ފަރުޟު ނަމާދަށް ފަރުވާތެރިވާން ޖެހޭ ކަމަށާއި، އުޒުރަކާ ނުލައި ނަމާދު އެޅުމަކީ އެ މީހެއްގެ މައްޗަށް ﷲ تَعَالَى ގެ ކޯފާ އަންނާނެ ކަމެއް ކަމަށް ހުކުރު ޚުތުބާގައި ބުނެފި އެވެ.

''ނަމާދު އެޅުމުގެ ނުރައްކާތެރިކަން'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ މުސްލިމަކަށްވުމަށް ފަހު އޭނާގެ އިސްލާމްކަން ދައްކުވައިދޭ މައިގަނޑު ކަމަކީ ނަމާދު ކަމަށާއި، ނަމާދަށް ފަރުވާތެރިވުމާއި ނަމާދު އޭގެ ވަގުތުގައި އަދާކުރުމަކީ ތިމާގެ އިސްލާމް ވަންތަކަން ދައްކުވައިދޭ ރަމްޒެއް ކަމަށެވެ.

ނަމާދަކީ އަމާންކަމާއި ރައްކާތެރިކަން އަޅާއަށް ކަށަވަރުކޮށްދޭ އަޅުކަމެއް ކަމަށާއި، ކާމިޔާބާއި ނަސްރު ލިބުމަށް މަގު ފަހިކޮށްދޭ އަޅުކަމެއް ކަމަށެވެ.

މީގެ އިތުރުން ޚުތުބާގައި ބުނީ ނަމާދަކީ ގަދަވެ ހެޔޮ ހާލުގައްޔާއި ބަލި ހާލުގައި އޮންނަ އިރުގައްޔާއި ރަށުގައި ގާއިމުވެ ހުންނަ އިރާއި ދަތުރުމަތީ ގައި އުޅޭ އިރު ވެސް ކުރުމަށް އަންގަވައިފައިވާ އަޅުކަމެއް ކަމަށާއި، ހަނގުރާމައިގެ ހާލަތުގައި ވެސް ދޫކޮށްނުލުމަށް އަންގަވައިފައިވާ އަޅުކަމެއް ކަމަށެވެ.

ނަމަވެސް އަހަރެމެންގެ ތެރެއިން ބައެއް މީހުންނަކީ ހަމައެކަނި ރަމަޟާން މަހު ބަރާބަރަށް ނަމާދުކުރާ މީހުން ކަމަށާއި، އަނެއްބައި މީހުންނަކީ ހަފުތާގެ ހުކުރު ދުވަހު ކުރެވޭ ހުކުރު ނަމާދަށް އެކަނި ހާޒިރުވާ މީހުން ކަމަށް ޚުތުބާގައި ބުނެފައިވެ އެވެ. އަނެއް ބަޔަކީ ކޮންމެ ދުވަހަކު ކުރުމަށް ފަރުޟު ކުރައްވައިފައިވާ ނަމާދުތަކުގެ ތެރެއިން ބައެއް ނަމާދުތައްކޮށް އަނެއް ބައި ނަމާދުތައް ނުކުރާ މީހުން ކަމަށާއި، މިއިން އެއްވެސް ބަޔަކު ނަމާދުތަކަށް ފަރުވާ ކުޑަކޮށްލައިފައި ވަނީ ނަމާދަށް އިންކާރުކުރާ ހާލުގައި ނޫން ކަމުގައިވީ ނަމަވެސް މިއީ ނުހަނު ފާފަވެރިވާނޭ ކަމެއް ކަމަށް ޚުތުބާގައި ބުނެފައިވެ އެވެ.

މީގެ އިތުރުން ޚުތުބާގައި ބުނީ ނަމާދު އެޅުމަކީ އެކަމުގެ އުގޫބާތާއި ފާފަ ބޮޑު ކަމެއް ކަމަށާއި، އުޒުރަކާ ނުލައި ނަމާދު އެޅުމަކީ އެ މީހެއްގެ މައްޗަށް ﷲ تَعَالَى ގެ ކޯފާ އަންނާނެ ކަމެއްކަން ދަންނާން ޖެހޭ ކަމަށެވެ.

އެހެންކަމުން ތައުބާގެ މަގަށް އަވަހަށް ރުޖޫއަވެ، ނަމާދުތަކަށް ފަރުވާތެރި ވުމަށް ވަނީ ނަސޭހަތްތެރިވެފަ އެވެ.