ރައީސް މުއިއްޒު ބޭނުންފުޅުވި ނަމަވެސް ރާއްޖޭގެ ޔޫސަބަލް ރިޒާވުން ބޭނުންހާ ގޮތަކަށް ފައިސާއެއް ނުނެގޭނެ: މެންބަރު ޝަމްހީދު

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބޭނުންފުޅުވި ނަމަވެސް ރާއްޖޭގެ ޔޫސަބަލް ރިޒާވުން ބޭނުންހާ ގޮތަކަށް ފައިސާ ނުނެގޭނެ ކަމަށާއި، މިދިޔަ އަހަރު ދައުލަތަށް ވަތް ފައިސާގެ ތަފްސީލު ރައްޔިތުންނަށް ހާމަ ކުރަންޖެހޭ ކަމަށް ރައްޔިތުންގެ މަޖިލީހުގެ ހުޅުމާލޭ ދެކުނު ދާއިރާގެ މެންބަރު ޑރ. އަހްމަދު ޝަމްހީދު ވިދާޅުވެއްޖެ އެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި މެންބަރު ޝަމްހީދު ވަނީ ރާއްޖޭގެ އިގްތިސާދަށް އަލިއަޅުއްވާލައްވައި ކަންބޮޑުވުން ފާޅު ކުރައްވާފަ އެވެ.

ރާއްޖެއަށް މި ހާލަތު ގެނައީ މިސަރުކާރުންކަން ފާހަގަކުރައްވައި މެންބަރު ޝަމްހީދު ވިދާޅުވީ، ޓެކްސް ނިޒާމަށް ބަދަލު ގެނެސް، ފޮރިން ކަރަންސީ މާރު ކުރުމަށް ގާނޫނަށް ގެނައި ބަދަލުތަކާ އެއްކޮށް މިއަހަރާއި، މިދިޔަ އަހަރު ދައްކަންހުރި ލޯނުތައް ދައްކަން ބޭނުންވާ ޔޫއެސް ޑޮލަރު ދިވެހި ދައުލަތަށް ވަތް ކަމަށް އޭނާ ވިދާޅުވި އެވެ. އަދި ވިދާޅުވީ 2024 ވަނަ އަހަރަށް ވުރެ އިތުރަށް މިދިޔަ އަހަރު ގާތްގަނޑަކަށް 800 އެތައް މިލިއަން ޑޮލަރެއް ވަދެފައިވާ ކަމަށެވެ. 

ނަމަވެސް މިފައިސާއަށް ވީނުވީއެއް ނޭނގޭ ކަމަށާއި، މިފައިސާއަށް ހެދި ގޮތެއް ސަރުކާރުން ރައްޔިތުންނަށް އޮޅުން ފިލުވައިދޭން ޖެހޭ ކަަމަށް މެންބަރު ޝަމްހީދު ވިދާޅުވި އެވެ. އަދި ވިދާޅުވީ މިފައިސާ އެހެން ކަމެއްގައި ބޭނުން ކުރުމަށް ފަހު މިއަހަރުގެ އޭޕްރީލް މަހު ދައްކަން ޖެހޭ ލޯނުގެ ފައިސާ ދެއްކުމަށް އެހެން ގޮތްތައް ސަރުކާރުން ހޯދަމުންދާ ކަމަށެވެ. 

މީގެ އިތުރުން ގްރޮސް ރިޒާވްގައި 1.27 ބިލިއަން ޑޮލަރު އެބަހުރި ކަމަށް ރައީސް މުއިއްޒު ވިދާޅުވެފައިވާތީ އެކަމަށް އިޝާރާތް ކުރައްވައި މެންބަރު ޝަމްހީދު ވިދާޅުވީ، ގްރޮސް ރިޒާވްއިން ދަރަނި ދެއްކުމުން ޔޫސަބަލް ރިޒާވް ވަރަށް މަދުވާ ކަމަށާއި، ރިޒާވްގައި ހުރި ފައިސާ ލޯނު ދެއްކުމަށް ބޭނުން ކުރެވިދާނެ ކަމަށް ގަބޫލު ނުކުރެވޭ ކަމަށެވެ. އަދި ވިދާޅުވީ މިފައިސާ ނެގުމަށް ރައިސް މުއިއްޒު ބޭނުންފުޅުވި ނަމަވެސް އެގޮތަށް އެކަން ނުކުރެވޭނެ ކަމަށެވެ. 

