ގާޑިއޯލާ ބޭނުން ވަނީ، ހާލަންޑު ވީހާ ވެސް ގިނަ ލަނޑު ތަކެއް ޖަހަން

މެންޗެސްޓަރ ސިޓީ އަށް ކުޅެމުން އަންނަ ނޯވޭގެ ފޯވާޑު އާލިން ހާލަންޑް، ވީހާ ވެސް ގިނަ ލަނޑު ތަކެއް ޖަހަން ބޭނުންވާ ކަމަށް އެ ޓީމަށް އިރުޝާދު ދެމުން އަންނަ ޕެޕް ގާޑިއޯލާ ބުނެފި އެވެ.

ގާޑިއޯލާ މިހެން ބުނެފައި ވަނީ، އިނގިރޭސި ޕްރިމިއާ ލީގުގައި ސިޓީ އިން ލީޑްސް ޔުނައިޓެޑާ ދެކޮޅަށް ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. ލީޑްސްގެ ދަނޑުގައި ކުޅޭ މެޗުން މޮޅުވެ، އެއް ވަނައިގައި އޮތް އާސެނަލްއާ ދެމެދު އޮތް ފަރަގު ކުޑަ ކުރުމުގެ ފުރުސަތު ސިޓީ އަށް އޮންނާނެ އެވެ.

ގާޑިއޯލާ ބުނީ، ސިޓީ އިން ކުޅެން ބޭނުން ވަނީ އެ ޓީމުގެ ވައްޓަފާޅީގައި ކަމަށާއި، އެކަމަށް ބަދަލެއް ނާންނަ ކަމަށެވެ. އެއާ އެކު، ސިޓީ އިން ބޭނުން ވަނީ މެޗުތަކުން މޮޅުވެ، ތިން ޕޮއިންޓު ޔަޤީން ކުރުމާ އެކު، ޓީމުގެ ކުޅުން އެއް ދުވަހުން އަނެއް ދުވަހަށް ރަނގަޅު ކުރުން ކަމަށް ވެސް ގާޑިއޯލާ ވަނީ ބުނެފަ އެވެ.

މީގެ އިތުރުން ގާޑިއޯލާ ބުނީ އޭނާ ބޭނުން ވަނީ، ހާލަންޑް ވީހާ ވެސް ގިނަ ލަނޑުތަކެއް ޖަހަން ކަމަށެވެ. އެގޮތުން އިދިކޮޅު ޓީމުގެ ގޯލާ ހާލަންޑް ކައިރިވާ ކޮންމެ ވަގުތަކު، އޭނާ ލަނޑެއް ޖަހަން ބޭނުންވާ ކަމަށް ވެސް ގާޑިއޯލާ ބުންޏެވެ. އެއަށް ވުރެ ރަނގަޅު ޓެކްޓިކްސްއެއް ނެތްކަން ފާހަގަކޮށް ގާޑިއޯލާ ބުނީ، ހާލަންޑް ލަނޑު ޖަހަން ޓީމުން ފުރުސަތު ތަކެއް ދޭން ޖެހޭ ކަމަށެވެ. އަދި އެކަން ބަރޯސާވެފައި އޮންނަނީ މުޅި ޓީމުގެ މައްޗަށް ކަމަށް ވެސް ގާޑިއޯލާ ބުންޏެވެ.

އިތުރަށް ވާހަކަ ދައްކަމުން ގާޑިއޯލާ ބުނީ ސިޓީ އަށް ލިބިފައި އޮތީ ފުރުސަތެއް ކަަމަށާއި، ފުރުސަތުގެ ބޭނުން ހިފަން ޖެހޭނެ ކަމަށެވެ. އޭނާ ބުނީ މިއީ ސިޓީ އިން އެންމެ ކަމެއް ވެސް ދޫކޮށްލައިގެން ނުވާނެ ވަގުތެއް ކަމަށާއި، އެ ޓީމުގެ އެންމެ ފުރިހަމަ ކުޅުން ދައްކަން ޖެހޭ ދަނޑިވަޅަކީ މިއީ ކަމަށެވެ. ސިޓީގެ ކުޅުންތެރިންނާ މެދު ހިތްހަމަ ޖެހިގެން ހުރިކަން ފާހަގަކޮށް ގާޑިއޯލާ ބުނީ، ސީޒަންގެ ކުރީކޮޅާ އަޅައި  ބަލާއިރު، އެތައް ގުނައެއް ޓީމު ރަނގަޅުވެފައިވާ ކަމަށެވެ.

ހޮނިހިރު ދުވަހުގެ ރޭ ލީޑްސްއާ ދެކޮޅަށް ނިކުންނައިރު، ލީގު ތާވަލްގެ ދެ ވަނައިގައި ސިޓީ އޮތީ 27 މެޗުން 56 ޕޮއިންޓާ އެކު އެވެ. ސިޓީ އަށް ވުރެ އެއް މެޗު އިތުރަށް ކުޅެފައިވާ އާސެނަލް އެއް ވަނައިގައި އޮތީ، 28 މެޗުން 61 ޕޮއިންޓާ އެކު އެވެ. މެޗުގެ އަދަދު ހަމަކޮށް، ދެ ޕޮއިންޓަށް ފަރަގު ކުޑަ ކުރުމުގެ ފުރުސަތު ސިޓީ އަށް އެބަ އޮތެވެ.