އީރާނުން އިޒްރޭލުގެ ބެން ގުރިއަން އެއާޕޯޓަށް މިސައިލް ހަމަލާދީފި
އީރާނުގެ އައި.އާރު.ޖީ.ސީ އިން ބުރާސްފަތި ދުވަހުގެ ފަތިހު "ޚައްރަމްޝަހަރު-4" މަރުކާގެ ވަރުގަދަ މިސައިލްތަކެއް ބޭނުންކޮށްގެން ތަލް އަވީވުގެ މެދުތެރެއަށާއި ބެން ގުރިއަން އެއާޕޯޓުގެ އަސްކަރީ ބޭހަށް ހަމަލާތަކެއް ދީފި. މި ހަމަލާތަކުގެ އިތުރުން، އިޒްރޭލުގެ އުތުރުގައި ހުންނަ މޭރޮން ރާޑަރު ބޭހަށާއި އެކި ސަރަހައްދުތަކަށް އަމާޒުކޮށް ޑްރޯން ހަމަލާތަކެއް ދީފައިވާ ކަމަށްވެސް އީރާނުގެ އަސްކަރިއްޔާއިން ވަނީ ހާމަކޮށްފައި. އީރާނުން ބުނާގޮތުގައި މި ހަމަލާތަކުގައި ބޭނުންކުރި ކޮންމެ މިސައިލަކީ އެއް ޓަނުގެ ގޮވާތަކެތި އުފުލުމުގެ ގާބިލުކަން ލިބިފައިވާ ވަރުގަދަ ހަތިޔާރު.
އިޒްރޭލުން 2025 ޖޫން 13 ވާ ހުކުރު ދުވަހުގެ ފަތިހުގެ ވަގުތެއްގައި އީރާނަށް ދިން ހަމަލާތަކާ ގުޅިގެން، ތަލް އަވީވްގައި ހުންނަ ބެން ގުރިއަން އެއާޕޯޓުގެ ފްލައިޓްތައް ކެންސަލްކުރުމާ ގުޅިގެން ފަޅުވެފައިވާ އެއާޕޯޓުގައި ފުލުހުން ފޯރިމަރަނީ. | ގެޓީ އިމޭޖަސް
އިޒްރޭލުގެ ބެން ގުރިއަން އެއާޕޯޓަށާއި އެ ސަރަހައްދުގައި ހުންނަ އެއާފޯސް ބޭހަކަށް އަމާޒުކޮށް ހަމަލާތަކެއް ދީފައިވާ ކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ބުރާސްފަތި ދުވަހު ބުނެފިއެވެ.
އީރާނުގެ ތަސްނީމް ނިއުސް އެޖެންސީން އާންމުކޮށްފައިވާ އައި.އާރު.ޖީ.ސީގެ ބަޔާނެއްގައި ބުނެފައިވަނީ، ބުރާސްފަތި ދުވަހުގެ ފަތިހުގެ ވަގުތެއްގައި އެއް ޓަނުގެ ގޮވާތަކެތި އުފުލުމުގެ ގާބިލުކަން ލިބިފައިވާ "ޚައްރަމްޝަހަރު-4" މަރުކާގެ ވަރުގަދަ މިސައިލްތަކެއް އިޒްރޭލަށް ފޮނުވާލާފައިވާ ކަމަށެވެ. މި ހަމަލާތައް އަމާޒުކޮށްފައިވަނީ ތެލް އަވީވުގެ މެދުތެރެއަށާއި، ބެން ގުރިއަން އެއާޕޯޓުގެ އިތުރުން އެ އެއާޕޯޓުގައި ގާއިމުކޮށްފައިވާ އިޒްރޭލް އެއާފޯސްގެ 27 ވަނަ ސްކޮޑްރަންގެ ބޭހަށް ކަމަށްވެސް އެ ބަޔާނުގައިވެއެވެ.
މީގެ އިތުރުން، ބުރާސްފަތި ދުވަހު އިޒްރޭލުގެ ރާޑަރު ސައިޓެއް ހިމެނޭހެން އެކި ސަރަހައްދުތަކަށް ޑްރޯން ހަމަލާތަކެއް ދީފައިވާ ކަމަށް އީރާނުގެ އަސްކަރިއްޔާ އިން މީގެ ކުރިން ވަނީ ބުނެފައެވެ.
އީރާނުގެ ދައުލަތުގެ މީޑިއާއިން ރިޕޯޓުކޮށްފައިވާ ގޮތުގައި، އެ ގައުމުގެ އަސްކަރިއްޔާއިން ދިން މި ހަމަލާތައް އަމާޒުވެފައިވަނީ ތެލް އަވީވުގެ ސަރަހައްދުތަކަށާއި އިޒްރޭލުގެ އުތުރުގައި ހުންނަ މޭރޮން ރާޑަރު ބޭހަށެވެ.
