އީރާނުން ބަހްރޭންގައި ހުރި އެމެރިކާ ވައިގެ މަރުކަޒަށް ހަމަލާދީ ގޮއްވާލައިފި

އިޒްރޭލާއި އެމެރިކާއިން އީރާނަށް ދެމުންދާ ހަމަލާތަކަށް ރައްދު ދިނުމުގެ ގޮތުން އީރާނުން ފަށާފައިވާ އަސްކަރީ އޮޕަރޭޝަނުގެ ދަށުން، ބަހްރޭންގައި ހުންނަ އެމެރިކާގެ މައި ވައިގެ މަރުކަޒަކަށް ވަރުގަދަ ހަމަލާތަކެއްދީ އެތަން ބޭނުންނުކުރެވޭ ވަރަށް ހަލާކުކޮށްލައިފިއެވެ. އީރާނުގެ ފައުޖުތަކުން މެދުކެނޑުމެއްނެތި ދެމުންދާ މި ހަމަލާތަކުގައި އެމެރިކާގެ ކޮމާންޑް ސެންޓަރުތައް ވަނީ ގޮވައިފައެވެ.

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ނެރުނު ބަޔާނެއްގައި ބުނެފައިވަނީ، "ޓްރޫ ޕްރޮމިސް 4" އޮޕަރޭޝަނުގެ 15 ވަނަ ބުރުގެ ދަށުން ބަހްރޭންގައި ހުންނަ "ޝެއިޚް އީސާ އެއާ ބޭސް" އަށް އަމާޒުކޮށް ފޮނުވާލި ހަމަލާތަކުގައި، އެމެރިކާގެ ޓެރަރިސްޓް ފައުޖުތަކުގެ ސްޓްރެޓެޖިކް 10 ކޮމާންޑް ޕޮއިންޓަކަށާއި އިކުއިޕްމަންޓް ކޮމްޕްލެކްސްތަކަށް ބޮޑެތި ގެއްލުންތަކެއް ދީފައިވާ ކަމަށެވެ.

އައި.އާރް.ޖީ.ސީގެ ބަޔާނުގައިވާ ގޮތުން، ހަލާކުކޮށްލި ތަންތަނުގެ ތެރޭގައި އެމެރިކާގެ ޓެރަރިސްޓް ފައުޖުތަކުގެ އެއާ ކޮންޓްރޯލް ކޮމާންޑް ސެންޓަރާއި، މަތިންދާބޯޓަށް އަޅާ ތެޔޮ ރައްކާކުރާ ގުދަންތަކުގެ އިތުރުން، އެމެރިކާގެ މަތީ ފަންތީގެ ކޮމާންޑަރުން ތިބޭ އިމާރާތް ވެސް ހިމެނެއެވެ.

އަންގާރަ ދުވަހުގެ ކުރީކޮޅު އައި.އާރް.ޖީ.ސީ އިން ވަނީ، އެ އިދާރާގެ ކަނޑުގެ ސިފައިން ބަހްރޭންގެ ޝެއިޚް އީސާ ސަރަހައްދުގައި ހުންނަ އެމެރިކާގެ ވައިގެ މަރުކަޒަށް އަމާޒުކޮށް، ޑްރޯން އަދި މިސައިލް ބޭނުންކޮށްގެން ފުޅާދާއިރާއެއްގައި އޮޕަރޭޝަނެއް ހިންގާފައިވާކަން އިއުލާންކޮށްފައެވެ. މިއީ މި އޮޕަރޭޝަނުގެ 14 ވަނަ ބުރެވެ. މި ހަމަލާތަކުގެ ތަފްސީލް ހާމަކުރަމުން އައި.އާރް.ޖީ.ސީ އިން ބުނީ، 20 ޑްރޯން އަދި 3 މިސައިލް އަމާޒުކުރި ތަންތަނަށް ސީދާ ގޮތެއްގައި އަރާފައިވާ ކަމަށެވެ.

އެ ބަޔާނުގައި އިތުރަށް ބުނެފައިވަނީ، އެމެރިކާގެ ވައިގެ މަރުކަޒުގެ މައި ކޮމާންޑް އިމާރާތާއި ހެޑްކުއާޓާޒް މުޅިން ހަލާކުވެފައިވާ ކަމަށާއި، ތެޔޮ ގުދަންތަކުގައި ރޯވެ، އެ ސަރަހައްދުން އަރަމުންދިޔަ ދުމާއި އަލިފާންގަނޑު އެންމެންގެ ސަމާލުކަމަށް އައިސްފައިވާ ކަމަށެވެ.

