އދ. އަތޮޅު ކައުންސިލް މެންބަރުން ލަންކާ އަށާއި ފިލިޕީންސް އަށް ކުރި ދަތުރުތަކަށް ބައި މިލިއަނަށްވުރެ ގިނަ ރުފިޔާ ހަރަދު ކުރި: އޮޑިޓް
12 ޖެނުއަރީ 2026 | ހޯމަ 13:07އޮޑިޓަރ ޖެނެރަލްގެ އޮފީހުން ނެރުނު އދ. އަތޮޅު ކައުންސިލްގެ 2024 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުން ހާމަވެފައިވަނީ ފިނޭންސް މިނިސްޓްރީގެ ސަރކިއުލަރއާ ހިލާފަށް އަތޮޅު ކައުންސިލުން ސްރީލަންކާ އަށް ތަޖުރިބާ ދަތުރެއް ކޮށް 238،700 ރުފިޔާ އާއި ފިލިޕީންސް އަށް 385،941 ރުފިޔާ ހަރަދުކޮށްފައިވާ ކަން. މި ދަތުރުތައް ކުރީ ކުނި މެނޭޖްމަންޓް، ދަނޑުވެރިކަން، ދަތުރުވެރިކަން ފަދަ ދާއިރާތަކުން ތަޖުރިބާ ހޯދުމުގެ ނަމުގައި.
އދ. އަތޮޅު ކައުންސިލް މެންބަރުން ރައީސް މުއިއްޒު އާއި އެކު | ރައީސް އޮފީސް
އދ. އަތޮޅު ކައުންސިލް މެންބަރުން ލަންކާ އަށާއި ފިލިޕީންސް އަށް ކުރި ތަޖުރިބާ ދަތުރުތަކަށް ބައި މިލިއަނަށްވުރެ ގިނަ ރުފިޔާ ހަރަދު ކޮށްފައިވާ ކަމަށް އެ ކައުންސިލްގެ 2024 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުން ހާމަވެއްޖެ އެވެ.
އޮޑިޓަރ ޖެނެރަލްގެ އޮފީހުން ނެރެފައިވާ އދ. އަތޮޅު ކައުންސިލްގެ 2024 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުގައި ބުނެފައިވަނީ ސްރީލަންކާ އަށް ކޮށްފައިވާ ތަޖުރިބާ ދަތުރަކަށް 238،700 ރުފިޔާ ހަރަދުކޮށްފައިވާ އިރު، މި ހަރަދަކީ ދައުލަތުގެ ހަރަދުތައް ކޮންޓްރޯލްކޮށް އެފިޝިއަންސީ އިތުރުކުރުމަށް ފިނޭންސް މިނިސްޓްރީ އިން ދައުލަތުގެ އިދާރާތަކަށް މާލިއްޔަތާ ބަހޭ ސަރކިއުލާ އިން އަންގާފައިވާ އެންގުމާ އެއްގޮތަށް ކޮށްފައިވާ ހަރަދެއް ކަމުގައި ބެލެވެން ނެތް ކަމަށެވެ.
މި މައްސަލަ އާއި ގުޅިގެން އޮޑިޓް ރިޕޯޓުގައި ބުނެފައިވަނީ 2024 ވަނަ އަހަރަށް ފާސްކޮށްފައިވާ ބަޖެޓް ތައްޔާރުކޮށްފައިވާ ވިސްނުންތަކާ އެއްގޮތަށް ބަޖެޓް ތަންފީޒު ކުރުމަށާއި ހަރަދުތަކުގެ އެފިޝިއަންސީ މަތިކުރުމަށްޓަކައި، 2024 ވަނަ އަހަރަށް ރައްޔިތުންގެ މަޖިލީހުން ފާސްކުރި ބަޖެޓް ތަންފީޒުކޮށް ހަރަދު ކުރުމުގައި އިދާރާތަކުން ބަލަންޖެހޭ ކަންތައްތައް މިނިސްޓްރީ އޮފް ފިނޭންސްގެ މާލިއްޔަތާ ބެހޭ ސަރކިއުލަރ ގައި ބަޔާންކޮށްފައިވާ ކަމަށެވެ.
އެގޮތުން މި ސަރކިއުލަރގައި ރާއްޖެއިން ބޭރުން ހުރިހާ ހަރަދެއް ލިބޭ ކުރު މުއްދަތުގެ ކޯސްތަކާއި ޓްރެއިނިންގތައް ފިޔަވައި އިތުރު އެއްވެސް ޓްރެއިނިންގ ޕްރޮގްރާމެއް ކުރިއަށް ނުގެންދިއުމަށް އިރުޝާދު ދީފައިވުމާއި، ކައުންސިލްތަކުން ވެސް ބްލޮކް ގްރާންޓު އަދި އަމިއްލަ އާމްދަނީ ފައިސާ އިން ހަރަދު ކުރުމުގައި ސަރކިއުލަރގައި ބަޔާންކޮށްފައިވާ ކަންކަމަށް ރިއާޔަތްކޮށް ހަރަދުތައް ބައްޓަން ކުރުމަށާއި ކައުންސިލްގެ ބަޖެޓުގެ ތެރެއިން ހަރަދުތައް ހަމަޖައްސައި، ހަރަދުތަކުގެ އެފިޝިއަންސީ މަތިކުރުމަށް ސަމާލުކަން ދިނުމަށް ބަޔާންކޮށްފައިވާ ކަމަށެވެ.
