2024 ވަނަ އަހަރު ބޮޑުތަނުން ޚަރަދު އިތުރުވެގެން ދިޔަ އިރު އާމްދަނީ ލިބޭނެ އައު ގޮތްތަކެއް މުއިއްޒު ސަރުކާރަކަށް ނުހޯދުނު: ރިޕޯޓް

ފާއިތުވި 2024 ވަނަ އަހަރު، ދައުލަތުގެ ޚަރަދުތައް ބޮޑުތަނުން އިތުރުވެގެން ދިޔަ އިރު ވެސް އާމްދަނީ ލިބޭނެ އައު ގޮތްތަކެއް މުއިއްޒު ސަރުކާރަކަށް ހޯދިފައި ނުވާ ކަމަށް އޮޑިޓަރ ޖެނެރަލްގެ ރިޕޯޓެއްގައި ފާހަގަ ވެއްޖެ އެވެ.

ބަޖެޓް ޕޮސިޝަން ރިޕޯޓު - 2024 ގައި ފާހަގަ ކޮށްފައިވާ ގޮތުގައި 2024 ވަނަ އަހަރީ ބަޖެޓުގައި އާމްދަނީ އިތުރުކުރުމަށްޓަކައި އަލަށް އެއްވެސް ކަމެއް ހިންގުމަށް ހިމަނާފައިނުވި ނަމަވެސް، ސަރުކާރުން ވަނީ މެދު ރާސްތާގެ މާލީ ސްޓްރެޓަޖީ (އެމް.ޓީ.އެފް.އެސް) 2024-2026 ގައި، އާމްދަނީ ހޯދާނެ އައު ގޮތްތަކެއް ރާވާފައިވާކަން ހާމަކޮށްފައެވެ. އޭގެ ތެރޭގައި ހިމެނެނީ، ކާބަން ކްރެޑިޓް އިން ފައިސާ ހޯދުމާއި، މޯލްޑިވްސް ފަންޑް މެނޭޖްމަންޓް ކޯޕަރޭޝަން (އެމް.އެފް.އެމް.ސީ) އިން ހިންގާ އިންޓަރގްރޭޓެޑް ޓޫރިޒަމް ޕްރޮޖެކްޓުން ޑިވިޑެންޑް ގެ ގޮތުގައި ހޯދާނެ ކަމަށް ބުނި ފައިސާ އެވެ.

ނަމަވެސް، އޮޑިޓަރ ޖެނެރަލްގެ "އެމް.ޓީ.އެފް.އެސް 2024-2026 ގެ ރިވިއު ރިޕޯޓް" ގައި ފާހަގަކޮށްފައި ވަނީ، މިކަންކަމުން އެއްވެސް އާމްދަނީ އެއް ދައުލަތައް ލިބިފައި ނުވާ ކަމަށެވެ. އަދި ވެސް އެކަންކަމާ ގުޅޭ މައިގަނޑު ކަންތައްތައް ވަނީ ރޭވުމުގެ މަރުހަލާގައިކަން އޮޑިޓަރ ޖެނެރަލް ވަނީ ފާހަގަ ކުރައްވާފައެވެ. އަދި އެކަންކަން ކާމިޔާބުވުމަށް އިތުރު ވަގުތާއި ކޯޑިނޭޝަން ބޭނުންވާނެ ކަމަށް ރިޕޯޓުގައި ވެއެވެ.

ރިޕޯޓު ގައި ފާހަގަ ކޮށްފައިވާ ގޮތުގައި ފައިސާ ގެ އެހީގެ ގޮތުގައި 2024 ވަނަ އަހަރު ބަޖެޓު ކުރި މިންވަރާ ގާތް ކުރާ އަދަދަކަށް ވެސް އެހީ ލިބިފަ އެއް ނުވެއެވެ. އެ ގޮތުން ކޭޝް ގްރާންޓް ގެ ގޮތުގައި 929 މިލިއަން ލިބޭނެ ކަމަށް ބަޖެޓް ކޮށްފައި އޮތް ނަމަވެސް އަހަރު ނިމުނު އިރު ލިބިފައި ވަނީ އެންމެ އެންމެ 568 މިލިއަން ރުފިޔާ އެވެ. އެއީ އަންދާޒާ ކުރި މިންވަރުގެ 39 އިން ސައްތަ އެވެ.

2024 ވަނަ އަހަރު ރައީސް މުއިއްޒުގެ ސަރުކާރުން ވަނީ 54.5 ބިލިއަން ރުފިޔާގެ ބަޖެޓެއް ހުސް ކޮށްލާފަ އެވެ. 2024 ވަަނަ އަހަރަށް ފުރަތަމަ ފާސް ކުރި ބަޖެޓުން ނުފުދިގެން ރައީސް މުއިއްޒުގެ ފުލް ކޮންޓްރޯލު އޮންނަ ރައްޔިތުންގެ މަޖިލީހުން ވަނީ ސަޕްލިމެންޓަރީ ބަޖެޓެއް ވެސް ފާސް ކޮށްފަ އެވެ.