އީރާނުން އެމެރިކާގެ އިތުރު އެފް-15 ޖެޓެއް ހަމަލާދީ ވައްޓާލައިފި

އެމެރިކާގެ އިތުރު އެފް-15 މަރުކާގެ ފައިޓަރ ޖެޓަކަށް އީރާނުން ހަމަލާދީފައިވާ ކަމަށް މަޢުލޫމާތު އެނގޭ މަސްދަރަކުން ތަސްނީމް ނިއުސް އެޖެންސީއަށް ކަށަވަރުކޮށްދީފިއެވެ.

ތަސްނީމް ނިއުސް އެޖެންސީއާ ވާހަކަދެއްކި މަސްދަރަކުން ބުނި ގޮތުގައި، އެމެރިކާގެ އެފް-15 މަރުކާގެ މި ބޯޓަށް ހަމަލާދީފައިވަނީ އީރާނުގެ އަސްކަރިއްޔާގެ އެއަރ ޑިފެންސް ޔުނިޓުންނެވެ.

އީރާނުން އަމިއްލައަށް އުފައްދާފައިވާ ވައިގެ ދިފާއީ ނިޒާމުތައް ބޭނުންކޮށްގެން އެމެރިކާގެ ތިން ފައިޓަރ ޖެޓެއް ވައްޓާލާފައިވާކަން، އީރާނުގެ ޚާތަމް އަލް-އަންބިޔާ ސެންޓްރަލް ހެޑްކުއާޓާޒްއިން މިދިޔަ ހޯމަ ދުވަހު ވަނީ އިޢުލާނުކޮށްފައެވެ.

އެ ހާދިސާއަށްފަހު، އީރާނުން އަމާޒުކުރި އެމެރިކާގެ އަސްކަރީ ބޯޓުތަކާއި، އެ ބޯޓުތައް ވެއްޓުމުގެ ކުރިން ކޮކްޕިޓުން ބޭރުވި ޕައިލެޓުންގެ އެކި ފޮޓޯތައް މިހާރު ދަނީ އާންމުވަމުންނެވެ.

ހޯމަ ދުވަހުގެ ހެނދުނުގެ ވަގުތެއްގައި އީރާނުގެ ހަތިޔާރު އެޅި ފައުޖުތަކުން ވަނީ ކާމިޔާބު އޮޕަރޭޝަނެއްގައި، އީރާނާއި ކުވެއިތު ގުޅޭ ބޯޑަރު ސަރަހައްދުން އެމެރިކާގެ އެފް-15 މަރުކާގެ ފައިޓަރ ޖެޓެއް ވައްޓާލާފައެވެ. މި ހާދިސާ ހިނގާފައިވާކަން ކުވެއިތުގެ މިނިސްޓްރީ އޮފް ޑިފެންސްއިން ވެސް މިހާރު ވަނީ ކަށަވަރުކޮށްދީފައެވެ.

އެމެރިކާގެ އެ ފައިޓަރ ޖެޓު ވެއްޓެމުންދިޔަ މަންޒަރާއި، ކުވެއިތުގެ ބިމަށް ބޯޓު ވެއްޓިފައިވާ މަންޒަރު ފެންނަ ފޮޓޯތަކާއި ވީޑިއޯތައް ސޯޝަލް މީޑިއާގެ އިތުރުން އެކި ޚަބަރު ފަތުރާ ވަސީލަތްތަކުގައި މިހާރު ވަނީ ޝާއިއުކޮށްފައެވެ.