އެފްއައިޔޫގެ އިސްވެރިޔަކަށް އިޝާން އައްޔަނުކޮށްފި
އެންމެ ފަހުން އެފްއައިޔޫގެ ވެރިއަކަށް ހުންނެވި އިސްމާއީލް ސާޖިދު މަގާމުން ވަކި ކުރެއްވީ ޖިންސީ ފުރައްސާރައިގެ މައްސަލަ ސާބިތުވާ ކަމަށް ނިންމާފަ. ނަމަވެސް ސާޖިދު އެ ތުހުމަތަށް އިންކާރުކުރައްވާ. އަދި މައްސަލަ ވަނީ ކަމާ ބެހޭ އިދާރާއަށް ހުށައަޅާފަ. ސާޖިދު އެފްއައިޔޫގެ ވެރިއަކަށް އައްޔަން ކުރެއްވީ، ސަރުކާރު ހިންގާ ޕީއެންސީގެ ޕާލަމެންޓްރީ ގުރޫޕުގެ ސީނިއާ ޑެޕިއުޓީ ލީޑަރު، އިބްރާހީމް ޝުޖާއު (ޝުޖާ)އަށް ތުހުމަތަކެއް ކުރެވޭ، ފައިނޭންޝިއަލް އިންޓެލިޖެންސް ރިޕޯޓެއް ލީކް ވެފައި ވަނިކޮށް، އެފްއައިޔޫގެ އޭރުގެ ވެރިއަކަށް ހުންނެވި އަބްދުﷲ އަޝްރަފް މަގާމުން ދުރުކޮށްފަ.
އެފްއައިޔޫ އަށް އަލަށް އައްޔަނުކުރެވުނު އިސް ވެރިޔާ މުޙައްމަދު އިޝާން | އެމްއެމްއޭ
މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ) ގެ އިސްވެރިޔާގެ މަގާމަށް މުހައްމަދު އިޝާން ބުރާސްފަތި ދުވަހު އައްޔަނުކޮށްފި އެވެ.
އެމްއެމްއޭ އިން ބުނި ގޮތުގައި އިޝާން މި މަގާމަށް ހޮވުނީ، އެފްއައިޔޫގެ ވެރިޔާގެ މަގާމަށް ކުރިމަތިލުމަށް އެ އޮތޯރިޓީގެ މުވައްޒަފުންގެ ތެރެއިން ހުޅުވާލި ފުރުސަތުގައި ކުރިމަތިލި ފަރާތްތަކާ އިންޓަވިއު ކުރުމަށްފަހު އެވެ.
އެފްއައިޔޫގެ އާ ވެރިޔާ އިޝާން އަކީ މާލީ ދާއިރާއިން މަތީ ތައުލީމު ހާސިލުކުރައްވައިގެން ހުންނެވި ތަޖުރިބާކާރު ޗާޓާޑު އެކައުންޓަންޓެކެވެ. އޭނާ އަކީ އިނގިރޭސިވިލާތުގެ ޗާޓާޑް އިންސްޓިޓިއުޓް އޮފް މެނޭޖްމަންޓް އެކައުންޓަންޓްސް (ސީއައިއެމްއޭ) ގެ އެސޯސިއޭޓް މެންބަރެއްގެ އިތުރުން، އިންސްޓިޓިއުޓް އޮފް ޗާޓާޑް އެކައުންޓަންޓްސް އޮފް ދަ މޯލްޑިވްސްގެ ވެސް އެފިލިއޭޓް މެންބަރެކެވެ.
މި މަގާމަށް އައްޔަނުކުރެއްވުމުގެ ކުރިން އިޝާން ވަނީ އެމްއެމްއޭގެ މުހިންމު އެކި މަގާމުތައް ފުރުއްވާފަ އެވެ. އެގޮތުން އެމްއެމްއޭގެ ހެޑް އޮފް ކޯޕަރޭޓް އެކައުންޓްސް ސެކްޝަނާއި، ހެޑް އޮފް ފައިނޭންޝަލް ކޮންޓްރޯލްސް ޑިވިޝަންގެ މަގާމު އޭނާ ވަނީ އަދާކުރައްވާފަ އެވެ.
ފައިނޭންޝަލް އިންޓެލިޖެންސް ޔުނިޓަކީ މަނީ ލޯންޑަރިން އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ގާނޫނުގެ ދަށުން އެމްއެމްއޭ ގައި ގާއިމުކޮށްފައިވާ މިނިވަން ޔުނިޓެކެވެ. މި ޔުނިޓުގެ މައިގަނޑު މަސްއޫލިއްޔަތަކީ މަނީ ލޯންޑަރިންނާއި ޓެރަރިޒަމަށް ފައިނޭންސް ކުރުމުގެ މައްސަލަތައް ދެނެގަނެ، އެފަދަ މައުލޫމާތުތައް ކަމާބެހޭ ފަރާތްތަކާ ހިއްސާކުރުމެވެ. ގާނޫނު ބުނާގޮތުން މި ޔުނިޓުގެ ވެރިޔާ އައްޔަނުކުރުމާއި ވަކިކުރުމުގެ ފުރިހަމަ ބާރު އޮންނަނީ މަރުކަޒީ ބޭންކުގެ ގަވަރުނަރަށެވެ.
އެފްއައިޔޫގެ ވެރިޔާގެ މަގާމު ހުސްވީ އެ މަގާމުގައި ކުރިން ހުންނެވި އިސްމާއިލް ސާޖިދު މަގާމުން ވަކިކުރުމާ ގުޅިގެންނެވެ. މައުލޫމާތު ލިބިފައިވާ ގޮތުގައި ސާޖިދު މަގާމުން ވަކިކޮށްފައިވަނީ ޖިންސީ ފުރައްސާރައިގެ ތުހުމަތެއްގަ އެވެ. ނަމަވެސް އޭނާ ވަނީ އެ ނިންމުމާ މެދު ހިތްހަމަނުޖެހި، ވަޒީފާއާބެހޭ ޓްރައިބިއުނަލަށް އެމްއެމްއޭއާ ދެކޮޅަށް މައްސަލަ ހުށަހަޅާފަ އެވެ. ސާޖިދު އެފްއައިޔޫގެ ވެރިއަކަށް އައްޔަން ކުރެއްވީ، ސަރުކާރު ހިންގާ ޕީއެންސީގެ ޕާލަމެންޓްރީ ގުރޫޕުގެ ސީނިއާ ޑެޕިއުޓީ ލީޑަރު، އިބްރާހީމް ޝުޖާއު (ޝުޖާ)އަށް ތުހުމަތަކެއް ކުރެވޭ، ފައިނޭންޝިއަލް އިންޓެލިޖެންސް ރިޕޯޓެއް ލީކް ވެފައި ވަނިކޮށް، އެފްއައިޔޫގެ އޭރުގެ ވެރިއަކަށް ހުންނެވި އަބްދުﷲ އަޝްރަފް މަގާމުން ދުރުކޮށްފަ އެވެ.
އިޝާން މި މަގާމާ ހަވާލުވެވަޑައިގަތީ އެ މަގާމު ހުސްކޮށް އޮންނަތާ ދުވަސްތަކެއް ވުމަށްފަހު އެވެ.
