އެމްއެމްއޭ ގެ 3 އެޑްވައިޒަރުން މަގާމުން ވަކިކޮށް، މަގާމުވެސް އުވާލައިފި!
18 ފެބުރުއަރީ 2026 | ބުދަ 08:20އެމްއެމްއޭ ގެ އޮނިގަނޑަށް ގެނައި ބަދަލަކާ ގުޅިގެން، އެ އޮތޯރިޓީގައި 25 އަހަރަށް ވުރެ ގިނަ ދުވަހު ޚިދުމަތް ކުރެއްވި ތިން އެޑްވައިޒަރަކު ވަނީ މަގާމުން ވަކިކޮށްފަ. މި ބަދަލު ގެނެސްފައި ވަނީ ޕެންޝަން ފަންޑު މެދުވެރިކޮށް 2.4 ބިލިއަން ރުފިޔާގެ މުއާމަލާތެއް ހިންގުމަށް ސަރުކާރުން ތައްޔާރުވަމުންދާ ދަނޑިވަޅެއްގަ. ފައިސާ ޗާޕުކުރުމުގެ އަމަލެއްގެ ގޮތުގައި ސިފަކުރެވޭ މި މުއާމަލާތާ ގުޅިގެން އުފެދުނު ޚިޔާލުތަފާތުވުންތަކުގައި ޕެންޝަން އޮފީހުގެ އިސްވެރިންތަކެއް ވެސް ވަނީ ދާދިފަހުން އިސްތިއުފާ ދެއްވާފަ.
މަރިޔަމް ޝިފާ، އިދުހާމް ހުސައިން، މަރިޔަމް ހުސެން ދީދީ | ރާއްޖެ އެމްވީ
މަރުކަޒީ ބޭންކް (އެމްއެމްއޭ) ގެ އެޑްވައިޒަރުންގެ މަގާމުގައި ތިއްބެވި 3 ބޭފުޅުން މަގާމުން ވަކިކޮށް އެ މަގާމު ވެސް އުވާލައިފި އެވެ.
އެމްއެމްއޭ ގެ ބޯޑުން ވަނީ އެ އޮތޯރިޓީ ގެ އެތެރޭގެ އޮނިގަނޑަށް ބަދަލުތަކެއް ގެނެސް އެޑްވައިޒަރުންގެ ދައުރު އުވާލަން އަންގާރަ ދުވަހު ނިންމާފަ އެވެ. އަދި އެ ނިންމުމާ ގުޅިގެން އެމްއެމްއޭ ގެ ގަވަރުނަރުގެ އެޑްވައިޒަރުން ގެ ގޮތުގައި ތިއްބެވި 3 ބޭފުޅުން ވަނީ މަގާމުން ވަކި ކޮށްފަ އެވެ. މިކަން އެ އޮތޯރިޓީގެ އޮފިޝަލަކު ވަނީ ރާއްޖޓީވީ އަށް ކަށަވަރު ކޮށްދީފަ އެވެ.
އެ މަގާމުން ވަކި ކޮށްފައިވާ ތިން ބޭފުޅުންނަކީ މަރިޔަމް ހުސެން ދީދީ އާއި އިދުހާމް ހުސެން ގެ އިތުރުން މަރިޔަމް ޝިފާ އެވެ. މި 3 ބޭފުޅުންނަކީ ވެސް އެ އޮތޯރިޓީގައި ގިނަ އަހަރުތަކެއް ޚިދުމަތް ކުރައްވާފައިވާ 3 ބޭފުޅުންނެވެ. އެގޮތުން 3 ބޭފުޅުން ވެސް ވަނީ އެމްއެމްއޭ އަށް 25 އަހަރަށް ވުރެ ގިނަ ދުވަހު ޚިދުމަތް ކުރައްވާފަ އެވެ.
މި ނިންމުން ނިންމާ އެމްއެމްއޭ އިން ވަނީ އެޑްވައިޒަރުންނަށް ނޯޓިސްދީ، ދެ އިޚުތިޔާރެއް ދީފަ އެވެ. އެއީ ތިން މަސްދުވަހު ވަޒީފާގައި ދެމިހުރުމާއެކު އިތުރު ތިން މަސް ދުވަހުގެ މުސާރާއާއި އިނާޔަތާއެކު މަގާމު އުވިގެންދިއުމެވެ. ނުވަތަ ނޯޓިސް މުއްދަތުގެ ބަދަލުގައި 6 މަސް ދުވަހުގެ ފައިސާއާއި އިނާޔާތްތައް ލިބޭ ގޮތަށް މަގާމު އުވާލުމެވެ.
މި މަގާމު އުވާލާފައި މިވަނީ ރައީސް ޑރ. މުހައްމަދު މުއިއްޒުގެ ސަރުކާރުން ހީލަތްތެރި ގޮތަކަށް ފައިސާ ޗާޕުކުރުމުގެ ގޮތުން ކުރިއަށް ގެންދަން އުޅޭ 2.4 ބިލިއަން ބިލިއަން ރުފިޔާގެ ފައިސާ ޗާޕުކުރުމުގެ މުއާމަލާތް ކުރިއަށް ގެންދަން ނިންމާފައިވާ ދަނޑިވަޅެއްގަ އެވެ.
މި މުއާމަލާތުގައި ޕެންޝަން އޮފީހުން ފައިސާ ހޯދަން ނިންމާފައި ވަނީ ކުރިން ގަނެފައިވާ ބޮންޑުތަކެއް މޯލްޑިވްސް މަނިޓަރީ އޮތޯރިޓީ އަށް ވިއްކާލައިގެންނެވެ. އެމްއެމްއޭ އިން ލިބޭ ފައިސާ ޕެންޝަން އޮފީހުން އިންވެސްޓު ކުރާނީ ސަރުކާރުން ވިއްކާ ދިގު މުއްދަތުގެ ބޮންޑަކަށެވެ.
މި މުއާމަލާތުން ދައުލަތަށް އިޔާދަ ނުކުރޭ ވަރުގެ ބޮޑު އިގްތިސާދީ ގެއްލުން ލިބޭނެ ކަމަށް ބުނެ، އެކަމާ ދެކޮޅު ހައްދަވައި ޕެންޝަން ޗެއާޕަރސަން ޑރ. އަޙްމަދު އިނާޒްގެ އިތުރުން، ސީއީއޯ ސުޖާތާ ހަލީމާއި ސީއެފްއޯ ހައްވާ ފަޖުވާއާއި އެ އޮފީހުގެ ބޯޑުގައި އަމިއްލަ ވިޔަފާރިތައް ތަމުސީލުކުރެއްވި މެންބަރު ސަރުވަޝް އާދަމް ވެސް ވަނީ އިސްތިއުފާ ދެއްވާފަ އެވެ. ޕެންޝަން ފަންޑުގައި 2.4 ބިލިއަން ރުފިޔާ ނެތްއިރު، އެމްއެމްއޭ އިން ފައިސާ ހޯދައިގެން މިކަން ކުރާނަމަ ކުރެވޭނީ ފައިސާ ޗާޕުކޮށް ގެން ކަމަށް އެ ބޭފުޅުން ވަނީ ވިދާޅުވެފަ އެވެ.
މިކަމާ ގުޅޭގޮތުން އެމްއެމްއޭ ގެ ރަސްމީ ބަހެއް ލިބޭގޮތް ވަނީ ނުވެފައެވެ.
