އީރާނުން އެމެރިކާގެ އެފް-15 ހަނގުރާމަމަތީ ޖެޓެއް ވައްޓާލައިފި

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) ގެ ވައިގެ ދިފާއީ ނިޒާމުން އެމެރިކާގެ އެފް-15 އީ ސްޓްރައިކް އީގަލް މަލްޓި-ރޯލް ފައިޓަރު ޖެޓެއް ވައްޓާލައިފިއެވެ.

އީރާނުގެ ވައިގެ ދިފާއީ ނިޒާމުން އެމެރިކާގެ މި އެންމެ ޒަމާނީ ހަނގުރާމަމަތީ ޖެޓަށް އަމާޒުކޮށް ހަމަލާދީ ވައްޓާލާފައިވާކަން އައި.އާރް.ޖީ.ސީ ގެ ޕަބްލިކް ރިލޭޝަންސް ގޮފިން ބުރާސްފަތި ދުވަހު ނެރުނު ބަޔާނެއްގައި ވަނީ ކަށަވަރުކޮށްދީފައެވެ.

އެ ބަޔާނުގައި ބުނެފައިވާ ގޮތުގައި، އައި.އާރް.ޖީ.ސީ ގެ ޒަމާނީ އެއިރޯސްޕޭސް ޑިފެންސް ސިސްޓަމްތަކުން މި ޖެޓަށް އަމާޒުކޮށް ހަމަލާދީފައިވަނީ ބުދަ ދުވަހުގެ ހެނދުނުގެ ވަގުތެއްގައި، އެ ގައުމުގެ ހުޅަނގު ދެކުނު ބޯޑަރު ސަރަހައްދުންނެވެ.

އީރާނުގެ ވައިގެ ސަރަހައްދުގެ ތެރެއިން އެމެރިކާގެ ކުރިއަރާފައިވާ ހަނގުރާމަމަތީ ޖެޓެއް ވައްޓާލާފައިވާ ކަމަށް އިޒްރޭލުގެ ބައެއް މީޑިއާތަކުން މީގެ ކުރިން ވަނީ ރިޕޯޓުކޮށްފައެވެ.

މި ހާދިސާގައި ޖެޓް ދުއްވަން އިން ޕައިލެޓަށް ވީގޮތެއް މިހާތަނަށް އެނގިފައެއް ނުވެއެވެ.

މި ހަމަލާ ދީފައިވަނީ އެމެރިކާ އާއި އިޒްރޭލު ގުޅިގެން އިސްލާމީ ޖުމްހޫރިއްޔާ އީރާނާ ދެކޮޅަށް ފަށާފައިވާ އުދުވާނީ ހަނގުރާމަ ކުރިއަށްދާ ދަނޑިވަޅެއްގައެވެ. މި ހަނގުރާމައިގައި މިހާތަނަށް 1،000 އަށްވުރެ ގިނަ މީހުން މަރުވެފައިވާއިރު، އޭގެ ތެރޭގައި ގިނައީ އާންމު ރައްޔިތުންނެވެ.

"ޓްރޫ ޕްރޮމިސް 4" ގެ ނަމުގައި އީރާނުން ދެމުންދާ ބަދަލުހިފުމުގެ ހަމަލާތަކުގައި، އިޒްރޭލުން ހިފާފައިވާ ފަލަސްތީނުގެ ބިންތަކުގައި ހުރި އިޒްރޭލުގެ އަސްކަރީ އަދި ޖާސޫސީ މަރުކަޒުތަކުގެ އިތުރުން، މުޅި ހުޅަނގު އޭޝިއާ ސަރަހައްދުގައި ފެތުރިފައިވާ އެމެރިކާގެ އަސްކަރީ މަރުކަޒުތަކަށް ވެސް ދަނީ އަމާޒުކުރަމުންނެވެ.

އީރާނުގެ ހަމަލާތަކުގައި މަރުވި އެމެރިކާ ސިފައިންގެ ހަގީގީ އަދަދު ހާމަކުރުމަށް އެމެރިކާ ސަރުކާރުން ދަނީ ދެކޮޅު ހަދަމުންނެވެ. ނަމަވެސް، އީރާނުގެ ސަލާމަތީ ކަންކަމާބެހޭ އިސް އޮފިޝަލް އަލީ ލަރީޖާނީ ބުދަ ދުވަހު ވިދާޅުވީ، މަޖުބޫރުވެގެން ފަށަންޖެހުނު މި ހަނގުރާމައިގެ ފުރަތަމަ މަދު ދުވަސްކޮޅުގެ ތެރޭގައި އެމެރިކާގެ 500 އަށްވުރެ ގިނަ ސިފައިން މަރުވެފައިވާ ކަމަށެވެ.

އެމެރިކާ އާއި އިޒްރޭލު ގުޅިގެން މިދިޔަ ހޮނިހިރު ދުވަހު އެއްވެސް އިންޒާރަކާ ނުލައި އީރާނަށް ދޭން ފެށި ހަމަލާތަކުގައި، އީރާނުގެ ރޫހާނީ ލީޑަރު އާޔަތުﷲ ސައްޔިދު އަލީ ޚާމަނާއީގެ އިތުރުން އަސްކަރިއްޔާގެ ބައެއް އިސް ކޮމާންޑަރުން ވަނީ އަވަހާރަކޮށްލާފައެވެ.

އީރާނުގެ ލީޑަޝިޕުން ވަނީ މި އުދުވާނަށް ހަރުކަށިކަމާއެކު ފުރިހަމަ ބަދަލުހިފާނެ ކަމަށް ވައުދުވެފައެވެ.

މި ހަފުތާގެ ކުރީކޮޅު ކުވެއިތު ބޯޑަރު ކައިރިން އެމެރިކާގެ އިތުރު ބައެއް ހަނގުރާމަމަތީ ޖެޓުތައް ވައްޓާލާފައިވާއިރު، އެފް-15 އީ ސްޓްރައިކް އީގަލް ޖެޓަކީ އެންމެ ފަހުން ވައްޓާލި ޖެޓެވެ.

މީގެ އިތުރުން، ވޭތުވެދިޔަ ފަސް ދުވަހުގެ ތެރޭގައި އިޒްރޭލު އަސްކަރިއްޔާގެ "ހާމީސް" މަރުކާގެ ގިނަ އަދަދެއްގެ ޑްރޯން ވެސް ވަނީ ވައްޓާލާފައެވެ.