ކުވައިތުގެ އަލީ އަލް ސާލިމް އެއާ ބޭސް އަށް ވަރުގަދަ މިސައިލް ހަމަލާތަކެއް އީރާނުން ދީފި
އީރާނުން ގަލްފުގެ ގައުމުތަކަށް އަމާޒުކޮށް ވަރުގަދަ މިސައިލް އަދި ޑްރޯން ހަމަލާތަކެއް ދޭން ފަށާފައިވާއިރު، ސައުދީ އަރަބިއްޔާ، ގަތަރު އަދި ކުވައިތުން ވަނީ ގިނަ ހަމަލާތަކެއް ނާކާމިޔާބުކޮށްލާފައި ކަމަށް ބުނޭ. އެމެރިކާ އާއި އިޒްރޭލުން އީރާނަށް ދިން ހަމަލާތަކުގެ ބަދަލުހިފުމަށް ދޭ މި ހަމަލާތަކާ ގުޅިގެން ސަރަހައްދީ ސަލާމަތީ ނުރައްކާ ބޮޑުވެ، ޔޫއޭއީގައި ހުރި އީރާނުގެ މުދަލާއި ފައިސާ ފްރީޒްކުރުމަށް އެ ގައުމުން ދަނީ ތައްޔާރުވަމުން. މި ހަމަލާތަކުގެ ސަބަބުން ބައެއް ގައުމުތަކުގައި ރައްކާތެރިކަމުގެ ފިޔަވަޅުތައް ވަރުގަދަކޮށް، އާންމުން ގޭގައި މަޑުކުރުމަށް ވަނީ އަންގާފައި.
ކުވޭތުގެ އަލީ އަލް ސާލިމް އެއާ ބޭސްއަށް 2012 ވަނަ އަހަރުގެ ޑިސެމްބަރު މަހުގެ 12 ވަނަ ދުވަހު ކުރެއްވި ޒިޔާރަތެއްގައި، އެމެރިކާގެ ޑިފެންސް ސެކްރެޓަރީ ލިއޯން ޕެނެޓާ އެ ގައުމުގެ ސިފައިންނާ މުޚާތަބު ކުރައްވަނީ. | ގެޓީ އިމޭޖަސް
ކުވައިތުގެ އެކި ސަރަހައްދުތަކުގައި ބާރުގަދަ ގޮވުންތަކެއްގެ އަޑު އިވުމާއެކު، ވައިގެ ހަމަލާތަކުން ރައްކާތެރިވުމަށް އަންގައިދޭ އިންޒާރުގެ ސައިރަންގެ އަޑު މުޅި ގައުމުގައި އިވެން ފަށައިފި ކަމަށް އަލްޖަޒީރާ އެރަބިކްއާ ހަވާލާދީ ރިޕޯޓްތައް ބުނެފިއެވެ.
ރިޕޯޓުތައް ބުނާ ގޮތުގައި ބުދަ ދުވަހުގެ ރޭ ދިން މި ހަމަލާތައް އަމާޒުވެފައިވަނީ ކުވެއިތުގެ އަލީ އަލް ސާލިމް އެއަރބޭސް އަށެވެ.
އަނެއްކޮޅުން ގަތަރާއި ޔުނައިޓެޑް އެރަބް އެމިރޭޓްސް (ޔޫއޭއީ) ހިމެނޭހެން ގަލްފުގެ ސަރަހައްދުތަކަށް އީރާނުން ދެމުންދާ ހަމަލާތަކުގެ އިތުރު ރިޕޯޓްތައް ލިބެމުންދާއިރު، މީގެ ތެރެއިން ގިނަ ހަމަލާތަކެއް އެ ގައުމުތަކުގެ އެއާ ޑިފެންސް ސިސްޓަމްތަކުން ވަނީ ހުއްޓުވާފައެވެ.
މި ހަމަލާތަކަކީ މުޅި ގަލްފު ސަރަހައްދަށް އަމާޒުކޮށްގެން އީރާނުން ކުރިއަށްގެންދާ ފުޅާ ކެމްޕޭނެއްގެ ބައެއް ކަމަށް ބެލެވެއެވެ.
ސައުދީ އަރަބިއްޔާގެ ޕްރިންސް ސުލްތާން އެއާ ބޭސްއަށް އަމާޒުކޮށް ފޮނުވާލި ބެލިސްޓިކް ތިން މިސައިލެއް އެ ގައުމުގެ އެއާ ޑިފެންސް ފޯސްއިން ހުއްޓުވާފައިވާ ކަމަށް ސައުދީ ޑިފެންސް މިނިސްޓްރީން ވަނީ ބުނެފައެވެ. މިއީ ފާއިތުވި ދެ ދުވަހުގެ ތެރޭގައި އެ އެއާ ބޭސްއަށް އަމާޒުކޮށް ދިން މިފަދަ ދެވަނަ ހަމަލާއެވެ.
ބަހްރޭންގެ ވެރިރަށް މަނާމާގައި ހުރި ދެ ހޮޓަލަކަށާއި މީހުން ދިރިއުޅޭ އިމާރާތަކަށް ހަމަލާތަކެއް އަމާޒުވެފައިވާ ކަމަށް މީގެ ކުރިން ވަނީ ރިޕޯޓްކޮށްފައެވެ. ނަމަވެސް އެ ހާދިސާގައި އެއްވެސް މީހަކަށް އަނިޔާވި ކަމުގެ ރިޕޯޓެއް އަދި ލިބިފައެއް ނުވެއެވެ.
