އެޕްސްޓީންގެ މައްސަލާގައި ހިލަރީ ކްލިންޓަން ކޮންގްރެސްއަށް ހާޒިރުކޮށްފި

ޖެފްރީ އެޕްސްޓީންގެ މައްސަލަތަކާ ގުޅިގެން އެމެރިކާގެ ކުރީގެ ސެކްރެޓަރީ އޮފް ސްޓޭޓް ހިލަރީ ކްލިންޓަން، އެމެރިކާގެ ގާނޫނު ހަދާ މަޖިލީހުގެ ހައުސް އޯވަރސައިޓް ކޮމިޓީއަށް ހާޒިރުކޮށް ސުވާލުކޮށްފިއެވެ.

މި ބައްދަލުވުމުގައި ވާހަކަދައްކަވަމުން ހިލަރީ ވަނީ، މިހާރުގެ ރައީސް ޑޮނަލްޑް ޓްރަމްޕްގެ މައްޗަށް ކުރެވޭ ކުޑަކުއްޖަކަށް ޖިންސީ ގޯނާކުރިކަމުގެ ތުހުމަތުތަކާ ގުޅޭ ލިޔެކިޔުންތައް އެމެރިކާގެ ޑިޕާޓްމަންޓް އޮފް ޖަސްޓިސް (ޑީއޯޖޭ) އިން ފޮރުވަން މަސައްކަތްކުރާ ކަމަށް ތުހުމަތުކުރައްވާފައެވެ. އަދި އެޕްސްޓީންގެ މައްސަލައިގެ ހަގީގަތް ހޯދަން ކޮމިޓީން ހަގީގަތުގައިވެސް ބޭނުންވާނަމަ، ޓްރަމްޕް ހާޒިރުކޮށް ހުވާގެ މަތީގައި ހުރެ އޭނާއާ ސުވާލުކުރުމަށް ހިލަރީ ވަނީ ގޮވާލައްވާފައެވެ. އެކަމަނާ ވިދާޅުވީ އެޕްސްޓީންގެ ލިޔެކިޔުންތަކުގައި އެތައް ހާސް ފަހަރަކު ޓްރަމްޕްގެ ނަންފުޅު ހިމެނިފައިވާ ކަމަށެވެ.

ކޮމިޓީގައި ދެއްވި ބަޔާނުގައި ހިލަރީ ވިދާޅުވީ ޖެފްރީ އެޕްސްޓީންއާއި ގިސްލޭން މެކްސްވެލް ހިންގި ޖިނާއީ އަމަލުތަކާ ގުޅޭ އެއްވެސް މައުލޫމާތެއް އެކަމަނާއަށް އެނގިވަޑައިނުގަންނަވާ ކަމަށެވެ. އަދި އެޕްސްޓީންއާ ދުވަހަކުވެސް ބައްދަލުވިކަމެއް ހަނދުމަފުޅު ނެތްކަމަށްވެސް އޭނާ ވިދާޅުވިއެވެ.

މި ބައްދަލުވުމުގައި ހިލަރީ އިތުރަށް ވިފާޅުވެފައި ވަނީ އެމެރިކާގެ މިހާރުގެ ރައީސް ޑޮނަލްޑް ޓްރަމްޕްގެ މައްޗަށް ކުރެވޭ ތުހުމަތުތައް ފޮރުވަން އެމެރިކާގެ ޖަސްޓިސް ޑިޕާޓްމަންޓުން މަސައްކަތްކުރާ ކަމަށް ވިދާޅުވެ ވަރުގަދަ ބަހުގެ ހަމަލާތަކެއް ދެއްވާފައެވެ.

ސިއްރުކޮށްގެން ކުރިއަށްގެންދިޔަ މި ބައްދަލުވުން ކުޑަވަގުތުކޮޅަކަށް މެދުކަނޑާލަންވެސް ޖެހުނެވެ. އެއީ ރިޕަބްލިކަން ޕާޓީގެ މެމްބަރެއް ކަމަށްވާ ލޯރެން ބޯބަރޓް، ކޮމިޓީ ރޫމް ތެރޭގައި ހިލަރީ އިންނަވަނިކޮށް ފޮޓޯއެއް ނަންގަވައި ސޯޝަލް މީޑިއާ އެކްޓިވިސްޓަކަށް ފޮނުވުމުން، އެ ފޮޓޯ ލީކުކޮށްލުމާ ގުޅިގެންނެވެ. މިއީ ކޮމިޓީގެ ގަވާއިދުތަކާ ކަނޑައެޅިގެން ޚިލާފު ކަމެކެވެ.

