ވައްކަމަކީ މި ސަރުކާރުގެ ހިތުގެ ކާނާ، އެކަން ހުއްޓަ އެއް ނުލާނެ: ޣަފޫރު

ވައްކަމަކީ މި ސަރުކާރުގެ ހިތުގެ ކާނާ ކަމަށް އެމްޑީޕީގެ ވަގުތީ ޗެއަރޕަރސަން  އަދި ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރު އަބްދުލް ޣަފޫރު މޫސާ ވިދާޅުވެއްޖެ އެވެ.

އޭނާ އެފަދައިން ވިދާޅުވީ އެމްޑީޕީގެ ޕިކަޕް ޖަލްސާގައި ވާހަކަދައްކަވަމުންނެވެ.

ޣަފޫރު ވިދާޅުވީ މި ސަރުކާރު ފެށުނީއްސުރެ އަޑު އިވެނީ ވައްކަމާއި ޚިޔާނާތުގެ ވާހަކަ ކަމަށެވެ. މިއަދު އެ ވައްކަމާއި ޚިޔާނާތުގެ ތެރެއަށް ވަންނަން އާއްމުން ބޭނުން ނުވާ ކަމަށް އޭނާ ވަނީ ވިދާޅުވެފަ އެވެ. ކުރިއަށް އޮތް ކައުންސިލް އިންތިޚާބާއި ޑަބްލިއުޑީސީ އިންތިޚާބަކީ ވެސް ވައްކަމަށް ނޫނެކޭ ބުނަން ލިބޭ އިތުރު ފުރުސަތެއް ކަމަށް އޭނާ ވަނީ ވިދާޅުވެފަ އެވެ. 

"ވަގުން ވާނީ ވަގުންނަށް. އެ ނުން އެއްވެސް އެއްޗެއް ނަތީޖާ އަކުން ނުނިކުންނާނެ. މި ވަގު ސަރުކާރަށް ނޫނެކޭ ބުނާށޭ. ދެ އިންތިޚާބު އެއްކޮށްލައިގެން މިއުޅެނީ ޑިމޮކްރަސީ ފުނޑާލަން." އޭނާ ވިދާޅުވި އެވެ. 

އޭނާގެ އިތުރުން ޕިކަޕް ޖަލްސާގައި ވާހަކަދެއްކެވި އެހެން ބޭފުޅުން ވެސް ވަނީ ސަރުކާރަށް ވަރަށް ބޮޑަށް ފާޑު ވިދާޅުވެފަ އެވެ. އެގޮތުން ކެންދޫ ދާއިރާގެ މެމްބަރު މައުރޫފް ޒާކިރު ވިދާޅުވީ ކުރިއަށް އޮތް ފެންނަ ނުފެންނަ ވޯޓަކީ ވެސް އޮޅުވާލުމާއި މަކަރުވެރިކަމުގެ މިސާލެއް ކަމަށް ފާހަގަކުރައްވާފަ އެވެ. މަޖިލީހާއި އިދާރާތަކުގެ އިތުރުން ކޯޓުތަކަށް ވެސް ސަރުކާރުގެ ނުފޫޒު ފޯރުވާފަ ވާއިރު ކައުންސިލް އިންތިޚާބު ސަރުކާރަށް ދިނުމަކީ ރައްޔިތުން އިތުރަށް ދަށު ދަރަޖަ އަކަށް ވެއްޓުން ކަމަށް މައުރޫފް ވިދާޅުވި އެވެ. ރައީސް ޑރ. މުހައްމަދު މުއިއްޒު ރައްޔިތުންގެ ބާރު ފޭރިގަތުމަށް ކުރާ މަސައްކަތާއި ދެކޮޅަށް އާއްމުން ތެދުވަން ޖެހޭ ކަމަށް ވެސް މައުރޫފް ވިދާޅުވި އެވެ.