"ނަރަކަވަންތަވެރިންނަށް އީރާނަކުން ޖާގައެއް ނެތް" އެއްގަމު މަގުން ހަމަލާދީފިނަމަ ނުރައްކާތެރި ނަތީޖާއަކާ ކުރިމަތިލާންޖެހޭނެ: އީރާނުގެ ސަލާމަތީ އިސްވެރިޔާ

އީރާނުގެ ބިމަކީ "ނަރަކަވަންތަވެރިންނަށް" އޮތް ތަނެއް ނޫން ކަމަށް ވިދާޅުވެ، އެ ގައުމުގެ ސުޕްރީމް ނޭޝަނަލް ސެކިއުރިޓީ ކައުންސިލް (އެސް.އެން.އެސް.ސީ) ގެ ސެކްރެޓަރީ އަލީ ލާރިޖާނީ ވަރުގަދަ އިންޒާރެއް ދެއްވައިފިއެވެ. ލާރިޖާނީ ވިދާޅުވީ، އެއްވެސް ވިސްނުމެއް ނެތި އީރާނުގެ ބިމުގައި ފައި އަޅައިފިނަމަ، ދުޝްމަނުންގެ އެތައް ހާސް ސިފައިންނެއް މަރާލައި ނުވަތަ ހައްޔަރުކުރާނެ ކަމުގެ ފުރިހަމަ ޔަގީންކަން އީރާނުގެ އަސްކަރިއްޔާއަށް އެބައޮތް ކަމަށެވެ.

އެމެރިކާ އާއި އިޒްރޭލުގެ އަސްކަރީ ކޯލިޝަނަކުން އެއްވެސް އުސޫލެއް ނެތި އީރާނާ ދެކޮޅަށް އުދުވާނީ ހަނގުރާމައެއް ފެށިތާ ފަސް ދުވަސް ފަހުން، ބުރާސްފަތި ދުވަހު އެކްސްގައި ކުރެއްވި ޕޯސްޓެއްގައި ލާރިޖާނީ ވިދާޅުވީ، އެތައް ހާސް ސިފައިންނާއެކު އެއްގަމު މަގުން އީރާނުގެ ސަރަހައްދަށް ވަނުމަށް ގަސްދުކުރާ ކަމަށް އެމެރިކާގެ ބައެއް އޮފިޝަލުން ވިދާޅުވެފައިވާ ކަމަށެވެ.

އީރާނުގެ ސަލާމަތީ އިސްވެރިޔާ އިތުރަށް ވިދާޅުވީ، އިމާމް ޚުމައިނީ އާއި އިމާމް ޚާމަނާއީގެ ހިތްވަރުގަދަ ދަރިން ތިބީ ދުޝްމަނުންގެ އިންތިޒާރުގައި ކަމަށާއި، އެމެރިކާގެ ކޮރަޕްޓް އޮފިޝަލުންގެ އަބުރު ދުއްވާލައި، އެމީހުންގެ އެތައް ހާސް ސިފައިންނެއް މަރާލައި އަދި ހައްޔަރުކުރުމަށް އީރާނުން އޮތީ ތައްޔާރަށް ކަމަށެވެ. އަދި އީރާނުގެ މުގައްދަސް ބިމަކީ ނަރަކަވަންތަވެރިންނަށް އޮތް ތަނެއް ނޫންކަން އޭނާ ފާހަގަކުރެއްވިއެވެ.

އެމެރިކާގެ ނަން ހާމަނުކުރާ އޮފިޝަލަކާ ހަވާލާދީ އެކްސިއޯސް ނޫހުން މީގެ ކުރިން ރިޕޯޓްކޮށްފައިވާ ގޮތުގައި، އީރާނުގެ އެތެރޭގައި އެއްގަމު މަގުން ހަމަލާދިނުމަށްޓަކައި ހަތިޔާރު އެޅި ކުރުދީ ހަނގުރާމަވެރިންނަށް އެހީތެރިކަން ފޯރުކޮށްދިނުމުގެ ހުށަހެޅުމަކީ އެމެރިކާގެ ސީ.އައި.އޭ އާއި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ހުށަހެޅުއްވި ކަމެކެވެ. އަދި ފަހުން އެމެރިކާގެ އިންޓެލިޖެންސް އިދާރާތަކުން ވަނީ މިކަން ކަށަވަރުކޮށްދީފައެވެ.

ވޭތުވެދިޔަ ހޮނިހިރު ދުވަހު އީރާނާ ދެކޮޅަށް ފެށި މި އުދުވާނުގައި މިހާތަނަށް އީރާނުގެ 1,200 އަށްވުރެ ގިނަ ރައްޔިތުން ވަނީ ޝަހީދުވެފައެވެ. މީގެ ތެރޭގައި ގިނައީ އާންމު ރައްޔިތުންނާއި ސްކޫލް ކުދިންކަން ފާހަގަކުރެވެއެވެ.

އެއްވެސް އުސޫލެއް ނެތި ގާނޫނާ ޚިލާފަށް ދެމުންދާ މި ހަމަލާތަކުގައި، އިސްލާމީ އިންގިލާބުގެ ރޫހާނީ ލީޑަރު އާޔަތުﷲ ސައްޔިދު އަލީ ޚާމަނާއީ އާއި އީރާނުގެ އަސްކަރިއްޔާގެ ބައެއް އިސް ކޮމާންޑަރުން ވެސް ވަނީ ޝަހީދުވެފައެވެ.

މި ހަމަލާތަކުގެ ރައްދުގައި، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އާއި އީރާނުގެ އަސްކަރިއްޔާއިން ވަނީ ސަރަހައްދީ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށާއި، އިޒްރޭލުން ހިފާފައިވާ ފަލަސްތީނުގެ ބިންތަކުގައި ހުރި އަމާޒުތަކަށް ގިނަ އަދަދެއްގެ މިސައިލް ހަމަލާތަކެއް ދީފައެވެ.

މީގެ އިތުރުން، އިރާގުގެ ބޯޑަރު ސަރަހައްދުތަކުގައި ހަރަކާތްތެރިވާ ޓެރަރިސްޓް ޖަމާއަތްތަކުގެ މަރުކަޒުތަކަށް ހަމަލާދީ އެ ތަންތަން ސުންނާފަތިކޮށްލާފައިވާ ކަމަށް ބުރާސްފަތި ދުވަހުގެ ކުރީކޮޅު އީރާނުގެ ހަތިޔާރު އެޅި ބާރުތަކުން ވަނީ އިއުލާނުކޮށްފައެވެ.