އިގްތިސާދީ މާހިރުން ކަންބޮޑުވުން ފާޅުކުރައްވަމުން ގެންދަވާ ފައިސާ ޗާޕް ކުރުމުގެ މުއާމަލާތް، ޕެންޝަން ފަންޑުން ދިފާއުކޮށްފި
ޕެންޝަން އޮފީހުން ގަނެފައިވާ ބޮންޑުތަކެއް އެމްއެމްއޭއަށް ވިއްކާލުމަށްފަހު، އެ ފައިސާ ފިނޭންސް މިނިސްޓްރީގެ އާ ބޮންޑަކަށް އިންވެސްޓުކުރާ ގޮތަށް ހިންގަން އުޅޭ 2.4 ބިލިއަން ރުފިޔާގެ މުއާމަލާތާ މެދު ގިނަ ބަޔަކު ކަންބޮޑުވުން ފާޅުކުރަމުން ދަނިކޮށް އެ މުއާމަލާތް އެ އޮފީހުން ދިފާއުކޮށްފި.
ފައިސާ ޗާޕް ނުކުރައްވާނެ ކަމަށް ތަކުރާރުކޮށް ވިދާޅުވުމަށް ފަހު، ރައީސް މުއިއްޒު ހީލަތްތެރި ގޮތަކަށް ފައިސާ ޗާޕް ކުރުމުގެ މަސައްކަތް ކުރާ ކަމަށް ގިނަ ބަޔަކު ތުހުމަތު ކުރޭ | ރާއްޖެ އެމްވީ
ފައިސާ ޗާޕުކުރުމުގެ މުއާމަލާތަކީ ގެއްލުން ބޮޑު މުއާމަލާތެއް ކަމަށް ބުނެ ޕެންޝަން ބޯޑުގެ ޗެއަރމަނަކަށް ހުންނެވި އަހުމަދު އިނާޒް އިސްތުއުފާ ދެއްވާފައިވަނިކޮށް، ރައީސް ޑރ. މުހައްމަދު މުއިއްޒުގެ ސަރުކާރުން ކުރިއަށް ގެންދަން އުޅޭ 2.4 ބިލިއަން ރުފިޔާގެ ފައިސާ ޗާޕުކުރުމުގެ މުއާމަލާތް ޕެންޝަން އޮފީހުން ދިފާއުކޮށްފި އެވެ.
ޕެންޝަން އޮފީހުގެ ބޯޑުން މި މުއާމަލާތަށް ރުހުން ދެއްވީ ހޯމަ ދުވަހު އެވެ. މިކަމާ ގުޅިގެން އިގްތިސާދީ މާހިރުން ހިމެނޭހެން ގިނަ ބައެއްގެ ފާޑުކިޔުން ސަރުކާރަށް އަމާޒުވެފައިވާއިރު، އިނާޒްގެ އިސްތިއުފާ އަށްފަހު އަވަސް އަރުވާލައިގެން ވަގުތީ ޗެއަރމަނަކު ހަމަޖައްސަވައި މި މުއާމަލާތަށް ޕެންޝަން އޮފީހުގެ ބޯޑުން ރުހުން ދެއްވާފައިވާކަން ފާހަގަކުރެވެ އެވެ.
ޕެންޝަން އޮފީހުން އަންގާރަ ދުވަހު ނެރުނު ނޫސް ބަޔާނެއްގައި ބުނީ ފިނޭންސް މިނިސްޓްރީއިން ދިވެހި ރުފިޔާ އަދި އެމެރިކާ ޑޮލަރުން ޖުމުލަ 2.4 ބިލިއަންގެ ބޮންޑެއްގައި އިންވެސްޓު ކުރުމަށް ހުށަހަޅާފައިވާ ކަމަށެވެ. އަދި ޕެންޝަން ފަންޑުގެ ލިކުއިޑިޓީއަށް ބިނާކޮށް މި އިންވެސްޓްމަންޓަށް ފައިސާ ހޯދުމަށް ހުށަހަޅާފައިވަނީ، މޯލްޑިވްސް ރިޓަޔަރމަންޓް ޕެންޝަން ސްކީމުން މިހާތަނަށް އިންވެސްޓް ކޮށްފައިވާ ޓްރެޜަރީ ބޮންޑުތަކުގެ ތެރެއިން 2.4 ބިލިއަން ރުފިޔާގެ ބޮންޑު ސެކަންޑަރީ މާރކެޓުގައި ވިއްކާލުމަށްފަހު، ލިބޭ ފައިސާ އިން ކަމަށެވެ.
