ރަމަޟާން މަހުގެ ފަހު ދިހެއް ގައި ޑީއެންއާރުން 4 ދުވަހު ޚިދުމަތް ދޭނެ
ރަމަޟާން މަހުގެ ފަހު ދިހައެއް ގައި އައިޑީކާޑު ދޫކުރުމުގެ ޚިދުމަތް މި ހިނގާ މާރިޗް މަހުގެ 11، 15، 17 އަދި 19 ވަނަ ދުވަހުގެ ހެނދުނު 9:00 އިން މެންދުރު 13:00 އަށް ދިނުމަށް ޑީއެންއާރުން ވަނީ ނިންމާފަ. މާލެ ސަރަހައްދުގެ ހަތަރު ތަނަކުން މި ޚިދުމަތް ލިބޭނެ އިންތިޒާމު ހަމަޖައްސާފައިވާއިރު، ކުއްލި ހާލަތްތަކުގައި 7280368 ނަންބަރަށް ގުޅައިގެން ޚިދުމަތް ހޯދޭނެ. ސަރުކާރު ބަންދު މި ދުވަސްތަކުގައި ކާޑު ދޫކުރާނީ މާލޭގެ ހެޑް އޮފީހުގެ އިތުރުން ހުޅުމާލޭގެ ދެ ފިޔަވައްސާއި ވިލިމާލޭގަ.
ޑީއެންއާރް އިން ބުނެފައިވަނީ، ރޯދަ މަހުގެ ފަހު 10 ގައި ދިވެހި ރައްޔިތެއްކަން އަންގައިދޭ ކާޑު ދޫކުރުމުގެ ޚިދުމަތް ދޭނީ މި މަހުގެ 11 ވަނަ ދުވަހާއި 15 އާއި 17 އާއި 19 ގައި ކަމަށް | މިހާރު
މި އަހަރުގެ ރަމަޟާން މަހުގެ ފަހު ދިހައެއް، ސަރުކާރު ބަންދު ދުވަސްތަކެއްގެ ގޮތުގައި ކަނޑައަޅާފައިވާތީ، އެ ދުވަސްތަކުގެ ތެރެއިން ޑިޕާޓްމެންޓް އޮފް ނެޝަނަލް ރެޖިސްޓްރޭޝަން (ޑީއެންއާރް) އިން ޚިދުމަތް ދޭނެ ވަގުތުތަކާއި ދުވަސްތައް އެ އިދާރާއިން އަންގާރަ ދުވަހު އިއުލާނުކޮށްފި އެވެ.
ޑީއެންއާރް އިން ނެރުނު އިއުލާނެއްގައި ބުނެފައިވަނީ، ރަމަޟާން މަހުގެ ފަހު 10 ގައި ދިވެހި ރައްޔިތެއްކަން އަންގައިދޭ ކާޑު ދޫކުރުމުގެ ޚިދުމަތް ދިނުމަށް ހަމަޖެހިފައިވަނީ މި މަހުގެ 11، 15، 17 އަދި 19 ވަނަ ދުވަހު ކަމަށެވެ. މި ހަތަރު ދުވަހުވެސް އައިޑީކާޑު ދޫކުރުމުގެ ޚިދުމަތް ކުރިއަށްދާނީ ހެނދުނު 9:00 އިން މެންދުރުފަހު 13:00 އަށެވެ.
މި ދުވަސްތަކުގައި މާލެ ސަރަހައްދުގެ ހަތަރު ތަނަކުން އައިޑީކާޑު ދޫކުރުމުގެ އިންތިޒާމު ވަނީ ހަމަޖައްސާ ފައެވެ. އެގޮތުން މާލޭގައި ހުންނަ ޑީއެންއާރުގެ ހެޑް އޮފީހުގެ އިތުރުން، ހުޅުމާލޭ ފުރަތަމަ ފިޔަވަހީގައި ހުންނަ އުމަރު ޒާހިރު ބިލްޑިންގ އާއި، ހުޅުމާލޭ ދެވަނަ ފިޔަވަހީގެ ވިނަރެސް ޓަވަރު 2 އިން ވެސް ކާޑު ދޫކުރާނެ އެވެ. މީގެ އިތުރުން ވިލިމާލޭގައި ހުންނަ ޑީއެންއާރުގެ އޮފީހުން ވެސް މި ޚިދުމަތް ލިބޭނެ ކަމަށް އެ އިދާރާ އިން ބުނެ އެވެ.
ޑީއެންއާރް އިން އިތުރަށް ބުނެފައިވަނީ، ސަރުކާރު ބަންދު މި ދުވަސްތަކުގެ ތެރޭގައި ދިމާވާ ކުއްލި ނުވަތަ އިމަޖެންސީ ހާލަތްތަކުގައި ޚިދުމަތް ހޯދުމަށް އެ ޑިޕާޓްމެންޓުގެ ނަންބަރު 7280368 އަށް ގުޅުމުން އިންތިޒާމުތައް ހަމަޖެހިގެންދާނެ ކަމަށެވެ.
