ބްރޯޑްކާސްޓިންގ ކޮމިޝަނަށް ލިބެންޖެހޭ 30 މިލިއަނަށް ވުރެ ގިނަ ރުފިޔާ ހޯދަން މަސައްކަތް ކޮށްފަ އެއް ނެތް: އޮޑިޓް
އެންމެ ގިނައިން ނުދައްކާ ހުރީ ރީބްރޯޑްކާސްޓިންގ ލައިސަންސް ފީ އާއި ފްރީކުއެންސީ ލައިސަންސް ފީ ގެ ގޮތުގައި ދައްކަން ޖެހޭ ފައިސާއާއި ޖުރިމަނާތައް. ލިބެންޖެހޭ ފައިސާގެ ތެރެއިން 18.7 މިލިއަން ރުފިޔާ 3 އަހަރަށްވުރެ ގިނަ ދުވަސްވެފައިވާކަން ރިޕޯޓުގައި ފާހަގަކޮށްފައިވޭ.
ބްރޯޑްކޮމްގެ ކުރީގެ ރައީސާ ސަފާ ޝަފީގް
2023 ވަނަ އަހަރުގެ ނިޔަލަށް ބްރޯޑްކާސްޓިން ކޮމިޝަނަށް ލިބެން ޖެހޭ 30 މިލިއަނަށް ވުރެ ގިނަ ރުފިޔާ ހޯދަން އެކަށީގެންވާ މަސައްކަތްތަކެއް އެ ކޮމިޝަނުން ކޮށްފައި ނުވާ ކަމަށް އޮޑިޓަރ ޖެނެރަލް ހާމާ ކޮށްފި އެވެ.
މިހާރު އުވިފައިވާ މޯލްޑިވްސް ބްރޯޑްކާސްޓިންގ ކޮމިޝަން (ބްރޯޑްކޮމް) ގެ 2023 ވަނަ އަހަރުގެ ކޮމްޕްލަޔަންސް އޮޑިޓް ގައި އޮޑިޓަރ ޖެނެރަލް ވިދާޅުވެފައި ވަނީ ބްރޯޑްކޮމް އަށް ފައިސާގެ ގޮތުގައި ލިބެންޖެހޭ 30،578،453ރ. (ތިރީސް މިލިއަން ފަސް ސަތޭކަ ހަތްދިހަ އަށް ހާސް ހަތަރު ސަތޭކަ ފަންސާސް ތިން ރުފިޔާ) ހުރި ކަމަށެވެ. އެހެން ނަމަވެސް މި ފައިސާ ހޯދުމަށް މާލިއްޔަތުގެ ގަވައިދު އަދި ބްރޯޑްކާސްޓް ކުރުމުގެ ގަވައިދާ އެއް ގޮތައް ފިޔަވަޅުތައް އަޅާފައި ނުވާ ކަމަށެވެ.
އޮޑިޓް ރިޕޯޓުގައި ބުނެފައި ވަނީ ކޮމިޝަނަށް ލިބެން ޖެހޭ ފައިސާ ހޯދުމަށް އެ ފަރާތްތަކަށް ނޯޓިސް ފޮނުވުން ނޫން އިތުރު ފިޔަވަޅެއް އަޅާފައި ނުވާ ކަމަށެވެ.
އޮޑިޓް ރިޕޯޓުގައި ވާ ގޮތުން އެންމެ ގިނައިން ނުދައްކާ ހުރީ ރީބްރޯޑްކާސްޓިންގ ލައިސަންސް ފީ ގެ ގޮތުގައި ދައްކަން ޖެހޭ ފައިސާ އެވެ. އެ ގޮތުން 8 މިލިއަން ރުފިޔާ ނުދައްކާ ހުރި އިރު، ރީބްރޯޑްކާސްޓިންގ ލައިސަންސް ފީ ގެ ޖުރިމަނާ ގެ ގޮތުގައި އިތުރު 6.6 މިލިއަން ރުފިޔާ ނުދައްކާ އެބައޮތެވެ. ފްރީކުއެންސީ ލައިސަންސް ފީގެ ގޮތުގައި ނުދައްކާ 6.4 މިލިއަން ރުފިޔާ ހުރި އިރު ފްރީކުއެންސީ ލައިސަންސް ފީގެ ޖުރިމަނާގެ ގޮތުގައި 4.8 މިލިއަން ރުފިޔާ ނުދައްކާ އެބައޮތެވެ. ބްރޯޑްކާސްޓިންގ ލައިސަންސް ފީގެ ގޮތުގައި 2.7 މިލިއަން ރުފިޔާ ނުދައްކާ އޮތް އިރު ބްރޯޑްކާސްޓިންގ ލައިސަންސް ފީގެ ޖުރިމަނާ ގެ ގޮތުގައި ގާތްގަނޑަކަށް 2 މިލިއަން ރުފިޔާ ނުދައްކާ އޮތްކަން ފާހަގަ ކުރެވެ އެވެ.
ބްރޯޑްކާސްޓިންގ ކޮމިޝަނަށް ލިބެން ޖެހޭ ފައިސާ ގެ ތެރެއިން 3 އަހަރަށް ވުރެ ގިނަ ދުވަސްވެފައިވާ 18.7 މިލިއަން ރުފިޔާ ހުރިކަން ރިޕޯޓުގައި ވަނީ ފާހަގަ ކޮށްފަ އެވެ.
އޮޑިޓަރ ޖެނެރަލް ގެ ރިޕޯޓުަގައި އިތުރަށް ފާހަގަ ކޮށްފައިވަނީ ލިބެން ޖެހޭ ފައިސާ ގެ ހިސާބުތައް ކޮމިޝަނުން ބަލަހައްޓަމުން ގެންގޮސްފައިވީ ނަމަވެސް ފައިސާ ނުދެއްކުމުން ކުރެވޭ ޖުރިމަނާ ގެ އަދަދު ބައެއް ފަހަރު ހިސާބު ކޮށްފައި ހުންނަނީ ޖުރިމަނާ ކުރުމުގެ އުސޫލާ އެއްގޮތައް ނޫން ކަމުގައެވެ. އެ ގޮތުން ކޮމިޝަނުން ހަދާފައިވާ ޖުރިމަނާ ގެ ހިސާބު ތަކުން 8 ލައްކަ އަށް ވުރެ ގިނަ ރުފިޔާ އިތުރުވެފައިވާކަން ރިޕޯޓުގައިވެ އެވެ.
މޯލްޑިވްސް ބްރޯޑްކާސްޓިންގ ކޮމިޝަން އުފެއްދީ ބްރޯޑްކާސްޓް ކުރުމުގެ ގާނޫނުގެ 2011 ވަނަ އަހަރުގެ އޭޕްރީލު މަހުގައެވެ.
