ސުކޫކް އަނބުރާ ދައްކަންޖެހޭ މުއްދަތު ކައިރިވެފައިވަނިކޮށް ސަރުކާރު ހިންގަން ޚަރަދުތައް ހަމަ ޖައްސަން ޕެންޝަން އޮފީހަށް މަޖުބޫރުކުރުވުމަކީ ވަރަށް ނުރައްކާތެރި ފިޔަވަޅެއް: ކުރީގެ މިނިސްޓަރ އަމީރު

މޯލްޑިވްސް މަނިޓަރީ އޮތޯރިޓީ (އެމްއެމްއޭ) މެދުވެރިކޮށް ފައިސާ ޗާޕުކޮށްގެން، ސަރުކާރުގެ ހިންގުމުގެ ޚަރަދުތައް ހަމަޖެއްސުމަށް ޕެންޝަން އޮފީހަށް މަޖުބޫރުކުރުވުމަކީ، ހާއްސަކޮށް ސުކޫކް އަނބުރާ ދައްކަންޖެހޭ މުއްދަތު ކައިރިވެފައިވަނިކޮށް އެޅި ނުރައްކާތެރި ފިޔަވަޅެއް ކަމަށް އެމްޑީޕީ ސަރުކާރުގެ ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެ އެވެ.

އަންގާރަ ދުވަހު އެކްސް ގައި ކުރެއްވި ޕޯސްޓެއް ގައި އަމީރު ވިދާޅުވީ، މީގެ އިތުރުން، ސަރުކާރުން ގެންގުޅޭ ދެފުށް ނުފެންނަ ސިޔާސަތުތަކުގެ ސަބަބުން، އިންވެސްޓަރުންގެ އިތުބާރު ވަނީ އިތުރަށް ގެއްލިފައިވާ ކަމަށެވެ.

އަމީރު ވިދާޅުވީ، މިހާރު ކުރިމަތިވެފައިވާ މާލީ އަދި އިގްތިސާދީ ކާރިސާއަކީ މުޅިން ސަލާމަތްވެވެން އޮތް ކަމެކެވެ. ކޮންމެ ސަރުކާރެއްގެ ވެސް ދަރަނި މެނޭޖުކުރުމުގެ ސިޔާސަތުގެ މައިގަނޑު އަސާސަކަށް ވާންޖެހޭނީ ދުރާލާ ރޭވުންތެރިކަމާއެކު ދަރަނި ބެލެހެއްޓުމެވެ. ދައުލަތުގެ މާލީ ހާލަތު ގޯސްވެ، ހިންގުމުގެ ޚަރަދުތައް އިންތިހާއަށް ބޮޑުވެ، އަދި އިގްތިސާދީ ކުރިއެރުމެއް ފެންނަން ނެތް ހާލަތެއްގައި، ދަރަނި އަދާކުރުމަށް އެންމެ ފަހު ވަގުތާ ޖެހެންދެން މަޑުކުރުމަކީ ބޮޑު ހަލާކަކަށް މަގުފަހިވާނެ ކަމެއް ކަމަށް ވެސް އޭނާ ވިދާޅުވި އެވެ.

"އަޅުގަނޑުމެންގެ ސަރުކާރުގައި 2021 ވަނަ އަހަރު "ސަނީ ސައިޑް" ބޮންޑުގެ މައްސަލަ ދުރާލާ ހައްލުކޮށް، ދުރުވިސްނޭ ސިޔާސަތެއް ގެންގުޅުނުކަން ވަނީ ސާބިތުކޮށްދީފައެވެ."

އަމީރު އިތުރަށް ވިދާޅުވި ގޮތުގައި ޖޫން 2022 ގައި މުއްދަތު ހަމަވި 250 މިލިއަން އެމެރިކާ ޑޮލަރުގެ ބޮންޑު، ކޮވިޑް-19 ގެ ސަބަބުން އިގްތިސާދަށް ކުރިމަތިވި ގޮންޖެހުންތަކާއެކު ވެސް، ދުރާލާ ދަރަނި މެނޭޖުކުރުމުގެ ސިޔާސަތުގެ ދަށުން ގާތްގަނޑަކަށް 200 މިލިއަން ޑޮލަރު ވަނީ މުއްދަތު ހަމަވުމުގެ އަހަރެއްހާ ދުވަސް ކުރިން އަނބުރާ ދައްކާފައެވެ. އެހެންކަމުން، ބޮންޑުގެ މުއްދަތު ހަމަވިއިރު ބާކީ އޮތީ އެންމެ 50 މިލިއަން ޑޮލަރު ކަމަށާއި، މީގެ އިތުރުން، މާލީ ނިޒާމު ހަރުދަނާކުރުމަށާއި، ދަރަނި ބެލެހެއްޓުން ރަނގަޅުކުރުމަށް ގާނޫނީ އަދި އިންސްޓިޓިއުޝަނަލް އިސްލާހުތައް ގެނެސް، މެދު ރާސްތާގެ ހަމަޖެހުމަށްޓަކައި އިތުބާރު ހުރި އިގްތިސާދީ ސިޔާސަތުތަކެއް ކުރީ ސަރުކާރުން ތަންފީޒުކުރި ކަމަށް ވެސް އަމީރު ވިދާޅުވި އެވެ.