ކޮމިޓީގައި ދެއްވި އޮޕަނިންގ ސްޓޭޓްމަންޓް ނުވަތަ ފެށުމުގެ ބަޔާނުގައި ހިލަރީ ވަނީ، ޓްރަމްޕް ކުޑަކުއްޖަކަށް ޖިންސީ ގޯނާކުރިކަމަށް ތުހުމަތުކުރެވޭ މައްސަލައެއްގެ ލިޔެކިޔުންތަކާއި އެފްބީއައިގެ އިންޓަވިއުތައް އާންމުނުކޮށް، އެމެރިކާގެ ޑިޕާޓްމަންޓް އޮފް ޖަސްޓިސް (ޑީއޯޖޭ) އިން ފޮރުވާފައިވާކަމަށް ބުނެ ފެތުރެމުންދާ ރިޕޯޓުތަކުގެ ހަގީގަތް ހޯދުމަށް ކޮމިޓީއަށް ގޮވާލައްވާފައެވެ.

"މި ކޮމިޓީން ހަގީގަތުގައިވެސް އެޕްސްޓީންގެ މައްސަލައިގެ ހަގީގަތް ހޯދަން ބޭނުންނަމަ، ނޫސްވެރިންގެ ބައްދަލުވުންތަކުން މިހާރުގެ ރައީސް (ޓްރަމްޕް) ދެއްވާ ޖަވާބުތަކަށް ބަރޯސާވުމުގެ ބަދަލުގައި، އެޕްސްޓީންގެ ފައިލްތަކުގައި އެތައް ހާސް ފަހަރަކު އޭނާގެ ނަން އޮތް ސަބަބާމެދު ހުވާގެ މަތީގައި ހުރެ ސީދާ އޭނާއާ ސުވާލުކުރަންޖެހޭނެ،" ހިލަރީ ވިދާޅުވިއެވެ.

މިކަމާ ގުޅިގެން ޑިމޮކްރެޓިކް ޕާޓީގެ މެމްބަރު ޔަސަމީން އަންސާރީވެސް ވަނީ މިއީ "އެމެރިކާގެ ތާރީޚުގައިވެސް ހިންގާ އެންމެ ބޮޑު އޮޅުވާލުމާއި ފޮރުވުން" ކަމަށް ސިފަކުރައްވާފައެވެ. އޭނާ ވިދާޅުވީ ޓްރަމްޕާ ދެކޮޅަށް ހުރި 50 ޞަފުޙާގެ ތުހުމަތުތަކެއް ޑީއޯޖޭއިން ހިފަހައްޓާފައިވަނީ ގާނޫނާ ޚިލާފަށް ކަމަށެވެ.

މި މައްސަލާގައި ކުރީގެ ރައީސް ބިލް ކްލިންޓަންވެސް ކޮމިޓީއަށް ހާޒިރުވުމަށް ވަނީ އަންގާފައެވެ. ރިޕޯޓުތައް ބުނާގޮތުން ކްލިންޓަންގެ ދެކަނބަލުން ކޮމިޓީއަށް ހާޒިރުވާން އެއްބަސްވެވަޑައިގަތީ، ކޮމިޓީގެ އަމުރަށް ނުކިޔަމަންތެރިވެއްޖެނަމަ ފިޔަވަޅު އަޅާނެކަމުގެ އިންޒާރު ދިނުމުންނެވެ.

ބިލް ކްލިންޓަން ވަނީ އެޕްސްޓީންގެ އަމިއްލަ މަތިންދާބޯޓެއްގައި އެތައް ފަހަރަކު ދަތުރުކުރެއްވި ކަމުގައެވެ. އަދި އެޕްސްޓީންގެ ފައިލްތަކުގައި ބިލް ކްލިންޓަންގެ ނަންވެސް އެކި ފަހަރުމަތިން ފާހަގަކޮށްފައިވެއެވެ. ނަމަވެސް އޭނާވެސް ވަނީ އެޕްސްޓީންގެ ކުށްތަކުގެ އެއްވެސް މައުލޫމާތެއް އެނގިވަޑައިނުގަންނަވާ ކަމަށާއި، މީގެ 20 އަހަރު ކުރިން އެޕްސްޓީންއާ އޮތް ގުޅުން ކަނޑާލާފައިވާކަމަށް ވިދާޅުވެފައެވެ.