ސަންޑަލޭންޑް ބަލިކޮށް، ލިވަޕޫލް އަށް ހަމަ ނޭވާއެއް
މެޗުން މޮޅުވެ ލިވަޕޫލް އޮތީ ލީގު ތާވަލްގެ ހަ ވަނަ މަގާމުގައި. އެއީ މިހާތަނަށް ލީގުގައި ކުޅެފައިވާ 26 މެޗުން 42 ޕޮއިންޓާ އެކު. ހަމަ އެ އަދަދަށް މެޗު ކުޅެގެން 44 ޕޮއިންޓާ އެކު ފަސް ވަނައިގައި އޮތީ ޗެލްސީ.
މެޗުގައި ލަނޑު ޖެހުމަށް ފަހު ލިވަޕޫލްގެ ކެޕްޓަން ވެން ޑައިކް އަދި އެހެން ކުޅުންތެރިން އުފާ ފާޅު ކުރަނީ | ރޮއިޓާސް
އިނގިރޭސި ޕްރިމިއަރ ލީގުގައި ސަންޑަލޭންޑްއާ ދެކޮޅަށް ކުޅުނު މެޗުން މޮޅުވެ، ޕްރެޝަރަށް ވެއްޓިފައި އޮތް ލިވަޕޫލް އިން ހަމަ ޖެހުމެއް ހޯދައިފި އެވެ.
މި ސީޒަންގެ ލިވަޕޫލްގެ ނަތީޖާތައް އިންތިހާާ އަށް ދަށްވެފައިވާއިރު، ލީގުގެ ގަދަ ހަތަރަކުން ޖާގަ ކަށަވަރު ކުރުމަށް އެ ޓީމުން ވަނީ ގިނަ މަސައްކަތް ތަކެއް ކުރަން ޖެހިފަ އެވެ. ސަންޑަލޭންޑް މެޗުގެ ކުރިން އޮތް ނޫސްވެރިންގެ ބައްދަލުވުމުގައި ލިވަޕޫލްގެ ކޯޗު އާން ސްލޮޓް ބުނެފައި ވަނީ، ޔުއެފާ ޗެމްޕިއަންސް ލީގުން ޖާގަ ނުލިބިއްޖެ ނަމަ، މިއީ ލިވަޕޫލް އަށް ދަށް ސީޒަނަކަށް ވާނެ ކަމަށް ވެސް އޭނާ ބުންޏެވެ.
ސަންޑަލޭންޑްއާ ދެކޮޅަށް ކުޅުނު މެޗުގައި ލިވަޕޫލް އަށް ވަނީ ލަނޑު ޖަހަން ފުރުސަތު ތަކެއް ލިބިފަ އެވެ. މެޗުގެ ފުރަތަމަ ހާފުގައި ލިވަޕޫލްގެ ފްލޯރިއަން ވާޓްޒް އަށް ލަނޑު ޖަހާނެ ފުރުސަތު ތަކެއް ލިބުނުއިރު، އޭނާ ފޮނުވާލި އެއް ހަމަލާ އަމާޒުވީ ގޯލުގެ ދަނޑިއާ އެވެ. މެޗުގައި ލިވަޕޫލް އިން ލަނޑު ޖެހީ ދެ ވަނަ ހާފުގެ 61 ވަނަ މިނެޓުގަ އެވެ. މިޞްރުގެ ފޯވާޑު މުޙައްމަދު ޞަލާޙު ތަނަވަސްކޮށްދިން ފުރުސަތެއްގައި އެ ލަނޑު ޖެހީ ކެޕްޓަން ވާޖިލް ވެން ޑައިކް އެވެ. މެޗުގައި ޞަލާޙު އަށް ވެސް ވަނީ ލަނޑު ޖަހަން ފުރުސަތު ލިބިފަ އެވެ.
މެޗުން މޮޅުވެ ލިވަޕޫލް އޮތީ ލީގު ތާވަލްގެ ހަ ވަނަ މަގާމުގަ އެވެ. އެއީ މިހާތަނަށް ލީގުގައި ކުޅެފައިވާ 26 މެޗުން 42 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން 44 ޕޮއިންޓާ އެކު ފަސް ވަނައިގައި އޮތީ ޗެލްސީ އެވެ. މި ސީޒަންގެ ލީގުގައި އަށް މެޗަކުން ލިވަޕޫލް ބަލިވެފައިވާއިރު، ސްލޮޓް އަށް އަންނަނީ ޕްރެޝަރު ބޮޑު ވަމުންނެވެ.
