މާލޭގައި ތަރައްޤީކުރާ އިންޓަރެކްޓިވް މިއުޒިއަމް މިއަހަރު ހުޅުވަނީ
މާލޭގެ އުސްގެކޮޅާއި ކަޅުވަކަރު މިސްކިތް ހިމެނޭ ސަރަޙައްދުގައި ތަރައްޤީކުރާ އިންޓަރެކްޓިވް މިއުޒިއަމްގެ މަސައްކަތް މިއަހަރު ނިންމައި އާންމުންނަށް ހުޅުވާލުމަށް ސަރުކާރުން ދަނީ މަސައްކަތް ކުރަމުން. ޒަމާނީ ޓެކްނޮލޮޖީ ބޭނުންކޮށްގެން ރާއްޖޭގެ 4000 އަހަރުގެ ދިގު ތާރީޚު ފެންނާނެހެން ފަރުމާކުރާ މި ދާރުލްއާސާރަކީ ތަރިކައިގެ ދާއިރާއިން ރާއްޖެއަށް ބޮޑު އާމްދަނީއެއް ލިބޭނެ ވަސީލަތަކަށް ވެގެންދާނެ ކަމަށް ސާރުކާރުން ބުނޭ
ދިވެހިބަހާއި ސަޤާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް | ރައީސް އޮފީސް
މާލޭގައި އަލަށް ތަރައްޤީކުރާ އިންޓަރެކްޓިވް މިއުޒިއަމްގެ ޢަމަލީ މަސައްކަތްތައް މިއަހަރުގެ ތެރޭގައި އެއްކޮށް ނިންމާލުމަށް މަސައްކަތް ކުރަމުންދާކަމަށް ދިވެހިބަހާއި ސަޤާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ވިދާޅުވެއްޖެ އެވެ.
ވަޒީރު މިހެން ވިދާޅުވީ ރައީސުލްޖުމްހޫރިއްޔާގެ އޮފީހުގައި ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުންނެވެ.
މި މަޝްރޫޢާ ގުޅޭގޮތުން އިތުރު ތަފްސީލު ދެއްވަމުން ވަޒީރު ވިދާޅުވީ، މާލޭގައި ތަރައްޤީކުރާ މި އިންޓަރެކްޓިވް މިއުޒިއަމް ނިމުމުން، މިއީ ތަރިކައިގެ ދާއިރާ އިން ރާއްޖެ އަށް ބޮޑު އާމްދަނީ އެއް ލިބޭނެ ވަސީލަތަކަށް ވެގެންދާނެ ކަމަށެވެ. އަދި މި ތަނުގެ މަސައްކަތް ނިމިގެންދާއިރު، ރާއްޖޭގެ ފަންނީ ދާރުލްއާސާރުގެ ދާއިރާ އަށް މުޅިން އައު އިންގިލާބީ ބަދަލެއް އަންނާނެކަން ވެސް ވަޒީރު ފާހަގަކުރެއްވި އެވެ. ސަރުކާރުގެ އަމާޒަކީ މި މިއުޒިއަމްގެ މަސައްކަތްތައް ހަލުވިކޮށް، މިއަހަރުގެ ތެރޭގައި އާންމުންނަށް ހުޅުވާލުމެވެ.
