މިނިވަން ކުރާނެކަމަށް ވިދާޅުވި ޝަރުއީ ނިޒާމު އޮތީ ސަރުކާރުގެ "އުނގުތެރޭގަ"

މީގެ ދުވަސްކޮޅެއް ކުރިން މީސް މީޑިއާގައި ދައުރުވި ފޮޓޯއެކެވެ. ފޮޓޯ އިން ފެންނަނީ ދިވެހިރާއްޖޭގެ އުއްތަމަ ފަނޑިޔާރު އަބްދުލް ގަނީ މުހައްމަދު، ރައީސް މުއިއްޒުގެ ވަޒީރުން ތަކެއްގެ މެދުގަ ހުރެގެން އުފާވެރި ވަގުތުކޮޅެއް ހޭދަކުރަމުންގެންދާ މަންޒަރެވެ. 3 ވަޒީރުންނަކީ ވެރިކަންކުރާ ޕީއެންސީ ގެ ސިޔާސީ ހަރަކާތްތަކުގައި ވެސް ނުހަނު އިސްކޮށް އުޅުއްވާ 3 ބޭފުޅުންނެވެ. މި ފޮޓޯ ގަނޑާއެކު އެތައްބަޔަކު ވަނީ މީސް މީޑިޔާގައި ތަފާތު ހިޔާލު ފާޅުކޮށްފަ އެވެ. ރައްޖޭގެ ޝަރުއީ ނިޒާމުގެ ހާލަތު މިހާރު އޮތްގޮތާ ދޭތެރޭ ކަންބޮޑުވުން ފާޅުކޮށްފަ އެވެ. 

ރައީސް މުއިއްޒު ރާއްޖޭގެ ވެރިކަމަށް ވަޑައިގަތީ ޝަރުއީ ނިޒާމު އެންމެހާ ނުފޫޒަކުން މިނިވަން ކުރާނެ ކަމުގެ ވައުދާ އެކުގަ އެވެ. ރިޔާސީ ކެމްޕއެިންގަ އެއް ވާހަކަ އަކަށް އެންމެ ގިނައިން ދެއްކެވި ވާހަކަ އަކީ ވެސް ޝަރުއީ ނިޒާމު މިނިވަން ކުރުމުގެ ވާހަކަ އެވެ. 17 ނޮވެންބަރު 2023 ގައި ރައީސް ކަމުގެ މަގާމުގެ ހުވާ ކުރައްވައި ރައީސް މުއިއްޒު ދެއްކެވި ވާހަކަފުޅުގައި ރައީސް މުއިއްޒު ވިދާޅުވީ ޝަރުއީ ދާއިރާ އަށް ނުފޫޒު ފޯރުވުން އެދުވަހުން ފެށިގެން ނިމުނީ ކަމުގައެވެ. ނަމަވެސް ރައީސް މުއިއްޒުގެ ވެރިކަމަށް 2 އަހަރު ފާއިތުވެގެން ގޮސްފައިވާ އިރު ފެނިގެންދަނީ މުޅިން އެހެން މަންޒަރެކެވެ. ޝަރުއީ ދާއިރާ އަށް މިހާރު މިވަނީ ރައީސް މުއިއްޒުގެ ހަތަރެސްފައި ބާނުއްވާފަކަމަށް ގިނަބަޔަކު ދަނީ ބުނަމުންނެވެ. 

ރާއްޖޭގެ ޝަރުއީ ނިޒާމު މިއަދު ވަނީ މީގެ އެތަކެއް އަހަރު ފަހަތަށް ސޮއްސާލާފަ ކަމަށް ރައްޔިތުން ދަނީ ބުނަމުންނެވެ. ފަހުގެ ތާރީހުގައި ރާއްޖޭގައި ސަރުކާރަކުން ޝާރުއީ ނިޒާމަށް ނުފޫޒު ނު ފޯރުވާ މިންވަރަށް މިސަރުކާރުން ދަނީ ނުފޫޒު ފޯރުވަމުންނެވެ. ސަރުކާރުން ބޭނުން ނުވާ ގޮތަކަށް ހުކުމެއް ކުރުމަކީ އަމިއްލަ ކަރަށް މަޅިގަނޑެއް މެހުން ކަމަށް ޝަރުއީ ކޯޓުތަކުގެ ފަނޑިޔާރުން ބުނާކަހަލަ އެވެ. ހުރިހާ ބާރެއް މުށުގެ ތެރެޔަށް ލައިގެން، ސަރުކާރުން ބުނަމުންދަނީ ކަން ކުރާނީ ތިމަންނަމެން ބޭނުންވާ ގޮތަކަށް ކަމަށެވެ. ސަރުކާރުގެ އިސް ފަރާތްތަކުން ފާޅުކަންބޮޑު ކޮށް ޖަރީމާ ތައް ހިންގަމުން ދަނީ، ގާނޫނުގެ ނުކުޅެދިފައިވާ ދިގު އަތް އެމީހުންނާ އަރާހަމަނުކުރާނެ ކަމުގެ ފުރިހަމަ ޔަގީންކަމާއެކީގަ އެވެ. 

ސަރުކާރަށް ނިސްބަތްވާ ނުފޫޒު ގަދަ މަޖްލިސް މެމްބަރުންނާއި، ވަޒީރުން އަދި އެހެނިހެން ސިޔާސީ މަގާމުތަކުގައި ތިއްބެވި ބޭފުޅުން ޖަހާހާ ބެރަކަށް ނަށާ ބަޔަކަށް، ރާއްޖޭގެ ޝަރުއީ ދާއިރާގައި ތިއްބެވި ބޭފުޅުން މިވަނީ ވެފަ އެވެ. ގާނޫނު ތައް ކޮށާ މަށައިގެން ރައީސް މުއިއްޒު ބޭނުންނުވާ ގޮތަކަށް ނޭވާ އެއްވެސް ނުލެވޭ ވަރަށް ކޯޓުތަކުގެ ފަނޑިޔާރުންގެ ފެންވަރު މިއަދު މިވަނީ ދައްކޮށްލާފަ ކަމަށް ގިނަ ބަޔަކު ދަނީ ބުމަމުންނެވެ. 

ދައުރުވަމުންވާ އުއްތަމަފަނޑިޔާރުގެ ފޮޓޯ ގަނޑުން ފެނިގެންދަނީ ރާއްޖޭގެ ޝަރުއީ ނިޒާމު މިއަދު އޮތް ހާލަަތެވެ. ވަށައިގެންވާ ވަޒީރުން ދޭހަކޮށްދެނީ، ސަރުކާރުން ބޭނުންނުވާ ގޮތަކަށް ޝަރުއީ ދާއިރާ އަށް މިއަދު ގު ޑާވެސް ލެވެން ނެތްކަމެވެ. މިނިވަން ކުރަން ބުނި ޝަރުއީ ނިޒާމު އޮތީ ސަރުކާރުގެ އުނގުތެރޭގައި މުޅިން ގައިދު ވެފައިވާކަމެވެ.