100ރ. ގެ އައު ނޫޓު ޗާޕް ކޮށްގެން ގެނައިތާ ކުޑަ ދުވަސްކޮޅެއްގެ ތެރޭގައި 20ރ. އައު ސްޓޮކެއް ގެނެސްފި

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބޭނުން ކުރަމުންދާ ނޫޓު ސީރީޒްގެ 20 ރުފިޔާގެ އައު ސްޓޮކެއް ގެނެސްފި އެވެ.

އެމްއެމްއޭއިން ބުނީ، ރަން ދިހަފަހެއް ނޫޓް ސީރީޒްގެ ނޫޓުތަކުގެ ތެރެއިން 20 ރުފިޔާގެ ނޫޓުގެ ސްޓޮކް މަދުވުމުގެ ސަބަބުން 15 ފެބްރުއަރީ 2026 ގައި އައު ސްޓޮކެއް ގެނެސްފައިވާ ކަމަށެވެ.  

20 ރުފިޔާގެ އައު ސްޓޮކެއް ގެނެސްފައިވާއިރު، މި މަހުގެ ދެވަނަ ދުވަހު 100 ރުފިޔާގެ އައު ސްޓޮކެއް ވެސް ގެނެސްފައިވެ އެވެ. އަދި 100 ރުފިޔާގެ ނޫޓުގެ ސްޓޮކް ވެސް ގެނެސްފައިވަނީ 100 ރުފިޔާ މަދުވުމުގެ ސަބަބުން ކަމަށް އެމްއެމްއޭއިން ބުންޏެވެ. 

ފައިސާގެ ނޫޓުތަކުގެ ސްޓޮކް މަދުވާ ހާލަތް ތަކުގައި އައު ސްޓޮކް ޕްރިންޓް ކޮށްގެން ގެނައުމަކީ އެމްއެމްއޭއިން އާއްމު އުސޫލު ކުރާ ކަމެއް ކަމަށް އެމްއެމްއޭ އިން ބުނެ އެވެ. މިއީ އިގްތިސާދުގެ ތެރެއަށް އިތުރަށް ފައިސާ ނެރުމެއް ނޫން ކަމަށާއި، މިއީ ހަމައެކަނި ބޭނުން ކުރަމުންދާ ފައިސާގެ ސްޓޮކް ދެމެހެއްޓުމަށް ކުރާ މަސައްކަތެއް ކަމަށް އެމްއެމްއޭ އިން ބުންޏެވެ. 

ނަމަވެސް ކުރިއަށް އޮތީ ލޯކަލް ކައުންސިލް އިންތިޚާބަށް ވެފައި، މިހާރު ވެސް އިންތިޚާބަށް ނުފޫޒު ފޯރުވުމަށް ބޮޑެތި އަދަދުތަކުން ފައިސާ ހުށަހަޅާ ކަމަށް އަޑުތައް ފެތުރިފައިވަނިކޮށް ފައިސާގެ އެކިއެކި ނޫޓްތައް ސްޓޮކްގެ ގޮތުގައި އެތެރެ ކުރަމުންދާތީ ބައެއް މީހުން ދަނީ އެކަމާމެދު ސުވާލު އުފައްދަމުންނެވެ.