އިންޓްރެކްޓިވް މިއުޒިއަމްގެ މަސައްކަތް މިހާރު ޢަމަލީ ގޮތުން ކުރިއަށްމިދަނީ. ކުރިއަށްއޮތް މަހެއްހާ ދުވަސްތެރޭ މަސައްކަތް މާބޮޑަށް ހަލުވިވެގެންދާނެ. އަޅުގަނޑުމެން އުއްމީދުމިކުރަނީ މިއަހަރުތެރޭ މުޅި މަސައްކަތް ވެސް ނިންމާލުމަށްދިވެހިބަހާއި ސަޤާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް
ވަޒީރު އާދަމް ނަސީރު ވިދާޅުވީ މިއީ ރާއްޖޭގެ ތާރީޚުގައި ވެސް މިފަދަ ގޮތަކަށް ބިނާކުރެވޭ ފުރަތަމަ ދާރުލްއާސާރު ކަމަށާއި މި ތަނުގެ އެންމެ ހާއްސަ އެއް ކަމަކީ، ޒަމާނީ ޓެކްނޮލޮޖީގެ އެހީގައި ދިވެހިން މި ކަނޑުގެ ސަރަޙައްދުގައި ވޭތުކުރި 4000 އެއްހާ އަހަރުގެ ދިގު ތާރީޚު ފެންނާނެހެން ފަރުމާކޮށްފައިވުން ކަމުގަ އެވެ. މީގެ ސަބަބުން ދިވެހިންގެ މުއްސަނދި ސަޤާފަތާއި ތާރީޚު އީޖާދީ ގޮތެއްގައި ތަޖުރިބާކޮށްލުމުގެ ފުރުސަތު ޒިޔާރަތްކުރާ ފަރާތްތަކަށް ލިބިގެންދާނެ ކަމަށް ވަޒީރު ވިދާޅުވި އެވެ.
މިތަން ނިމޭއިރު މިތަން ވާނެ ރާއްޖޭގެ ތާރީޚުގަ ބިނާކުރެވޭ ފުރަތަމަ ދާރުލްއާސާރަށް. މާނައަކީ ދިވެހިން މި ކަނޑުގަ 4000އެއްހާ ދުވަސް ހޭދަކުރި ގޮތާއި، އޭގަ ދިވެހިން ކުރި ތަޖުރިބާތައް މިތަނުގެ ތެރެއިން ހިއްސާކުރެވޭނެ ތަޖުރިބާކުރެވޭނެ، އަދި ޒަމާނީ ޓެކްނޮލޮޖީގެ އެހީގައި މި ދެންނެވި ކަންކަން ސީދާ އަމިއްލަ އިހުސާސްތަކާ ގުޅުވާލެވޭގޮތަށް މިތަން ތަރައްޤީކުރެވެނީދިވެހިބަހާއި ސަޤާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް
މި އިންޓަރެކްޓިވް މިއުޒިއަމް ތަރައްޤީކުރަނީ މާލޭގެ އުސްގެކޮޅާއި، ކަޅުވަކަރު މިސްކިތް ހުރި ސަރަޙައްދު ހިމެނޭހެންނެވެ. މިއީ އީޖާދީ ވިސްނުންތަކާއި ޒަމާނީ ވަސީލަތްތައް ބޭނުންކޮށްގެން ދިވެހި ތާރީޚާއި ތަރިކަ ދިރިހުރި ސިފައެއްގައި ތަޖުރިބާކުރެވޭނެ ގޮތަށް ފަރުމާކުރާ ތަނެކެވެ. ޒަމާނީ ޓެކްނޮލޮޖީގެ އެހީގައި ތަރިކަ ތަޖުރިބާ ކުރެވޭ ގޮތަށް އުސްގެކޮޅު ތަރައްޤީކުރުމުގެ މަސައްކަތް ހެރިޓޭޖް މިނިސްޓްރީން ފަށާފައިވަނީ މިއަހަރުގެ ޖަނަވަރީ މަހުގެ ތެރޭގަ އެވެ.
މިނިސްޓަރު އާދަމް ނަސީރު މީގެ ކުރިންވެސް ވިދާޅުވެފައިވާ ގޮތުގައި، މި މިއުޒިއަމް ތަރައްޤީކޮށް ނިމުމުން ރާއްޖޭގެ ތަރިކައިގެ ދާއިރާއަކީ ހަމައެކަނި ތާރީޚު ރައްކާކުރާ ތަނެއްގެ ބަދަލުގައި، އިޤްތިޞާދީ ގޮތުންވެސް ފައިދާހުރި، އާމްދަނީ ލިބޭނެ ދާއިރާއަކަށް ބަދަލުވެގެންދާނެ އެވެ. މިއީ ރާއްޖޭގެ ފަތުރުވެރިކަމަށާއި ސަޤާފީ ތަރިކައަށް ލިބިގެންދާނެ ވަރަށް ބޮޑު ކުރިއެރުމެއްގެ ގޮތުގައި ސަރުކާރުން ދެކެއެވެ.