މީގެއިތުރުން، އެ މަރުކަޒުގެ ހުރިހާ އިންފްރާސްޓްރަކްޗާއެއް މިހާރު ވަނީ ބޭނުންނުކުރެވޭ ވަރަށް ހަލާކުވެފައި ކަމަށާއި، އެތަނުގައި އިންސާނީ ކާރިސާއެއް އުފެދި، އެމެރިކާގެ ޓެރަރިސްޓް ފައުޖުތައް އެ މަރުކަޒު ދޫކޮށް ފިލާފައިވާ ކަމަށް ވެސް އައި.އާރް.ޖީ.ސީ އިން ބުނެފައިވެއެވެ.

މިއާއެކު، އީރާނުގެ ރަސްމީ އަސްކަރިއްޔާއިން ވެސް ވަނީ މި ހަމަލާތަކުގައި ބައިވެރިވާން ފަށާފައިވާކަން އިއުލާންކޮށްފައެވެ. އީރާނުގެ އަސްކަރިއްޔާއިން ނެރުނު 8 ވަނަ ބަޔާނުގައި ބުނެފައިވަނީ، އަންގާރަ ދުވަހުގެ ފަތިހުން ފެށިގެން ދުޝްމަނުންގެ މަގާމުތަކަށާއި ފައުޖުތަކަށް އަމާޒުކޮށް ޑްރޯން އަދި މިސައިލް ހަމަލާތައް ދެމުންދާ ކަމަށެވެ.

އަންގާރަ ދުވަހު ނެރުނު ބަޔާނެއްގައި އަސްކަރިއްޔާއިން ބުނީ، ހެނދުނުން ފެށިގެން އެ ގައުމުގެ ކަނޑުގެ ސިފައިން، ސަރަހައްދުގައި ހުރި ދުޝްމަނުންގެ އުޅަނދުތަކަށާއި މަރުކަޒުތަކަށް އަމާޒުކޮށް "ސާފަސް-ޓު-ސާފަސް" މިސައިލް ހަމަލާތަކެއް ދީފައިވާ ކަމަށެވެ.

މި އޮޕަރޭޝަން ފުޅާވެފައިވާ މިންވަރު ހާމަކުރަމުން އަސްކަރިއްޔާއިން ބުނީ، އެ ގައުމުގެ އެއްގަމާއި، ވައިގެ އަދި ކަނޑުގެ ސިފައިންގެ ހަނގުރާމަވެރި ޑްރޯންތައް ބޭނުންކޮށްގެން، އިޒްރޭލުން ހިފާފައިވާ ފަލަސްތީނުގެ ބިންތަކުގައި ހުރި ޒަޔަނިސްޓުންގެ އަސްކަރީ ސަރަހައްދުތަކަށާއި، ގަތަރުގެ އަލް އުދައިދުގައި ހުންނަ އެމެރިކާގެ މަރުކަޒުތަކަށް ހަމަލާދީފައިވާ ކަމަށެވެ.

އީރާނުގެ އަސްކަރިއްޔާއިން ބުނި ގޮތުގައި މި އޮޕަރޭޝަންތައް އަދިވެސް ދަނީ ކުރިއަށެވެ. އަދި އަދުއްވުންނާ ދެކޮޅަށް ދޭ ހަމަލާތަކާއި ދިފާއީ އޮޕަރޭޝަންތައް ފުރިހަމަ ބާރާއެކު ކުރިއަށްދާނެ ކަމަށް ވެސް އެ ބަޔާނުގައިވެއެވެ.

ރައްދުގައި ދެމުންދާ މި ހަމަލާތަކުން ހާމަވަނީ، ސަރަހައްދުގައި ހުރި އެމެރިކާ އާއި އިޒްރޭލުގެ އަމާޒުތަކާ ދެކޮޅަށް އައި.އާރް.ޖީ.ސީ އާއި އީރާނުގެ ރަސްމީ އަސްކަރިއްޔާ ގުޅިގެން ވަރުގަދަ މަސައްކަތްތަކެއް ކުރަމުންދާ ކަމެވެ.

މި ހަމަލާތަކަކީ، ނިމިދިޔަ ހަފުތާ ބަންދުގައި އެމެރިކާ އާއި އިޒްރޭލުން އެއްވެސް އުސޫލެއް ނެތި އީރާނާ ދެކޮޅަށް ފެށި ހަނގުރާމައަށް ރައްދު ދިނުމުގެ ގޮތުން ދެމުންދާ ހަމަލާތަކެކެވެ.

އޭގެ ފަހުން، އީރާނުގެ އަސްކަރިއްޔާއިން ދަނީ ސަރަހައްދުގެ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށާއި، އިޒްރޭލުން ހިފާފައިވާ ބިންތަކުގައި ހުރި އަމާޒުތަކަށް މެދުކެނޑުމެއްނެތި ރައްދު ހަމަލާތައް ދެމުންނެވެ.