މި މުއާމަލާތުގެ ސަބަބުން ބާޒާރުން ބޭރު ފައިސާ ގަންނަން ނުޖެހި، އިންވެސްޓްމަންޓެއްގެ ތެރެއިން ޕެންޝަން ފަންޑުގައި ބޭރު ފައިސާގެ ރިޒާވެއް އުފެދިގެންދާނެ ކަމަށް ބުނެ ފައިސާ ޗާޕުކުރުމުގެ ގޮތުން ހިންގާ މި މުއާމަލާތް ޕެންޝަން ބޯޑުން ވަނީ ދިފާއުކޮށްފަ އެވެ. އަދި މީގެ އިތުރުން ޕެންޝަން ފަންޑުން މިހާތަނަށް އިންވެސްޓް ކޮށްފައިވާ ޓްރެޜަރީ ބިލްތަކުގެ ތެރެއިން ބައެއް، ދިގުމުއްދަތުގެ ޓްރެޜަރީ ބޮންޑަށް ބަދަލުކުރުމުގެ ފުރުޞަތު މި މުއާމަލާތުން ލިބިގެންދިއުމާއެކު، ޕޯޓްފޯލިއޯ ރިޓާރންވެސް އިތުރުވެގެންދާނެ ކަމަށް ޕެންޝަން އޮފީހުން މި މުއާމަލާތުގެ ދިފާއުގައި ބުނެފައިވެ އެވެ.
އިނާޒްގެ އިތުރުން ފައިސާ ޗާޕުކުރަން އުޅޭ މައްސަލައިގައި ޕެންޝަން އޮފީހުގެ ބޯޑުގައި އިންނެވި އަހުމަދު ސަރުވަޝް އާދަމް އަދި ސީއެފްއޯ ގެ މަގާމުގައި ހުންނެވި ހައްވާ ފަޖުވާ ވަނީ އިސްތިއުފާ ދެއްވާފަ އެވެ.
ޕެންޝަން ފަންޑުގައި 2.4 ބިލިއަން ރުފިޔާ ނެތްއިރު، އެމްއެމްއޭއިން ފައިސާ ހޯދައިގެން މިކަން ކުރާނަމަ ކުރެވޭނީ ފައިސާ ޗާޕުކޮށްގެން ކަމަށް މީގެ ކުރިން ޕެންޝަން ބޯޑުގައި ހުންނެވި ސަރުވަޝް ވަނީ ވިދާޅުވެފައެ ވެ.
ނަމަވެސް މިއީ ފައިސާ ޗާޕުކުރުން ނޫން ކަމަށް ބުނެ ރައީސް މުއިއްޒުގެ ސަރުކާރުން ދަނީ ދިވެހި ރައްޔިތުންނަށް އޮޅުވާލަން ބުހުތާނު ދޮގުތަކެއް ހަދަމުން ކަމަށް ގިނަ ބަޔަކު ތުހުމަތު ކުރެ އެވެ. މާލީ ފައިދާ ހޯދުމާއި (މޮނެޓައިޒޭޝަން) އަދި އަމާނާތްތެރިކަމާއެކު މާލީ ޒިންމާ އަދާކުރުމާ (ފިޑިއުޝަރީ ރެސްޕޮންސިބިލިޓީ) ގުޅޭގޮތުން ސަރުކާރުން ސާފު ވިސްނުމެއް ގެންގުޅެންޖެހޭކަމަށް އިގްތިސާދީ ދާއިރާގެ ތަޖުރިބާކާރުން ދަނީ ބުނަމުންނެވެ. އަދި ސިޔާސަތަކުން ހާސިލް ކުރާ ވަގުތީ ނަތީޖާ އާއި ދުރު ނަތީޖާ ސަރުކާރުން ވަޒަން ކޮށްލުން މުހިންމު ކަމަށް އެފަރާތްތަކުން ދަނީ ފާހަގަކުރަމުންނެވެ.
