އަބްދުއްސަމަދު މެމޯރިއަލް ހޮސްޕިޓަލްގެ މުވައްޒަފުން މުޒާހަރާ ކުރުމުން އެންމެ ފަހުން 2 އޮފް ދޭން ފަށައިފި
ތިނަދޫ ސިޓީގެ ޑރ. އަބްދުއްސަމަދު މެމޯރިއަލް ހޮސްޕިޓަލުގެ މުވައްޒަފުންނަށް ކުރިން ލިބެމުންދިޔަ ދެ އޮފް ދުވަސް އައު ޕޭ ފްރޭމްވޯކާ ގުޅިގެން އުނިކުރުމުން، އެކަމާ ހިތްހަމަނުޖެހިގެން އެޓެންޑެންޓުން އިހުތިޖާޖުކުރި. މި މައްސަލައިގައި މުވައްޒަފުންގެ މެދުގައި ތަފާތުކުރުންތައް ގެންގުޅޭ ކަމުގެ ޝަކުވާ ބޮޑުވެފައިވަނިކޮށް، ހޮސްޕިޓަލުގެ މެނޭޖުމަންޓުން މިހާރު ވަނީ އަލުން ހަމަހަމަ އުސޫލަކުން އޮފް ދުވަސް ދޭން ނިންމާފަ. ގިނަ އަދަދެއްގެ ރައްޔިތުން ހިދުމަތް ހޯދާ މި ހޮސްޕިޓަލުގެ ސީއީއޯ ކުރިން މި ބަދަލަށް ދެކޮޅު ހެއްދެވި ނަމަވެސް، މުވައްޒަފުންގެ ކަންބޮޑުވުންތަކާ ގުޅިގެން މައްސަލައަށް ވަނީ ހައްލެއް ލިބިފައި.
ޑރ. އަބްދުއްސަމަދު މެމޯރިއަލް ހޮސްޕިޓަލްގައި މުވައްޒަފުން ކުރި މުޒާހަރާގެ ތެރެއިން | ރާއްޖެއެމްވީ
ތިނަދޫ ސިޓީގައި ހުންނަ ޑރ. އަބްދުއްސަމަދު މެމޯރިއަލް ހޮސްޕިޓަލުގެ މުވައްޒަފުންނަށް ހައްގުވާ އޮފް ނުދީ ހިފެހެއްޓި މައްސަލައިގައި މުވައްޒަފުން އިހިތިޖާޖު ކުރުމުން ހަމަހަމަ އުސޫލުން އޮފް ދުވަސް ދޭން ފަށައިފި އެވެ.
މިދިޔަ އަހަރު ނޮވެމްބަރު މަހުން ފެށިގެން އޮފް ދުވަސް ދޭ އުސޫލަށް އޮތީ ބަދަލު ގެނެސްފަ އެވެ. ކުރިން ދެ އޮފް ލިބުނު ނަމަވެސް އައު ޕޭ ފްރޭމް ވޯކުގައި އެގޮތަށް ނެތް ކަމަށް ބުނެ ހޮސްޕިޓަލްގެ ސީއީއޯ އަންގައިވައިގެން 2 ދުވަހު އޮފް ނުދޭ ގޮތަށް ނިންމި އެވެ. ރާއްޖެޓީވީ އާއި ވާހަކަ ދެއްކި ހޮސްޕިޓަލުގެ މުވައްޒަފަކު ބުނީ އުސޫލު ބަދަލު ކުރީ ކިހިނެއް ކޮން ގޮތަކަށްކަން ނޭނގޭ ކަމަށެވެ. އޭނާ ބުނީ މުވައްޒަފުންގެ މެދުގައި ވަރަށް ބޮޑަށް ތަފާތު ކުރުންތައް ގެންގުޅޭ ކަމަށެވެ.
އަދި އެކަމާއި ގުޅިގެން އެޓެންޑެންޓުން މުޒާހަރާ ކޮށް އެންމެ ފަހުން އެ މައްސަލަ ހައްލު ކުރެވިފައިވާ ކަމަށް އޭނާ ބުންޏެވެ. އޭނާ ބުނީ މުވައްޒަފުން މުޒާހަރާ ކުރުމުން ވެސް ހޮސްޕިޓަލުގެ ސީއީއޯ އަހުމަދު އަޝްރަފް 2 އޮފް ނުދޭނެކަމަށް ވިދާޅުވި ކަމަށެވެ. އަދި ރާއްޖެއިން ބޭރުގައި ހުރުމަށްފަހު އެނބުރި އައިސް ވެސް އޮފް އެގޮތަށް ނުދޭނެކަމަށް ވިދާޅުވި ކަމަށާއި، ނަމަވެސް މިހާރު އެ ނިންމުމަށް ބަދަލު ގެނެސްފައިވާ ކަމަށެވެ. އަދި މި ކަމާއި ގުޅިގެން ހޮސްޕިޓަލް ބަދުނާމުވާ ގޮތަށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބަދުނާމުވާ ގޮތަށް މުވައްޒަފުން އަމަލުކުރަނީ ކަމަށް ބުނެ ބައެއް މުވައްޒަފުން ސީއީއޯ ގެ އޮފީހަށް ހާޒިރު ކުރި ކަމަށެވެ.
ޑރ. އަބްދުއްސަމަދު މެމޯރިއަލް ހޮސްޕިޓަލުގައި 93 ނަރުހުންނާއި 22 އެޓެންޑެންޓުން މަސައްކަތް ކުރެ އެވެ. އައު ޕޭ ފުރޭފޯމްވޯކްގެ ކުރިން ވެސް މުވައްޒަފުންނަށް 2 އޮފް ލިބޭ ކަމަށް ވާހަކަ ދެއްކި މުވައްޒަފު ބުންޏެވެ. އަދި މުވައްޒަފުން އެންމެ މަދު އިރުގައި ވެސް ހަމަހަމަ އުސޫލުން އޮފް ލިބުނު ކަމަށެވެ. އެހެންކަމުން މިހާރު ވެސް އެގޮތަށް އަމަލު ނުކުރެވެންވީ ސަބަބެއް ވެސް ނެތް ކަމަށް އޭނާ ބުންޏެވެ.
ތިނަދޫގެ ޑރ. އަބްދުއްސަމަދު މެމޯރިއަލް ހޮސްޕިޓަލް ގެ މުވައްޒަފުންނަށް ހަމަހަމަ އުސޫލުން ''އޮފް ދުވަސް'' ނުދޭ މައްސަލައިގައި މުޒާހަރާ ކުރަން ނިންމައިފި
ޑރ. އަބްދުއްސަމަދު މެމޯރިއަލް ހޮސްޕިޓަލަކީ ގއ. އަދި ގދ. އަތޮޅުގެ ހުރިހާ ރައްޔިތުން ހިދުމަތް ހޯދާ އެ ސަރަހައްދުގެ އެންމެ ކާރުބާރު ބޮޑު އެއް ހޮސްޕިޓަލެވެ. އެތަނުން ދުވާލެއްގެ މައްޗަށް އެތައް ހާސް ބަޔަކު ހިދުމަތް ހޯދާއިރު، ސިއްހީ ކަންތައްތަކުގައި ދެ އަތޮޅުގެ 22,000 އެއްހާ އާންމު ރައްޔިތުން ހިދުމަތް ހޯދާ ތަނެވެ.