ނަމަވެސް، މިހާރުގެ ސަރުކާރުން ވަނީ މި އުސޫލުތަކާ ދުރަށް ޖެހިފައި ކަމަށާއި ބައިނަލްއަގުވާމީ އިންވެސްޓަރުންނާއި، ތަރައްގީގެ ބައިވެރިން އަދި މާލީ އިދާރާތަކާ އޮންނަ ގުޅުން މި ސަރުކާރުން ވަނީ އެއްފަރާތްކޮށްފައި ކަމަށާއި، މިއީ ކާރިސާގެ ވަގުތުތަކުގައި ގައުމަށް އެންމެ ބޮޑަށް އެހީތެރިވެދެވޭނެ ފަރާތްތައް ކަން އަމީރު ފާހަގަ ކުރެއްވި އެވެ. ދައުލަތުގެ މާލިއްޔަތާއި ދަރަނި ބެލެހެއްޓުމުގެ ނިޒާމު ބަލިކަށިވެ، ފިނޭންސް މިނިސްޓްރީގެ ބާރުތައް ވަނީ ކުޑަކޮށްފައި ކަމަށް އަމީރު ވިދާޅުވި އެވެ. ސިޔާސީ ސަބަބުތަކަށްޓަކައި ތަޖުރިބާކާރު ފަންނީ މުވައްޒަފުން އެއްފަރާތް ކުރުމުގެ ސަބަބުން، އެންމެ ބޮޑަށް ފަންނީ އެހީތެރިކަން ބޭނުންވި ވަގުތު މުއައްސަސާތަކުގެ ގާބިލުކަން ވަނީ ގެއްލިފައި ކަމަށާއި އެކަށީގެންވާ ދިރާސާއެއް ނުވަތަ މަޝްވަރާއެއް ނެތި، ހަމައެކަނި ސިޔާސީ މަގުސަދުގައި ނިންމާ ކުއްލި ނިންމުންތަކުގެ ސަބަބުން މައްސަލަތައް ވަނީ އިތުރަށް ގޯސްވެފައި ކަން އަމީރު ފާހަގަ ކުރެއްވި އެވެ.

ސުކޫކް އަނބުރާ ދައްކަން ދެ މަސްދުވަހަށް ވުރެ ކުޑަދުވަސްކޮޅަކަށް ވެފައިވަނިކޮށް، ފައިސާ ހޯދުމަށް އެންމެ ފަހު ވަގުތާ ޖެހެންދެން ސަރުކާރުން މަޑުކޮށްގެން ނުވާނެ ކަމަށް އަމީރު ވިދާޅުވި އެވެ. މި ލަސްވުމުގެ ސަބަބުން، ދައުލަތް މިއަދު މިވަނީ ފައިސާ ދޭ ފަރާތްތަކުގެ މުށުތެރޭގައި ކަމަށާއި، މިއީ މުޅިން ސަލާމަތްވެވެން އޮތް ކާރިސާއެއް ކަމަށް އަމީރު ވިދާޅުވި އެވެ.

އަމީރު ފާހަގަ ކުރެއްވި ގޮތުގައި މިހާރުން މިހާރަށް މިސްރާބު ބަދަލުކޮށް، އިތުބާރު ހުރި އިސްލާހީ ފިޔަވަޅުތަކެއް އަޅައި، މާކެޓާ ގުޅުން ބަދަހިކޮށް، ފަންނީ ގޮތެއްގައި ދަރަނި ބެލެހެއްޓުން އަލުން ގާއިމުނުކޮށްފިނަމަ، ހަމައެކަނި އުންމީދެއްގެ މައްޗަށް ނުވަތަ "ސްކޭމް" ފަދަ ފައިސާ ހޯދުމުގެ ހުށަހެޅުންތަކަށް ބަރޯސާވުމުން ލިބޭ ގެއްލުން ހަލުވިވާނެއެވެ.

"އެންމެ ކަންބޮޑުވާ ކަމަކީ، ގައުމުން މިކަމުގެ އަގު އަދާކުރަމުންދާއިރު ވެސް، ހާލަތުގެ ނުރައްކާތެރިކަން މި ސަރުކާރަށް އަދިވެސް ފަހުމް ނުވުމެވެ،" އަމީރު ވިދާޅުވި އެވެ.