ދެން މިއަށް ބަލާއިރު ރައީސް ވިދާޅުވީ، ގްރޮސް ރިޒާވްގައި މިހާރު ވެސް އެބައިނޭ ބިލިއަނެއްހާ ރުފިޔާ. އެކަމަކު ގްރޮސް ރިޒާވްގައި އިމީޑިއޭޓްކޮށް ދަރަނި ދައްކަން އެބަ ޖެހޭ 800 އެތައް މިލިއަނެއް ޑޮލަރު. އެހެންވީމަ ޔޫސަބަލް ރިޒާވް ވަރަށް މަދު. އެއީ އާއްމުކޮށް ކާބޯތަކެތި އެތެރެ ކުރަން ނޫނީ ތެލުގެ އަގު އަދި ބޮޑުވުމާއެކު ކޮންމެ މަހުން މަހަށް ތެލަށް ބޭނުންވާ ފައިސާ އިތުރަށް ބޭނުންވާނެ. އެހެންވީމަ ރިޒާވްގައި ހުރި ފައިސާއެއް އަޅުގަނޑަށް ހިޔެއް ނުވޭ ލޯނު ދައްކަން ބޭނުން ކުރެވޭނެ ހެންނެއް. އަދި އެމްއެމްއޭއިން ނުވެސް ދޭނެ. އެއީ އެމްއެމްއޭގެ މައްޗަށް ލާޒިމްވޭ ރައްޔިތުންގެ ހައްގުގައި ފައިސާތަކެއް ބަހައްޓަންވެސް. ރިޒާވްއެއް ހުސްކޮށްނުލެވޭނެ ރައީސުލްޖުމްހޫރިއްޔާ ބޭނުންވިޔަސް އަދި އެގޮތަކަށް. އެއީ ރައްޔިތުންގެ ފައިސާ އޭގެ އެއްބަޔަކީ. އެހެންވީމަ އެ ފައިސާތައް އެމްއެމްއޭގެ މައްޗަށް ލާޒިމު ބަހައްޓަން. އެއީ ދަރަނި ދައްކަން ހުރި ފައިސާއެއް ނޫން. އޭގެއިން މިންވަރެއް ނެގިދާނެ ކޮންމެވެސް ވަރަކަށް.

ރައްޔިތުންގެ މަޖިލީހުގެ ހުޅުމާލޭ ދެކުނު ދާއިރާގެ މެންބަރު ޑރ. އަހްމަދު ޝަމްހީދު

 ސޮވަރިން ޑިވެލޮޕްމަންޓް ފަންޑް (އެސްޑީއެފް) އާ ގުޅޭގޮތުން މެންބަރު ޝަމްހީދު ވިދާޅުވީ، ރިޔާސީ ބަޔާނުގައި 150 މިލިއަން ޑޮލަރު ހުރި ކަމަށް ރައީސް މުއިއްޒު ވިދާޅުވި ކަމަށާއި، އޭގެ ދެތިން ހަފްތާފަހުން 320 މިލިއަން ޑޮލަރަށް ބަދަލުވި ގޮތް ނޭނގޭ ކަމަށެވެ. އަދި މިވާނުވާ ރައްޔިތުންނަށް ސާފު ކޮށްދޭން ޖެހޭ ކަމަށް އޭނާ ވިދާޅުވި އެވެ. 

ތަފާސްހިސާބުތައް ދައްކާ ގޮތުން މިއަހަރު އިތުރަށް ސޮވަރިން ޑިވެލޮޕްމަންޓް ފަންޑަށް ލައިގެން އުޅެނީ 18 މިލިއަން ޑޮލަރު. އަނެއް 200 މިލިއަން ޑޮލަރު ނޫނީ 250 މިލިއަން ޑޮލަރު އެއީ ކޮންތާކުން އައި ފައިސާއެއް ކަމެއް ނޭނގޭ.ދެން އެ އައްޔާ އައީ އެމްޑީޕީ ސަރުކާރުގައި އޭރު މާރުކޮށްފައި ހުންނާނެ ސްވަރިން ޑިވަލޮޕްމަންޓް ފަންޑުގައި ހުރި ފައިސާތަކެއް. އެހެންވީމަ އަޅުގަނޑަށް ހީވަނީ އިތުރު ޑޮލަރުތަކެއް ލިބިއްޖެއްޔާ އެއީ ދިވެހި ރުފިޔާ އަނެއްކާ ޑޮލަރަށް ކޮންވާޓްކޮށްގެން ސްވަރިން ޑިވަލޮޕްމަންޓް ފަންޑު ޑޮލަރު އިތުރު ކުރީ ކަމަށް. އެހެންވީމަ އެއީ މިސަރުކާރުން ހޯދި ފައިސާ ކަމަކަށް ގަބޫލެއް ނުކުރެވޭ.

ރައްޔިތުންގެ މަޖިލީހުގެ ހުޅުމާލޭ ދެކުނު ދާއިރާގެ މެންބަރު ޑރ. އަހްމަދު ޝަމްހީދު

މެންބަރު ޝަމްހީދު ވިދާޅުވީ ރާއްޖޭގެ ދަރަނި ދެއްކުމާއި، އިގްތިސާދީ ކަންކަމުގައި މިސަރުކާރުން ވަރަށް ބޮޑަށް ރައްޔިތުންނަށް ކަންކަން އޮޅުވާލުމަށް މަސައްކަތް ކުރާ ކަމަށެވެ. ނަމަވެސް މިއަދު ރައްޔިތުންނަކީ ތަންދޮރު ދަންނަ ބައެއް ކަމަށާއި، އިގްތިސާދަށް ވަމުންދާ ގޮތް އެނގޭ ކަމަށް އޭނާ ވިދާޅުވި އެވެ.