ކުވައިތުގެ އަސްކަރިއްޔާއިން ބުނި ގޮތުގައި ރޭގަނޑުގެ ވަގުތެއްގައި އެ ގައުމަށް އަމާޒުކޮށް މިސައިލާއި ޑްރޯން ހަމަލާތަކެއް ވަނީ ފޮނުވާލާފައެވެ. ކުވައިތު ސިޓީގެ ދެކުނުގައި އޮންނަ އެއާ ބޭސްއެއްގެ ކައިރީގައި އެއްޗެއް ގޮވައި އަލިފާން ރޯވެފައިވާ މަންޒަރު ފެންނަ ވީޑިއޯތަކެއް ސޯޝަލް މީޑިއާގައި ދަނީ ދައުރުވަމުންނެވެ.
މީގެ އިތުރުން، ސަލާމަތީ ސަބަބުތަކަށްޓަކައި ކުވައިތުގައި ހުންނަ އެމެރިކާގެ އެމްބަސީގެ ހިދުމަތްތައް ވަގުތީ ގޮތުން މެދުކަނޑާލާފައިވާކަން އެ އެމްބަސީން ވަނީ އިއުލާނުކޮށްފައެވެ.
ގަތަރުގެ އޮފިޝަލުން ވިދާޅުވި ގޮތުގައި އެ ގައުމުގެ އެއާ ޑިފެންސް ސިސްޓަމްތަކުން ވަނީ 13 މިސައިލެއް ހުއްޓުވާފައެވެ. ނަމަވެސް އެއް މިސައިލް ވަނީ ގަތަރުގެ ކަނޑުގެ ސަރަހައްދަށް ވެއްޓިފައެވެ.
ސަލާމަތީ ނުރައްކަލުގެ ދަރަޖަ މަތިކޮށްފައިވާތީ، ގަތަރުގެ ކަމާބެހޭ އިދާރާތަކުން ވަނީ ރައްކާތެރިކަމުގެ އިންޒާރު ނެރެފައެވެ.
އެ އިންޒާރުގައި ބުނެފައިވަނީ "ހުރިހާ އެންމެންވެސް ގޭތެރޭގައި މަޑުކުރުމަށާއި، ބޭރަށް ނުނިކުތުމަށާއި، ކުޑަދޮރުތަކާއި ހާމައަށް ހުރި ސަރަހައްދުތަކާ ދުރުގައި ތިބުމަށް" އިލްތިމާސްކުރާ ކަމަށެވެ.
ގަތަރުގެ ވެރިރަށް ދޯހާގައި ދިރިއުޅޭ މީހުންނަށްވެސް ބާރުގަދަ ގޮވުންތަކެއްގެ އަޑު އިވިފައިވާ ކަމަށް ރިޕޯޓްތައް ބުނެއެވެ. ސައުދީ އަރަބިއްޔާގެ ޑިފެންސް މިނިސްޓްރީގެ ރަސްމީ ތަރުޖަމާނު ވަނީ އެ ގައުމަށް އަމާޒުކޮށް ދިން ގިނަ މިސައިލް ހަމަލާތަކެއް ކާމިޔާބުކަމާއެކު ހުއްޓުވާފައިވާކަން ހާމަކުރައްވާފައެވެ.
އެކްސް މެދުވެރިކޮށް އާންމުކުރި ބަޔާނެއްގައިވާ ގޮތުން، ސައުދީގެ ޕްރިންސް ސުލްތާން އެއާ ބޭސްއަށް އަމާޒުކޮށް ފޮނުވާލި ބެލިސްޓިކް ތިން މިސައިލެއް ސައުދީ އެއާ ޑިފެންސް ފޯސްއިން ވަނީ ވައިގެ ތެރޭގައި ގޮއްވާލާފައެވެ.
ވޯލް ސްޓްރީޓް ޖާނަލްއިން ރިޕޯޓްކޮށްފައިވާ ގޮތުގައި، ޔުނައިޓެޑް އެރަބް އެމިރޭޓްސް (ޔޫއޭއީ) ގައި ހުރި އީރާނުގެ އެތައް ބިލިއަން ޑޮލަރެއްގެ މުދަލާއި ފައިސާ ފްރީޒް ކުރުމަށް އެ ގައުމުން ދަނީ ވިސްނަމުންނެވެ.
އެ ރިޕޯޓުގައި ބުނެފައިވާ ގޮތުން، އީރާނުގެ "ޝެޑޯ ފައިނޭންސިންގް ނެޓްވޯކް" ތަކާ ދެކޮޅަށް އަޅާ މިފަދަ ފިޔަވަޅެއްގެ ސަބަބުން، އީރާނަށް ބޭރު ފައިސާ ލިބުމަށް ހުރި މަގުތައް ބަންދުވެގެންދާނެއެވެ.
އީރާނުން ސަރަހައްދީ ގައުމުތަކަށާއި ޔޫއޭއީއަށް ތަކުރާރުކޮށް ހަމަލާދޭން ފަށާފައިވަނީ، މިދިޔަ ހޮނިހިރު ދުވަހު އެމެރިކާއާއި އިޒްރޭލު ގުޅިގެން އީރާނާ ދެކޮޅަށް ފެށި ހަނގުރާމައިގެ ބަދަލުހިފުމުގެ ގޮތުންނެވެ. އެ ހަނގުރާމައިގައި އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީގެ އިތުރުން ސަރުކާރުގެ އިސް އޮފިޝަލުންނާއި އެތައް ސަތޭކަ އާންމުންނެއް ވަނީ މަރުވެފައެވެ.
