ދުބާއީގައި ހުންނަ އެމެރިކާ ކޮންސިއުލޭޓަށް ހަމަލާ ދީފި، ޒަރޫރީ ނޫން މުވައްޒަފުން ޔޫއޭއީ އިން ފޭބުމަށް އެމެރިކާ އިން އަންގައިފި

އަންގާރަ ދުވަހުގެ ރޭ ދުބާއީގައި ހުންނަ އެމެރިކާގެ ކޮންސިއުލޭޓް ހިމެނޭ ސަރަހައްދަށް ޑްރޯން ހަމަލާއެއް އަމާޒުވެއްޖެއެވެ. މި ހާދިސާއާ ގުޅިގެން، އެމެރިކާގެ ސްޓޭޓް ޑިޕާޓްމަންޓުން ވަނީ އެ ގައުމުގައި ތިބި އެމެރިކާގެ ކޮންސިއުލޭޓްގެ ޒަރޫރީ ނޫން ޑިޕްލޮމެޓިކް މުވައްޒަފުން ޔޫއޭއީން ފޭބުމަށް އަންގާފައެވެ.

ދުބާއީ މީޑިއާ އޮފީހުން ބުނި ގޮތުގައި، ކޮންސިއުލޭޓް ކައިރީގައި ރޯވި ކުޑަ އަލިފާންގަނޑެއް ކަމާބެހޭ ފަރާތްތަކުން ވަނީ ނިއްވާލާފައެވެ. އަދި މި ހާދިސާގައި އެއްވެސް މީހަކަށް އަނިޔާއެއް ލިބިފައިވާ ކަމުގެ ރިޕޯޓެއް ލިބިފައެއް ނުވެއެވެ.

މި ހަމަލާ ދީފައިވަނީ ސައުދީ އަރަބިއްޔާގެ ރިޔާޟްގައި ހުންނަ އެމެރިކާގެ އެމްބަސީއަށް ވެސް ޑްރޯން ހަމަލާތަކެއް އަމާޒުވެފައިވާ ދަނޑިވަޅެއްގައެވެ. 

އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވީ، ކޮންސިއުލޭޓާ އިންވެގެން އޮންނަ ޕާކިން ލޮޓަށް ޑްރޯން ހަމަލާ އެރި ނަމަވެސް، އެ ތަނުގައި ތިބި ހުރިހާ މުވައްޒަފުންގެ ހާލު ބަލައި ކަށަވަރުކޮށްފައިވާ ކަމަށެވެ.

މި ހާދިސާއާ ގުޅިގެން އެމެރިކާއިން ވަނީ ޔޫއޭއީއަށް ދަތުރުކުރުމުގައި ސަމާލުވުމަށް ނެރޭ އެޑްވައިޒަރީ "ލެވެލް 3" އަށް މަތިކޮށްފައެވެ.