ހަނގުރާމަ ބަހަނާއަކަށް ދައްކައިގެން ސަރުކާރުން ނުހައްގު ފައިދާ ލައިގެން ރައްޔިތުންނަށް ތެޔޮ ވިއްކަން ފަށައިފި: އަބްދުﷲ ޝާހިދު

އީރާނާ ދެކޮޅަށް އެމެރިކާ އާއި އިޒްރޭލުން ކުރަމުންދާ ހަނގުރާމަ ބަހަނާއަކަށް ދައްކައިގެން މިސަރުކާރުން ނުހައްގު ފައިދާ ލައިގެން ރައްޔިތުންނަށް ތެޠޮ ވިއްކަމުންދާކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ. 

ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ އިންތިހާބާއި އަދި ރިޔާސީ އިންތިހާބާއި މަޖިލިސް އިންތިހާބު އެއްކޮށްލައި އެއްތާރީހެއްގައި ބޭއްވުމަށް ނަގާ ފެންނަ ނުފެންނަ ވޯޓުގެ ކެމްޕޭނަށް އެމްޑީޕީގެ ލީޑަރޝިޕް އިން އަތޮޅުތެރެއަށް ކުރާ ދަތުރުގެ ތެރެއިން ށ ފޯކައިދޫގައި ބޭއްވި ޖަލްސާއެއްގައި ވާހަކަދައްކަވަމުން ޝާހިދު ވިދާޅުވީ، ސަރުކާރުން ރައްޔިތުންނަށް ހިޔާނަތްތެރިވެފައިވާކަމަށާއި ހަނގުރާމަ ބަހަނާއެއްގެ ގޮތުގައި ދައްކައިގެން ރައީސް ޑރ. މުޢިއްޒު ގެ ސަރުކާރުން ތެލުން ނުހައްގު ފައިދާ ނަގަމުންދާ ކަމަށެވެ. އަދި އަގު ހެޔޮކޮށް ގަންނަ ތެޔޮ ރައްޔިތުންނަށް ވިއްކަންޖެހޭނީ ހަމަ އަގުގައި ހެޔޮކޮށް ކަމަށް ޝާހިދު ވިދާޅުވި އެވެ. 

ތެލުގެ އަގު ބޮޑުވެފައިވާ މިންވަރު ފާހަގަކުރައްވާ ޝާހިދު ވިދާޅުވީ، މިހާރު އަގު ބޮޑުކޮށް ވިއްކާ ތެލަކީ އަގުބޮޑުކޮށް ގެނައި ތެޔޮތޯ، ނުވަތަ ކުރީގެ އަގުގައި ރާއްޖެ ގެނެސްފައިވާ ތެޔޮކަން ރައްޔިތުންނަށް ސާފުކޮށްދޭންޖެހޭ ކަމަށެވެ. 

ރައްޔިތުންނަށް ތެޔޮ ވިއްކަންޖެހޭނީ އަގުބޮޑުކޮށް ގަންނަ ތެޔޮ އަގުބޮޑުކޮށް، އަގު ހެޔޮކޮށް ގަންނަ ތެޔޮ ވިއްކަންޖެހޭނީ އޭރު ވެސް ވިއްކަމުން އައި އަގުގަ. މިވަރުގެ ބޮޑު ހިޔާނާތެއް ރައްޔިތުންނަށް ވެގެން ނުވާނެ، އެނގޭ އެއްޗަކީ މިސަރުކާރުން ބޭނުންވަނީ ސަރުކާރުން ބޭނުންވާ ކޮންމެ ދަނޑިވަޅެއްގާ ކޮންމެ ބަހަނާއެއް ދައްކާފަވެސް ރައްޔިތު މީހާ ކަރަށް ފައިން އަރާ ދަމާގަންނަން. އެއްވެސް އިހްލާސްތެރިކަމެއް ނެތް. އެއްވެސް އިހްލާސްތެރިކަމެއް މިސަރުކާރުގެ ނެތީ. 

އެމްޑީޕީގެ ރައީސް އަބްދުﷲ ޝާހިދު 

މީގެ އިތުރުން ޝާހިދު ވިދާޅުވީ، ރައީސް މުޢިއްޒު ތެލުގެ ސްޓޮކް ހުރިކަމަށް ވިދާޅުވީ ކަމަށާއި އެހެން ކަމަށް ވާނަމަ އަގު ބޮޑުކޮށް މިހާރު ވިއްކަމުން އެދަނީ އަގު ހެޔޮކޮށް ލިބުނު ތެލުގެ ސްޓޮކް ކަމަށެވެ. އަދި އެކަމުންވެސް ހާމަވަނީ ސަރުކާރުން ރައްޔިތުންނަށް ހިޔާނަތްތެރިވަމުންދާ މިންވަރުކަމަށް ޝާހިދު ވިދާޅުވި އެވެ. 

ފާހަގަކޮށްލެވޭ ގޮތުގައި އަގުހެޔޮ ތެލުގެ އައު ޝިޕްމަންޓެއް ރާއްޖެއަށް ދަތުރުކުރަމުންދާ ކަމަށް ރައީސް.ޑރ މުހައްމަދު މުއިއްޒު ސަރުކާރުގެ އިކޮނޮމިކް މިނިސްޓަރު މުހައްމަދު ސައީދު ވިދާޅުވިތާ 24 ގަޑިއިރު ހަމަނުވަނީސް އެސްޓީއޯ އިން ވިއްކާ ޑީސަލާއި ޕެޓްރޯލްގެ އަގު ވަނީ ބޮޑުކޮށްފަ އެވެ.