"ޔާ މުއިއްޒުލް މުއުމިނީން" ނަމުގައި އިޒްރޭލުގެ ދިފާއީ ނިޒާމު ފޫދުއްވާލުމަށް ފަހު އިރާނުން އިޒްރޭލަށް ވަރުގަދަ ހަމަލާތަކެއް ދީފި

އިރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) ގެ އެއަރޯސްޕޭސް ފޯސްތަކުން ހުކުރު ދުވަހުގެ ފަތިހުގެ ވަގުތެއްގައި "އޮޕަރޭޝަން ޓްރޫ ޕްރޮމިސް 4" ގެ 21 ވަނަ ބުރުގެ ހަމަލާތައް ފަށައިފިއެވެ.

މި ހަމަލާތަކުގައި ގިނަ އަދަދެއްގެ ސުއިސައިޑް ޑްރޯންތަކާއި، ކްލަސްޓާ ވޯހެޑް ނުވަތަ ގޮވާތަކެތި ގިނަ އަދަދަކަށް ހިމެނޭހެން ފަރުމާކޮށްފައިވާ ކުރިއަރާފައިވާ "ޚައިބަރު" މިސައިލްތައް ބޭނުންކޮށްފައިވެއެވެ. މި ހަމަލާތަކުގެ މަގްސަދަކީ ޒަޔަނިސްޓް އިޒްރޭލުގެ ވަރުގަދަ ވައިގެ ދިފާއީ ނިޒާމުތަކަށް ނުކަތާވަރަށް ހަމަލާތައް އަމާޒުކޮށް، އެ ނިޒާމުތައް ފޫއަޅުވާލުމެވެ.

އީރާނުން ކުރިއަށް ގެންދިޔަ ވަރުގަދަ އަސްކަރީ އޮޕަރޭޝަނަށް ދީފައިވާ ކޯޑް ނަމަކީ "ޔާ މުއިއްޒުލް މުއުމިނީން" އެވެ.

ތެލް އަވީވްގެ މެދުތެރެއިން ލިބިފައިވާ ވީޑިއޯ ފްޓޭޖްތަކުން ކަށަވަރުވާ ގޮތުގައި، މި ހަމަލާތަކުގައި ބޭނުންކުރި ޚައިބަރު މިސައިލްތަކުގައި ވަނީ "ސަބް-މިއުނީޝަން" ނިޒާމު ނުވަތަ އެއް މިސައިލަކުން ގިނަ ގޮވާތަކެތި ބޭރުވާ ނިޒާމު ބޭނުންކޮށްފައެވެ.

މި މިސައިލްތައް އަމާޒުތަކަށް ވެއްޓެމުންދިޔަ ވަގުތު، އެ މިސައިލްތައް އެތައް ބައިތަކަކަށް ބައިވެ، ބާރުމިނުގައި ދަތުރުކުރާ ކުދި ގިނަ ވޯހެޑްތަކަކަށް ބަދަލުވިއެވެ. މީގެ ސަބަބުން އިޒްރޭލުން ފަޚުރުވެރިވާ "އަޔަން ޑޯމް" އާއި "ޑޭވިޑްސް ސްލިންގް" ފަދަ މިސައިލް އިންޓަރސެޕްޓަރުތަކަށް އެ ހަމަލާތައް ހުއްޓުވުމުގައި އެއްވެސް ކާމިޔާބީއެއް ނުލިބި، އެ ނިޒާމުތައް ވަނީ ބޭކާރުވެފައެވެ.

މަންޒަރު ދުށް މީހުންގެ ބަޔާންތަކާއި، ހާރެޓްޒް ފަދަ ބައިނަލްއަގުވާމީ މީޑިއާ ރިޕޯޓްތަކުން ކަށަވަރުވާ ގޮތުގައި، ތެލް އަވީވްގެ މެދުތެރޭގެ އިމާރާތްތަކަށް ވަނީ ބޮޑެތި ގެއްލުންތަކެއް ލިބިފައެވެ. އޭއެފްޕީން ރިޕޯޓްކޮށްފައިވާ ގޮތުގައި، މުޅި ސިޓީ ގުޑައިގެންދާ ފަދަ ވަރުގަދަ ދެ ގޮވުމެއް އެއްވަގުތެއްގައި ކަހަލަ ގޮތަކަށް އިވިފައިވާ ކަމަށް ރިޕޯޓު ކޮށްފައިވެއެވެ.

މި ހަމަލާތަކުގެ ކުރިން، ޚާތަމް އަލް-އަންބިޔާ ސެންޓްރަލް ހެޑްކުއާޓާސްގެ ތަރުޖަމާނު ލެފްޓިނަންޓް ކާނަލް އިބްރާހިމް ޒުލްފަގާރީ ވަނީ މި އޮޕަރޭޝަންގެ ފުޅާ މިނާ ގުޅޭ ތަފްސީލުތައް ހާމަކުރައްވާފައެވެ.

އޭނާ ވިދާޅުވި ގޮތުގައި، މިހާތަނަށް ކުރިއަށްގެންދިޔަ ހަމަލާގެ 20 ބުރުގައި 2,000 އަށްވުރެ ގިނަ ޑްރޯންއާއި 600 އަށްވުރެ ގިނަ މިސައިލް ވަނީ ފޮނުވާލާފައެވެ.