ ދިގުލައިގެން ހިނގައިދާނެ ކަމަށް ބަލައި، މިހާތަނަށް ދިން ހަމަލާތަކުގައި މައިގަނޑު ގޮތެއްގައި ބޭނުންކޮށްފައިވަނީ 2012، 2013 އަދި 2014 ވަނަ އަހަރުގެ މިސައިލްތައް. ވަރަށް މަދު ހާލަތެއްގައި ނޫނީ އިރާނުން އަދި އައު ޖީލުގެ މިސައިލްތަކެއް ބޭނުން ނުކުރޭ،" އެ އޮފިޝަލް ވިދާޅުވިއެވެ.

އެ އޮފިޝަލް އިތުރަށް ވިދާޅުވީ އިރާނުގެ ދިފާއީ ސިނާއަތުގެ އުފެއްދުންތެރިކަން މެދުނުކެނޑި ކުރިއަށްދާ ކަމަށާއި، އެކި ބާވަތުގެ މިސައިލް ސިސްޓަމްތައް ފަރުމާކުރުމާއި އެސެމްބްލް ކުރުމުގެ މަސައްކަތް ހުއްޓުމެއް ނެތި ކުރިއަށްދާ ކަމަށެވެ.

"ކުރިއަށް އޮތް ދުވަސްތަކުގައި ހަމަލާދޭނެ އައު ގޮތްތަކެއް ފެނިގެންދާނެ. އޭގެ ތެރޭގައި މިހާތަނަށް މަދުން ބޭނުންކޮށްފައިވާ އެންމެ ޒަމާނީ ދުރު ރާސްތާ މިސައިލްތައް ބޭނުންކުރުން ހިމެނޭ،" އޭނާ ވިދާޅުވިއެވެ.

އައިއާރުޖީސީގެ ތަރުޖަމާނު ބްރިގޭޑިއާ ޖެނެރަލް އަލީ މުހައްމަދު ނާއިނީ ހުކުރު ދުވަހު ވިދާޅުވީ، އިރާނަށް ހަމަލާދިން ފަރާތްތަކަށް އަދަބު ދެވެންދެން ދިގުދެމިގެންދާ ހަނގުރާމައަކަށް އިރާން އޮތީ ތައްޔާރަށް ކަމަށެވެ.

"ކޮންމެ ހަމަލާއެއްގެ ސިލްސިލާއަކާއެކު ދުޝްމަނުންނަށް ވޭންދެނިވި ހަމަލާތަކަކަށް އިންތިޒާރު ކުރަން ޖެހޭނެ،" ނާއިނީ ވިދާޅުވިއެވެ.

އޭނާ ފާހަގަކުރެއްވި ގޮތުގައި އިރާނުގެ އައު އީޖާދުތަކާއި އައު ހަތިޔާރުތައް ބޭނުންކުރަން ފަށާނެއެވެ. އަދި މިހާތަނަށް އިރާނުގެ އަތުގައި ހުރި ހަތިޔާރުގެ ބޮޑުބައެއް އަދި ބޭނުންކޮށްފައި ނުވާކަމަށްވެސް އޭނާ ވިދާޅުވިއެވެ.

އެމެރިކާ އާއި އިޒްރޭލުން އިރާނަށް އެއްވެސް އުދުވާނަކާ ނުލައި ހަމަލާދިންތާ އަށް މަސް ފަހުން، ފެބްރުއަރީ 28 ވަނަ ދުވަހު އަނެއްކާވެސް ވަނީ އިރާނަށް ވައިގެ މަގުން އައު ހަމަލާތަކެއް ދޭން ފަށާފައެވެ.

މީގެ ރައްދުގައި އިރާނުން ދަނީ އިޒްރޭލުން ހިފާފައިވާ ބިންތަކަށާއި ސަރަހައްދީ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް މިސައިލާއި ޑްރޯން ބޭނުންކޮށްގެން ވަރުގަދަ ހަމަލާތަކެއް ދެމުންނެވެ.

އައިއާރުޖީސީގެ ބަޔާނުގައި ފާހަގަކޮށްފައިވާ "ޚައްރަމްޝަހަރު 4"، "ޚައިބަރު" އަދި "ފައްތާހު" މިސައިލްތަކަކީ އިރާނުގެ އެންމެ ފަހުގެ އަސްކަރީ އުފެއްދުންތަކެވެ. މީގެ ތެރެއިން 2023 ވަނަ އަހަރު ދައްކާލި "ފައްތާހު" މިސައިލަކީ ދިފާއީ ނިޒާމުތަކަށް އޮޅުވާލައި، އަމާޒު ބަދަލުކޮށްލުމުގެ ގާބިލުކަން ހުރި ހައިޕަސޮނިކް މިސައިލެކެވެ.