އީރާނުން އެމެރިކާގެ "ޓާމިނަލް ހައި އެލްޓިޓިއުޑް އޭރިއާ ޑިފެންސް" ދިފާއީ ނިޒާމަކަށް ހަމަލާދީ ފުނޑުފުނޑު ކޮށްލައިފި

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ބުނި ގޮތުގައި، ހުޅަނގު އޭޝިއާގައި އެމެރިކާއިން ބޭނުންކުރަމުންދާ "ޓާމިނަލް ހައި އެލްޓިޓިއުޑް އޭރިއާ ޑިފެންސް" (ތާޑް) ނިޒާމެއް، އެ ފޯސްގެ އެއިރޯސްޕޭސް ފޯސްއިން ކާމިޔާބުކަމާއެކު ފުނޑުފުނޑުކޮށްލައިފިއެވެ. މިއީ އެމެރިކާގެ މިފަދަ ނިޒާމަކަށް އަމާޒުކޮށް އީރާނުން ދިން ދެވަނަ ހަމަލާއެވެ.

އައިއާރުޖީސީގެ ޕަބްލިކް ރިލޭޝަންސް ޑިޕާޓްމަންޓުން ނެރުނު ބަޔާނެއްގައި ބުނެފައިވަނީ، މިސައިލުން ދިފާއުވުމަށް ބޭނުންކުރާ އެމެރިކާގެ މި ކުރިއަރާފައިވާ ނިޒާމަށް ހަމަލާދީފައިވަނީ "ޕްރެސިޝަން ގައިޑެޑް މިސައިލް" ނުވަތަ އަމާޒަށް ސީދާ ވާސިލްވާ ފަދަ ފަރުމާކޮށްފައިވާ މިސައިލްތަކަކުން ކަމަށެވެ. މި ހަމަލާއާއެކު އެ ނިޒާމު މިހާރު ވަނީ އެއްކޮށް ބޭނުންނުކުރެވޭ ވަރަށް ހަލާކުވެފައެވެ.

މި ހަމަލާ ދީފައިވަނީ ސީދާ ކޮން ސަރަހައްދެއްގައި ހުރި ނިޒާމަކަށް ކަމެއް އައިއާރުޖީސީގެ ބަޔާނުގައި ހާމަކޮށްފައެއް ނުވެއެވެ.

އައިއާރުޖީސީން ބުނި ގޮތުގައި، އެމެރިކާގެ މިފަދަ ދިފާއީ ނިޒާމުތައް ނައްތާލުމަކީ އީރާނުގެ މިސައިލް ހަމަލާތައް ކުރިއަށް ގެންދިއުމަށް އޮތް އެންމެ ބޮޑު ހުރަސް ނެތިގެންދިޔުން ކަމަށެވެ.

އެ ބަޔާނުގައި އިތުރަށް ބުނެފައިވަނީ، އެމެރިކާގެ "ތާޑް" ދެ ނިޒާމެއް ހަލާކުކޮށްލުމާއެކު، އަމާޒުތަކަށް ކާމިޔާބުކަމާއެކު ހަމަލާދިނުމަށް އިސްލާމީ ޖުމްހޫރިއްޔާ އީރާނަށް މިހާރު ވަނީ މަގުފަހިވެފައި ކަމަށެވެ.

މި ރިޕޯޓު ނެރެފައި މިވަނީ، އެކުވެރި އަރަބި އިމާރާތުގެ އަލް-ރުވައިސް ބޭސްގައި ހުރި "ތާޑް" ރޭޑާ ނިޒާމެއް ހަލާކުކޮށްލާފައިވާ ކަމަށް އައިއާރުޖީސީން މީގެ ކުރިން އިއުލާނުކޮށްފައި ވަނިކޮށެވެ.

"ތާޑް" ނިޒާމަކީ ކުރު، މެދު އަދި ދުރު ރާސްތާގެ ބެލިސްޓިކް މިސައިލްތައް އޭގެ ފަހު މަރުހަލާގައި ހުއްޓުވުމަށް އެމެރިކާއިން ބޭނުންކުރާ އެންމެ ޒަމާނީ އަދި ވަރުގަދަ އެއް ދިފާއީ ވަސީލަތެވެ.

މި ހަމަލާތަކާ ގުޅޭގޮތުން އެމެރިކާގެ ސެންޓްރަލް ކޮމާންޑް (ސެންޓްކޮމް) އިން މިހާތަނަށް ރަސްމީކޮށް އެއްވެސް އެއްޗެއް ބުނެފައެއް ނުވެއެވެ.