ނަމާދަށް ފަރުވާތެރިވޭ، އުޒުރަކާ ނުލައި ނަމާދު އެޅުމަކީ އެ މީހެއްގެ މައްޗަށް މާތްﷲގެ ކޯފާ އަންނާނެ ކަމެއް: ޚުތުބާ

ފަރުޟު ނަމާދަށް ފަރުވާތެރިވާން ޖެހޭ ކަމަށާއި، އުޒުރަކާ ނުލައި ނަމާދު އެޅުމަކީ އެ މީހެއްގެ މައްޗަށް ﷲ تَعَالَى ގެ ކޯފާ އަންނާނެ ކަމެއް ކަމަށް ހުކުރު ޚުތުބާގައި ބުނެފި އެވެ.

''ނަމާދު އެޅުމުގެ ނުރައްކާތެރިކަން'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ މުސްލިމަކަށްވުމަށް ފަހު އޭނާގެ އިސްލާމްކަން ދައްކުވައިދޭ މައިގަނޑު ކަމަކީ ނަމާދު ކަމަށާއި، ނަމާދަށް ފަރުވާތެރިވުމާއި ނަމާދު އޭގެ ވަގުތުގައި އަދާކުރުމަކީ ތިމާގެ އިސްލާމް ވަންތަކަން ދައްކުވައިދޭ ރަމްޒެއް ކަމަށެވެ.

ނަމާދަކީ އަމާންކަމާއި ރައްކާތެރިކަން އަޅާއަށް ކަށަވަރުކޮށްދޭ އަޅުކަމެއް ކަމަށާއި، ކާމިޔާބާއި ނަސްރު ލިބުމަށް މަގު ފަހިކޮށްދޭ އަޅުކަމެއް ކަމަށެވެ.

މީގެ އިތުރުން ޚުތުބާގައި ބުނީ ނަމާދަކީ ގަދަވެ ހެޔޮ ހާލުގައްޔާއި ބަލި ހާލުގައި އޮންނަ އިރުގައްޔާއި ރަށުގައި ގާއިމުވެ ހުންނަ އިރާއި ދަތުރުމަތީ ގައި އުޅޭ އިރު ވެސް ކުރުމަށް އަންގަވައިފައިވާ އަޅުކަމެއް ކަމަށާއި، ހަނގުރާމައިގެ ހާލަތުގައި ވެސް ދޫކޮށްނުލުމަށް އަންގަވައިފައިވާ އަޅުކަމެއް ކަމަށެވެ.

ނަމާދު އެޅުމަކީ ތިމާގެ އިސްލާމްކަމާއި ކާފިރުކަމާ ދެމެދު ވަކިކޮށްދޭ އިންކަމުގައި ސުންނަތުގައިވަނީ އަންގަވައިފައެވެ. ކީރިތި ރަސޫލާ مُحَمَّدُ صَلَّى اللهُ عَلَيْهِ وَسَلَّمَ ޙަދީޘްކުރައްވައިފައި ވެއެވެ. (اَلْعَهْدُ الَّذِيْ بَيْنَنَا وَبَيْنَهُمُ الصَّلَاةُ، فَمَنْ تَرَكَهَا فَقَدْ كَفَرَ) މާނައީ: "އެއުރެންނާއި އަހުރެމެންނާ (އެބަހީ: ކާފިރުންނާއި މުސްލިމުންނާ) ދެމެދުގައި (ތަފާތުކުރާ) ޢަހުދަކީ ނަމާދެވެ. ފަހެ، ނަމާދު އަޅައިފި މީހާ، (ދަންނާށެވެ.) ހަމަކަށަވަރުން، އޭނާ ކާފިރުވެއްޖެއެވެ." އެހެން ބަސްފުޅެއްގައި ވެއެވެ. ތާބިއީ ބޭކަލަކުކަމުގައިވާ، ޢަބްދު الله ބުނު ޝަޤީޤުލްޢުޤައިލީގެ ކިބައިން ރިވާވެގެންވެއެވެ. [މުޙައްމަދު مُحَمَّدُ صَلَّى اللهُ عَلَيْهِ وَسَلَّمَގެ އަޞްޙާބުން ދެކެވަޑައިގަންނަވާ ގޮތުގައި، އަމަލުތަކުގެ ތެރެއިން (އެ ކަމެއް ދޫކޮށްލައިގެން) މީހާ ކާފިރުވާކަމެއް ނަމާދުއެޅުން ފިޔަވައި ނުވެއެވެ.

ހުކުރު ޚުތުބާ

ނަމަވެސް އަހަރެމެންގެ ތެރެއިން ބައެއް މީހުންނަކީ ހަމައެކަނި ރަމަޟާން މަހު ބަރާބަރަށް ނަމާދުކުރާ މީހުން ކަމަށާއި، އަނެއްބައި މީހުންނަކީ ހަފުތާގެ ހުކުރު ދުވަހު ކުރެވޭ ހުކުރު ނަމާދަށް އެކަނި ހާޒިރުވާ މީހުން ކަމަށް ޚުތުބާގައި ބުނެފައިވެ އެވެ. އަނެއް ބަޔަކީ ކޮންމެ ދުވަހަކު ކުރުމަށް ފަރުޟު ކުރައްވައިފައިވާ ނަމާދުތަކުގެ ތެރެއިން ބައެއް ނަމާދުތައްކޮށް އަނެއް ބައި ނަމާދުތައް ނުކުރާ މީހުން ކަމަށާއި، މިއިން އެއްވެސް ބަޔަކު ނަމާދުތަކަށް ފަރުވާ ކުޑަކޮށްލައިފައި ވަނީ ނަމާދަށް އިންކާރުކުރާ ހާލުގައި ނޫން ކަމުގައިވީ ނަމަވެސް މިއީ ނުހަނު ފާފަވެރިވާނޭ ކަމެއް ކަމަށް ޚުތުބާގައި ބުނެފައިވެ އެވެ.

މީގެ އިތުރުން ޚުތުބާގައި ބުނީ ނަމާދު އެޅުމަކީ އެކަމުގެ އުގޫބާތާއި ފާފަ ބޮޑު ކަމެއް ކަމަށާއި، އުޒުރަކާ ނުލައި ނަމާދު އެޅުމަކީ އެ މީހެއްގެ މައްޗަށް ﷲ تَعَالَى ގެ ކޯފާ އަންނާނެ ކަމެއްކަން ދަންނާން ޖެހޭ ކަމަށެވެ.

އެހެންކަމުން ތައުބާގެ މަގަށް އަވަހަށް ރުޖޫއަވެ، ނަމާދުތަކަށް ފަރުވާތެރި ވުމަށް ވަނީ ނަސޭހަތްތެރިވެފަ އެވެ.