މި ވެރިކަން އައި 15 ދުވަހުގެ ކާބޯތަކެތި ގަންނާނެ ފަދަ އެއް ނެތް ނަމަ ތިޔަ ކުރެއްވިހާ ޚަރަދުތައް ކުރެވޭނެތޯ؟
މި ސަރުކާރު ވެރިކަމާ ހަވާލުވިއިރު ރިޒާވްގައި ހުރީ 15 ދުވަހުގެ ކާބޯތަކެތި ގަނެވޭނެ މިންވަރު ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވި ނަމަވެސް، އެ ވާހަކަތަކާ ސަރުކާރުގެ އަމަލުތަކާ ދިމާނުވޭ.
މިނިސްޓަރު ސައީދު ސަރުކާރުގެ ރަސްމިއްޔާތެއްގައި ވާހަކަ ދައްކަވަނީ | ރައީސް އޮފީސް
މި ދުވަސްވަރަކީ ކެމްޕެއިންގެ ދުވަސްވަރެކެވެ. އެންމެން ވެސް އެއް އަޑަކުން ދައްކަނީ ސިޔާސީ ވާހަކަ އެވެ. ސަރުކާރު ހިންގާ ޕާޓީ އިން ވެސް ވެރި މީހާ ވެސް ވީހާ ވެސް ފޮނި ރާގެއްގައި ހުޝާމަތު ކުރަނީ އެވެ. އެކަަކަށް ވުރެ އަނެކަކު މޮޅުކޮށްލެވޭތޯ ވެސް ބަލަ އެވެ.
އިކޮނޮމިސްޓަރ މުހައްމަދު ސައީދަކީ ވެސް މި މޭރުމުން ނިކަން ރައީސަށް ތައުރީފް ކުރައްވާ ބޭފުޅެކެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަކީ ނިކަން މޮޅު އިކޮނޮމިސްޓެއް ކަމަށް މި އިހަށް ރޭ ވެސް ވިދާޅުވެއްޖެ އެވެ. ފަންނު އުތުރުގެ ޖަގަހަ ހުޅުވުމަށް ރޭ ބޭއްވި ޖަލްސާގައި ސައީދު ވިދާޅުވީ ވެރިކަމަށް މި ސަރުކާރު އައި އިރު ދައުލަތް އޮތީ ނިކަން ހާލުގައި ކަމަށެވެ.
ރައީސް މުއިއްޒު ވެރިކަމާ ހަވާލުވެވަޑައިގެންނެވީ ދައުލަތުގެ ރިޒާވް އޮތީ އެންމެ 15 ދުވަހުގެ ކާބޯތަކެތި ގަނެވޭނެ މިންވަރަށް ދަށްވެފައިވާ ދަނޑިވަޅެއްގައި ކަމަށް ސައީދު ވިދާޅުވި އެވެ. މިއަދު މާތްالله ގެ ރަހުމަތާއެކު އެ ރިޒާވް 1.1 ބިލިއަން ޑޮލަރަށް އުފުލިފައިވާކަމަށް ވެސް ސައީދު ވިދާޅުވި އެވެ.
15 ދުވަހުގެ ކާބޯތަކެތި ގަންނާނެ ފައިސާ ނެތް ގައުމެއްގައި 500 މިލިއަން ރުފިޔާ ޚަރަދުކޮށްފައި ތިން ޑްރޯން ގަތް ގޮތެއް ނިކަން ވަޒީރު ވިދާޅުވެދެއްވަން ވީ ނޫންތޯ އެވެ؟ 15 ދުވަހުގެ ކާބޯތަކެތި ގަންނާނެ ފައިސާ ނެތް ނަމަ ހީ އެކަން ކުރާނެ ގޮތެއް ނުވިސްނުނެވެ. އެހެންވީމަ ވަޒީރު އެ ދައްކަވާ ވާހަކަ ދިމަލެއް ނުވެ އެވެ.
އެއަށް ވުރެ ކުރިއަށް ޖެހިލާނަމެވެ. މި ވެރިކަން ފަށަން ބޭއްވި ކުލަ ގަދަ، ބިޔަ ބޮޑު ހުވާކުރުމުގެ ރަސްމިއްޔާތު އަދި ދިވެހިން ހަނދާން ހުންނާނެ އެވެ. ވަޒީރު އެ ވިދާޅުވާ ގޮތަށް 15 ދުވަހުގެ ކާޑު ގަންނާނެ ފައިސާ ދައުލަތުގެ މާލިއްޔާގައި ނެތް ނަމަ، 23 މިލިއަން ރުފިޔާ ޚަރަދުކޮށްގެން ހުވާކުރުމުގެ ހައިސިއްޔަތު ހުންނާނެ ހަމަ އެއް ނެތެވެ.
ސައީދު އެ ވިދާޅުވާ ހާލަތެއްގައި ނަމަ ދެ ފްލޯއަށް ހުރި ތަނެއްގައި، ލިފްޓު ބަހައްޓަން 4 މިލިއަން ޚަރަދު ކުރެއްވުން އެއީ ކުރެވޭނެ ކަމެއް ކަމަކަށް ޤަބޫލެއް ނުކުރެވެ އެވެ. ސައީދު ފަދަ މަޤާމެއްގައި ހުންނެވި ބޭފުޅަކު ސިޔާސީ ގޮތުން ވެސް ދައްކަވާ ވާހަކަތަކަކީ މިއަށް ވުރެ ބޮޑަށް ތެދު ވާހަކަތަކަށް ވާން ޖެހެ އެވެ. އެ ވިދާޅުވާ ހިސާބުތަކާއި ތިމާމެން އަމިއްލަ އަށް ކުރި ޚަރަދުތަކާއި ދިމާވޭތޯ ވެސް ބަލާލުން މުހިންމެވެ.