ނަމަވެސް އދ. އަތޮޅު ކައުންސިލް އިދާރާ އިން 2024 ވަނަ އަހަރު ސްރީލަންކާ އަށް ކޮށްފައިވާ ދަތުރުގެ ހަރަދުތައް ކުރުމުގައި ފިނޭންސް މިނިސްޓްރީ އިން ދީފައިވާ އިރުޝާދުތަކާ އެއްގޮތަށް އަމަލުކޮށްފައި ނުވާ ކަމަށް އޮޑިޓުގައި ބުނެފައިވެ އެވެ. އެގޮތުން 28 ފެބްރުއަރީ 2024 އިން 7 މާޗް 2024 އަށް ލަންކާ އަށް އަތޮޅު ކައުންސިލްގެ އިދާރާ ތަމްސީލުކުރާ 10 މެންބަރުންގެ ތެރެއިން 8 މެންބަރުންނާއި ސެކްރެޓަރީ ޖެނެރަލް ހިމެނޭހެން 9 ބޭފުޅަކު ތަޖުރިބާ ދަތުރެއް ކޮށްފައިވާ އިރު، މި ދަތުރަށް ހިނގާނޭ ހަރަދުގެ ފައިސާ ލިބޭނެ އެހެން ގޮތްތަކެއް ހޯދުމަކާ ނުލާ ކައުންސިލްގެ ބަޖެޓުން 238،700 ރުފިޔާ ހަރަދު ކޮށްފައިވާ ކަމަށެވެ.
ހަރަދުތަކަށް ބަލާއިރު، 9 ބައިވެރިންގެ ޑީއެސްއޭ އަދި ޕޮކެޓް މަނީގެ ގޮތުގައި 198،177 ރުފިޔާ އަދި ޓިކެޓުގެ ހަރަދުގެ ގޮތުގައި 40،523 ރުފިޔާ ވަނީ ހަރަދު ކޮށްފަ އެވެ.
ކައުންސިލުން އޮޑިޓަށް ދިން މައުލޫމާތުގައި ބުނެފައިވަނީ މި ދަތުރަކީ ސްރީލަންކާގެ ކުނި މެނޭޖް ކުރުމުގެ މައުލޫމާތާއި، ތިމާވެއްޓާ ރައްޓެހި ހަކަތަ އުފައްދާ ގޮތްތަކުގެ މައުލޫމާތު އަދި ދަނޑުވެރިކަން ކުރުމުގައި ގެންގުޅޭ ޒަމާނީ ގޮތްތަކުގެ މައުލޫމާތު ހޯދުމަށްފަހު އަތޮޅުގައި އެފަދަ ކަންތައް ކުރުމަށް މަސައްކަތް ކުރުން ކަމުގައި ބަޔާންކޮށްފައިވެ އެވެ.
މީގެ އިތުރުން ކައުންސިލް 6 މެނބަރުންނާއި ސެކްރެޓަރީ ޖެނެރަލް، ކޮމްޕިއުޓަރ ޓެކްނީޝަން އަދި 2 އެސިސްޓެންޓް ކައުންސިލް އޮފިސަރުން ހިމެނޭހެން 10 ބޭފުޅަކު ފިލިޕީންސް އަށް ކުރި ދަތުރަށް މިދިޔަ 2025 ވަނަ އަހަރުގެ 26 އޮގަސްޓުން 4 ސެޕްޓެމްބަރަށް ދަތުރެއް ކޮށް އެ ދަތުރަށް 385،941 ރުފިޔާ ވަނީ ހަަރަދުކޮށްފަ އެވެ. އެގޮތުން މި ދަތުރުގައި 10 ބައިވެރިންގެ ޑީއެސްއޭ އަދި ޕްކޮޓް މަނީގެ ގޮތުގައި 264،298 ރުފިޔާ، ބޭރަށް ދިއުމުގެ ޓިކެޓަށް 120،738 ރުފިޔާ އަދި 1 ބައިވެރިއަކު ވެލާނާ އެއަރޕޯޓަށް ދިއުމަށް 905 ރުފިޔާ ވަނީ ހަރަދުކޮށްފަ އެވެ.
ފިލިޕީންސް އަށް ކުރި ދަތުރަކީ ދަތުރުވެރިކަން ކުރަމުން އަން ގޮތްތަކާއި، ލޯކަލް ޓޫރިޒަމް މާކެޓްކޮށް ޕްރޮމޯޓް ކުރަމުން އަންނަ ގޮތްތަކުގެ ތަޖުރިބާ ހޯދުމާއި، ކުނި މެނޭޖްކުރާ ގޮަތްތަކުގެ މައުލޫމާތު އޮޅުންފިލުވުމަށް އެތަންތަނަށް ޒިޔާރަތްކުރުމާއި، ދަނޑުވެރިކަން ކުރުމުގައި ގެންގުޅޭ ޒަމާނީ ގޮތްތައް ބަލައި މައުލޫމާތު ހޯދުމާއި، އެ ގައުމުގެ އާސާރީ ތަންތަނަށް ޒިޔާރާތްކުރުން ކަމަށް ކައުންސިލުން އޮޑިޓަށް ވަނީ މައުލޫމާތު ދީފަ އެވެ.
